ປີ​ໃໝ່​ສາ­ກົນ ຄວນ​ເຮັດ​ຫຍັງ​ແນ່?

685 26 ທ.ວ. 2016 ນານາສາລະ

ຄວາມ​ຈິງ ການ​ນັບ​ປີ​ໃໝ່ແບບ​ສາ­ກົນ​ນີ້ ຖື​ວ່າ​ນັບ​ເປັນມາດ­ຖານ​ເຮັດ​ໃຫ້​ຮູ້­ຈັກ​ວ່າ ພາຍ​ໃນ​ປີ​ໜຶ່ງ​ເຮົາ​ໄດ້ເຮັດ​ຫຍັງ​ແນ່? ວັນ​ທີ 1 ມັງ­ກອນ 2017 ເປັນ​ມື້ເລີ່ມ​ຕົ້ນ​ຂອງ​ປີ​ໃໝ່ ເຊິ່ງ​ນັບ​ມື້​ໃກ້​ຈະ​ຮອດ​ແລ້ວ ຫຼາຍ​ຄົນ​ຕັ້ງ­ໃຈ​ລໍ​ວາງ​ແຜນ​ສະ­ຫຼອງ​ປີ​ໃໝ່​ກັບຄອບ­ຄົວ ໝູ່​ເພື່ອນ ​ຕາມ​ກະ­ແສ​ຄ່າ​ນິ­ຍົມ​ທີ່​ເຮັດ​ກັນທຸກ​ປີ ແຕ່​ມີ​ບາງ​ອັນ​ຄວນ​ລະ­ວັງ ມີ​ສະ­ຕິ ໃນ​ທ່າມກາງ​ບັນ­ຍາ­ກາດສະ­ຫຼອງ​ປີ​ໃໝ່​ນີ້ ເຊັ່ນ: ເຮົາ​ບໍ່​ຄວນລືມ​ເລື່ອງ​ສຸ­ຂະ­ພາບ ຄວນ​ໄປ​ກວດ​ເຊັກ​ສຸ­ຂະ­ພາບເບິ່ງ​ໃຫ້​ລະ­ອຽດ ເພາະ​ຖ້າ​ພົບ​ພະ­ຍາດ​ກໍ່​ຈະ​ໄດ້​ປິ່ນປົວ​ຮັກ­ສາ​ໄດ້ ສຸ­ຂະ­ພາບ​ເປັນ​ສິ່ງ​ສຳ­ຄັນ ບໍ່​ຄວນ​ປະໝາດ ເຫັນ​ວ່າ​ຕົນ​ຍັງ​ແຂງ­ແຮງ​ຈະ​ບໍ່​ມີ​ພະ­ຍາດ ເພາະ​ຄວາມ­ເຈັບ​ໄຂ້​ສາ­ມາດ​ເກີດ​ຂຶ້ນ​ໄດ້​ກັບ​ທຸກຄົນ.

ໃນ​ທ່າມ­ກາງ​ບັນ­ຍາ­ກາດ​ປີ​ໃໝ່​ ກໍ່​ຍັງ​ມີ​ເລື່ອງຂອງ​ການ​ກິນ​ດື່ມ​ຊຸມ​ແຊວ​ທີ່​ໜ້າ​ເປັນ​ຫ່ວງ ຄື: ເລື່ອງ​ເມົາ​ແລ້ວ​ຂັບ​ຂີ່​ລົດ ເຊິ່ງ​ມີ​ຄວາມ​ສ່ຽງ​ສູງເກີດ​ອຸ­ບັດ​ຕິ​ເຫດ ປະ­ເດັນ​ນີ້​ສຳ­ຄັນ​ສຳ­ລັບ​ທຸກ​ຄົນ ເພາະ​ສ່ວນ​ໃຫຍ່​ແລ້ວ​ກໍ່​ມີ​ຄວາມ​ຮູ້­ສຶກ​ວ່າ​ປີ​ໃໝ່ ຕ້ອງສະ­ຫຼອງ​ແບບ​ຈັດ​ໜັກ​ເຕັມ­ທີ່ ເບິ່ງ​ຄື​ພ້ອມ​ທີ່ຈະ​ເມົາ ເຊິ່ງ​ນັ້ນ​ກໍ່​ແມ່ນ​ສິດ​ສ່ວນ​ບຸກ­ຄົນ ແຕ່​ເລື່ອງທີ່​ຄວນ​ເອົາ­ໃຈ­ໃສ່​ມີ​ສະ­ຕິ​ຄື ຖ້າ​ມີ​ສະ­ຕິຮູ້​ວ່າ​ຕົນດື່ມ​ຫຼາຍ ຫຼື ເມົາ​ແລ້ວ ​ກໍ່​ບໍ່​ຄວນ​ຂັບ​ຂີ່​ລົດ ເພາະ​ປີຜ່ານ​ມາ​ອຸ­ບັດ​ຕິ​ເຫດ​ໃນ​ໄລ­ຍະ​ສະ­ຫຼອງ​ປີ​ໃໝ່​ແມ່ນມີ​ຫຼາຍ​ ຕາມ​ທີ່​ໄດ້​ຍິນ​ທ່ານ­ໝໍ​ເລົ່າ​ສູ່​ຟັງ ສ່ວນ​ໃຫຍ່ຄົນ​ເຈັບ​ມີ​ຕອນ​ກາງ­ຄືນ​ຈາກ​ອຸ­ບັດ​ຕິ​ເຫດ​ລົດ​ຕຳກັນ ຫຼື ວ່າ​ຄົນ​ເຈັບ​ເມົາແຮງ​ຂີ່​ລົດ​ຕຳ​ເສົາ​ໄຟ­ຟ້າ​ກໍ່​ມີ ພ້ອມ​ນີ້​ຍັງ​ມີ​ປະ­ເພດ​ຄົນ​ເຈັບ­ເປັນ​ກຸ່ມ​ໄວ​ລຸ້ນ​ຄຶກ​ຄະ­ນອງ​ທີ່​ໄປ​ສະ­ຫຼອງ​ປີ​ໃໝ່​ ມີ​ການ​ດື່ມ​ເຫຼົ້າ​ຊຸມແຊວ​ກັນ​ແລ້ວ​ຂີ່​ລົດ​ກັບ​ບ້ານ ກໍ­ລະ­ນີ​ນີ້ ພໍ່​ແມ່​ຜູ້ປົກ­ຄອງ​ຄວນ​ຕັກ­ເຕືອນ​ໃຫ້​ລູກ​ຫຼານ​ມີ​ສະ­ຕິ​ຮູ້ ­ຈັກວ່າ​ອັນ​ໃດ​ເໝາະສົມ ຄວນ​ເຮັດ ແລະ ບໍ່​ຄວນ​ເຮັດ.

ໃນ​ປີ​ໃໝ່​ສາ­ກົນ​ນີ້ ອີກ​ອັນ​ໜຶ່ງ​ທີ່​ຫຼາຍ​ຄົນ​ຄວນເບິ່ງ​ຄືນ ມີ​ສະ­ຕິ​ນຳ​ກັນ​ຄື​ເລື່ອງ​ຂອງ​ການ​ເປີດເຄື່ອງ​ສຽງ​ທີ່​ສົ່ງ​ສຽງ​ດັງ​ໄປຫຼາຍ​ຫຼັງ­ຄາ​ເຮືອນ ຄວນ​ຄິດ​ວ່າ​ມັນ​ເໝາະ​ສົມ​ພຽງ​ໃດ? ແລະ ຕ້ອງຄິດ​ເຫັນ­ໃຈ​ຄົນ​ອ້ອມ​ຂ້າງ ເພາະ​ໃນ​ເວ­ລາ​ຕົນ​ເອງພາ­ກັນ​ມ່ວນ ແຕ່​ສຽງ​ເພງ​ດັງ​ເກີນ​ຂອບ​ເຂດ ​ຈົນເຮັດ​ໃຫ້​ຄົນ​ໃກ້​ເຮືອນ­ນອນ​ໄດ້​ຍາກ ນີ້​ກໍ່​ຄວນ​ຄິດໃສ່­ໃຈ ເຊິ່ງ​ບໍ່​ຄວນ​ຄິດ​ວ່າເຮືອນ​ໃຜ​ເຮືອນ​ມັນ ຢາກເຮັດ​ແນວ­ໃດ​ກໍ່​ເຮັດ? ແນ່­ນອນ​ການ­ຈັດ­ຕັ້ງ​ຂັ້ນບ້ານກໍ່​ຄວນ​ເອົາ­ໃຈ­ໃສ່​ຄື​ກັນ ເພາະ​ມັນ​ເປັນ​ໜ້າ­ທີ່ເບິ່ງ­ແຍງ​ສຸກ​ທຸກ​ຂອງ​ລູກ­ບ້ານ.

ປີ​ໃໝ່ 2017 ນີ້ ມັນ​ເປັນ​ພຽງ​ການ​ເວ­ລາ​ທີ່​ມັນໝູນ​ເຮັດ​ໜ້າ­ທີ່​ຂອງ​ມັນ ເມື່ອ​ຄົບ 12 ເດືອນກໍ່​ເປັນປີ​ໜຶ່ງ ສິ່ງ​ສຳ­ຄັນ​ຄົນ​ເຮົາຄວນ​ທົບ​ທວນ​ວ່າ: ປີ​ໜຶ່ງຜ່ານ​ໄປ​ເຮົາ​ໄດ້​ເຮັດ​ຫຍັງ​ແນ່​ແກ່​ຊີ­ວິດ ແລະ ຄອບຄົວ ທົບ​ທວນ​ເບິ່ງ​ພຶດ­ຕິ​ກຳ ແລະ ນິ­ໄສ​ວ່າ​ມີອັນໃດ​ຄວນ​ປັບ­ປຸງ​ປ່ຽນ­ແປງ ຢ່າ​ລືມ​ວ່າ­ການ​ເວ­ລາ​ບໍ່ເຄີຍ​ຄອຍ​ຖ້າ​ໃຜ ການ​ເວ­ລາ​ເປັນ​ສິ່ງ​ມີ­ຄ່າ​ທີ່​ບໍ່ອາດ​ສາ­ມາດ​ຊື້​ໃຫ້​ມັນຫວນ​ກັບ​ຄືນ​ໄດ້ ແລະ ຊີ­ວິດກະ​ບໍ່​ແມ່ນ​ຂອງ​ຫຼິ້ນ ຫຼື ເຄື່ອງ​ທົດ​ລອງ ກ່ອນ​ຈະຕັດ­ສິນ​ໃຈ​ເຮັດ​ສິ່ງ​ໃດ​ກໍ່​ຄວນ​ຄິດ​ໃຫ້​ຄັກ​ຖີ່ຖ້ວນ ເພື່ອ​ຈະ​ບໍ່​ເສຍ​ໃຈ​ພາຍ­ຫຼັງ ຊີ­ວິດ​ທີ່​ກ້າວ­ໜ້າ​ນັ້ນ ຍ່ອມ​ເປັນ​ຊີ­ວິດ​ທີ່​ຮູ້­ຈັກ​ປັບ­ປຸງ​ຕົນ​ເອງ ແລະ ຮູ້­ຈັກຍອມ­ຮັບ​ຄວາມຈິງ ຮູ້­ຈັກ​ກຳ­ລັງ​ຄວາມ​ສາ­ມາດຂອງ​ຕົນ​ເອງ ໂດຍ​ສະ­ເພາະການ​ໃຊ້​ຈ່າຍ​ຖ້າ​ຟຸມເຟືອຍ ຫຼື ໃຊ້​ຈ່າຍ​ເກີນ​ໂຕ ກໍ່​ອາດ​ເຮັດ​ໃຫ້ເປັນ​ທຸກພາຍ­ຫຼັງ​ໄດ້ ປີ​ໃໝ່​ສາ­ກົນ ຂໍ​ໃຫ້​ທຸກ​ທ່ານ​ມີ​ຄວາມສຸກ​ສົມ​ຫວັງ​ກັນ​ທຸກ​ຄົນ!.

ຂ່າວທີ່ກ່ຽວຂ້ອງ