ບ່ອນ​ຝາກ​ລົດ ບັນ­ຫາ​ຊຳ​ເຮື້ອ - ໂດຍ : ດັ້ນ​ກີບ​ເມກ

705 30 ທ.ວ. 2016 ນານາສາລະ

ຕາມ​ຫາງສຽງ​ສັງ­ຄົມ​ມັກໄດ້​ຍິນ​ເປັນ​ປະຈຳ​ວ່າ: ການສັນ­ຈອນ​ໄປ​ມາ​ແອ​ອັດ​ຕິດ​ຂັດ ເພາະ​ຖະ­ໜົນ​ແຄບເຂົ້າ​ ຍ້ອນ​ມີ​ການຝາກ​ລົດ​ແຄມ​ທາງ ເຊິ່ງ​ຜູ້​ຂຽນໄດ້​ອ່ານ­ໜັງ­ສື​ພິມ​ປະ­ເທດ​ລາວ ລົງ​ວັນ​ທີ 19/12/2016 ໜ້າ​ໜຶ່ງ ຕັ້ງ​ຫົວ­ຂໍ້​ວ່າ: ເຮັດ​ບ່ອນຝາກ​ລົດເກັບ​ເງິນ​ຕາມ​ສະ­ຖານ­ທີ່​ສາ­ທາ­ລະ­ນະ ​ເໝາະ​ສົມຫຼືບໍ່? ຫົວ­ຂໍ້​ຂ່າວ​ນີ້​ຖື​ໄດ້​ວ່າສະ­ທ້ອນ​ປະ­ເດັນ​ບັນຫາ​ທີ່​ສັງ­ຄົມ​ສ່ວນ​ໃຫຍ່​ເຈິ​ບັນ­ຫາ​ນີ້​ຄື​ກັນ​ໃນ​ການຂັບ​ຂີ່​ລົດ​ຜ່ານ​ໄປ​ມາ ເນື້ອ​ໃນ​ຂ່າວ​ສ່ວນ​ໜຶ່ງ​ເນັ້ນວ່າ: ສະ­ຖານ­ທີ່​ຝາກ​ລົດ­ຈັກ-ລົດ​ໃຫຍ່ມີ​ຢ່າງ​ຫຼວງຫຼາຍ​ໃນ​ນະ­ຄອນ­ຫຼວງ​ວຽງ​ຈັນ ແຕ່​ບ່ອນ​ທີ່​ສັງ­ຄົມວິ­ພາກ​ວິ­ຈານ​ຫຼາຍ​ກວ່າ​ໝູ່​ແມ່ນ​ການ​ເອົາ​ສະຖານ​ທີ່ສາ­ທາ­ລະ­ນະ ຫຼື ແຄມ​ຖະ­ໜົນ​ຫົນ­ທາງ​ເປັນບ່ອນ​ຝາກ​ລົດ ເພາະ​ສ້າງ​ຄວາມ​ສັບ­ສົນ ແລະ ການ​ສັນ­ຈອນ​ແອ​ອັດ ຂະ­ນະ​ທີ່ບ່ອນ​ສະ­ຫງວນ​ສຳລັບ​ຝາກ​ລົດ ຜັດ​ສວຍ­ໂອ­ກາດ​ໃຫ້​ມີ​ການ​ຕັ້ງ​ຮ້ານຂາຍ­ເຄື່ອງ​ນ້ອຍ​ໃຫຍ່ ໂດຍ​ບໍ່​ຮູ້​ວ່າ​ລາຍ​ຮັບ​ຈາກການ​ບໍ­ລິ­ການ​ເຫຼົ່າ​ນີ້​ແມ່ນ​ພາກ­ສ່ວນ​ໃດ​ຮັບ​ຜິດຊອບ?.

ບັນ­ຫາ​ຝາກ​ລົດ​ນີ້ ມີ​ມາ​ຍາວ​ນານ ແລະ ເບິ່ງຄື​ວ່າ​ມັນ​ກາຍ­ເປັນ​ບັນ­ຫາ​ຊຳ​ເຮື້ອ​ມາ​ດົນ ເຊັ່ນ: ຝາກ​ເກັບ​ເງິນ​ໃຫ້​ປີ້ ແຕ່​ບໍ່ຮັບ­ຜິດ­ຊອບ​ຖ້າ​ລົດ​ເສຍ ຫຼື ໃນ​ງານ​ບຸນ​ສຳ­ຄັນ​ຍັງ​ມີ​ພວກ​ສວຍ­ໂອ­ກາດຂາຍ​ປີ້​ເກີນ​ກຳ­ນົດ​ໄວ້​ໃນ​ລະ­ບຽບ ແຕ່​ເຮັດ​ຫຍັງ​ບໍ່ໄດ້​ ປາ­ກົດ​ມີ​ທຸກໆ​ປີ ເຊິ່ງ​ມັນ​ກາຍ­ເປັນ​ກະ­ແສ​ຈົ່ມ​ວິພາກ​ວິ­ຈານ​ຢາກ​ໃຫ້​ໜ່ວຍ​ງານ​ກ່ຽວ­ຂ້ອງ​ແກ້​ໄຂບັນ­ຫາ​ນີ້​ຢ່າງ​ເດັດ­ຂາດ ເພື່ອ​ຄວາມ​ສະ­ບາຍ​ໃຈຂອງ​ທຸກ​ຝ່າຍ ຢູ່​ໃນ​ຂ່າວ​ດັ່ງ­ກ່າວ​ຍັງ​ໄດ້​ສຳ­ພາດຫຼາຍ​ຄົນ​ທີ່​ຮັບ​ຝາກ​ລົດ ໂດຍ​ສະ­ເພາະເຂດຕະ­ຫຼາດຂົວ​ດິນ​ຂ້າງ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ຖືວ່າ​ໃຜ​ຜ່ານ​ມາ​ທາງ​ນີ້ ສ່ວນ​ໃຫຍ່​ກໍ່​ພົບ​ກັບ​ບັນ­ຫາຕິດ​ຂັດ ການ​ໄປ​ມາ​ກະ​ຕ້ອງ​ໄດ້​ທຳ​ໃຈ ເພາະ​ມີ​ລົດແອ​ອັດ​ຫຼາຍ ທັງ​ຜູ້​ຜ່ານ ແລະ ຜູ້​ເຂົ້າ​ຈອດ ມີ​ຜູ້ໃຫ້​ສຳ­ພາດ​ວ່າ ເປັນ­ຄວາມ​ຮັບ­ຜິດ­ຊອບຂອງ ອພບ ມີ​ຈຳ­ນວນ 8 ລັອກ ບາງ​ຄົນ​ບໍ່​ເຂົ້າ­ໃຈ​ກໍ່​ຈອດ​ລົດ​ຊະ­ຊາຍ ເຮັດ​ໃຫ້​ເກີດ​ມີ​ບັນ­ຫາ​ລົດ​ຕິດ.

ບັນ­ຫາ​ຂ້າງ​ເທິງ​ສັງ­ເກດ​ໄດ້​ວ່າ: ໃນ​ນະ­ຄອນຫຼວງ​ວຽງ​ຈັນ ມີ​ຫຼາຍ​ບ່ອນ​ສະ­ຫງວນ​ໄວ້​ເຮັດ​ບ່ອນຈອດ​ລົດໂດຍ​ສະ­ເພາະ ແຕ່​ພັດ​ອະ­ນຸ­ຍາດ​ໃຫ້​ຄົນມາ​ຂາຍ­ເຄື່ອງ​ແທນ ແລ້ວ​ເອົາ​ສະ­ຖານ­ທີ່​ສາ​ທາລະ­ນະ ມາ​ເປັນ​ບ່ອນ​ຈອດ​ລົດ​ຕື່ມ ເຮັດ​ໃຫ້​ເກີດບັນຫາ​ການ​ສັນ­ຈອນ​ຕິດ​ຂັດ ຜູ້​ຂຽນ​ຄິດ​ຂຶ້ນ​ໄດ້​ທັນ­ທີເຖິງ​ບົດ​ຂຽນ​ຂອງ ສຈ ແສງ​ຄຳ ພິ­ນິດ ທີ່​ຂຽນເລື່ອງ​ການ​ພັດ­ທະ­ນາຕົວ​ເມືອງ​ໃຫ້​ຍືນ​ຍົງ ລົງ​ໃນວາ­ລະ­ສານ Line ສະ­ບັບ​ເດືອນ 11/2016 ທີ່​ເວົ້າວ່າ: ການ​ພັດ­ທະ­ນາ​ແບບ​ຍືນ​ຍົງ ແມ່ນ​ການພັດທະ​ນາ​ສະ­ໜອງ​ຕອບ​ຄວາມ​ຮຽກ­ຮ້ອງ​ຕ້ອງ­ການຂອງ​ສັງ­ຄົມ​ໃນ​ປັດ­ຈຸ­ບັນ ແຕ່​ບໍ່​ໃຫ້​ເປັນ​ອຸ­ປະ­ສັກ ຫຼື ເປັນ​ສິ່ງ​ກີດ­ຂວາງຕໍ່​ການ​ພັດ­ທະ­ນາ​ໃນ​ອະ­ນາ­ຄົດ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ສັງ­ຄົມໃນ​ເວ­ລາ​ນັ້ນ ! ມັນ​ຮຽກ­ຮ້ອງ​ໃຫ້​ມີ​ວິ­ໄສທັດ​ຍາວ​ໄກ ເພື່ອ​ຄາດ​ຄະ­ເນ​ວິ­ວັດ­ທະ­ນາ​ການ ແລະ ຄວາມຕ້ອງ­ການ​ຂອງ​ສັງ­ຄົມ​ໃນ​ອະ­ນາ­ຄົດ ! ເພິ່ນ​ເນັ້ນຕື່ມ​ວ່າ: ການພັດ­ທະ­ນາ​ຕົວ​ເມືອງ​ໃຫ້​ຍືນ​ຍົງ ຕ້ອງຕິດ​ພັນ​ກັບ​ການ​ພັດ­ທະ­ນາ ຫຼື ການ​ວາງ​ແຜນ​ແກ້ໄຂ​ບັນ­ຫາ​ສັນ­ຈອນ​ໃນ​ຕົວ​ເມືອງ​ໃຫ້ສະ­ດວກ.

ເຫັນ​ວ່າ​ບັນ­ຫາ​ຊຳ​ເຮື້ອ​ເລື່ອງ​ການ​ຈອດ​ລົດ​ມີມາ​ດົນ ແຕ່​ຍັງ​ຂາດ​ການ​ແກ້​ໄຂ ​ບໍ່​ເດັດ­ຂາດ ເຊິ່ງມັນ​ຮຽກ­ຮ້ອງ​ໃຫ້​ພາກ­ສ່ວນກ່ຽວ­ຂ້ອງ​ໄດ້​ວາງ​ແຜນ​ລະ­ອຽດ​ຕໍ່​ການ​ພັດ­ທະ­ນາ​ຕົວ​ເມືອງ ແລະ ໄດ້​ເອົາໃຈ​ໃສ່​ເບິ່ງ​ຄືນ​ບ່ອນ​ຝາກ​ລົດ ຖ້າ​ບໍ່​ຖືກ­ຕ້ອງ​ຕາມລະ­ບຽບ​ການ​ ກໍ່​ບໍ່​ຄວນ​ຖື​ເບົາ ເພາະ​ສັງ­ຄົມ​ສ່ວນໃຫຍ່​ໄດ້​ຮັບ​ຜົນ​ກະ­ທົບ​ໃນ​ການ​ສັນ­ຈອນ​ ລວມ​ເຖິງໄຫຼ່​ຫົນ­ທາງ​ ບ່ອນ​ທາງ​ຍ່າງ ​ກໍ່​ຍັງ​ມີ​ຮ້ານຄ້າ­ຂາຍ ຕັ້ງ​ໂຕະ​ຕັ່ງ​ຕັນ​ທາງ​ຍ່າງ ເຮັດ​ໃຫ້​ຄົນຍ່າງ​ທາງ ລົງ​ມາ​ຍ່າງ​ເທິງ​ຖະ­ໜົນ​ນຳ​ອີກ ຫວັງວ່າ​ບັນ­ຫາ​ແບບ​ທີ່​ວ່າ​ມາ​ນີ້​ ຈະ​ໝົດ​ສິ້ນ​ໄປ​ນຳ​ປີ​ເກົ່ານໍ? ຂໍ​ສະ­ເໜີ​ເປັນ​ການ​ແລກ­ປ່ຽນ.

ຂ່າວທີ່ກ່ຽວຂ້ອງ