ປີ 2017 ຈະ​ເປັນ​ປີ​ບູ​ລິ​ມະ​ສິດ ອັນ​ດັບ​ຕົ້ນ​ໃຫ້​ແກ່​ສັນ­ຕິ­ພາບ - ໂດຍ : ທິດ​ດີ

624 16 ມ.ກ. 2017 ນານາສາລະ

ປີ 2016 ຫາ­ກໍ່​ຜ່ານ​ພົ້ນໄປ ໂລກ​ຂອງ​ພວກ​ເຮົາ​ແມ່ນ​ປະ­ສົບ​ກັບ​ຄວາມຫຍຸ້ງ­ຍາກ​ສັບ­ສົນ ແລະ ການ​ທ້າ​ທາຍ​ຫຼາຍ​ຢ່າງຈາກ​ການ​ກໍ່​ການ​ຮ້າຍ ບັນ­ຫາ​ຊາວ​ອົບ​ພະ​ຍົບ ການ​ແຍກ​ຕົວ​ຂອງ​ອັງ­ກິດ​ອອກ​ຈາກ​ກຸ່ມ​ອີ​ຢູ ການເລືອກ​ຕັ້ງ​ທີ່​ກໍ່​ຄວາມແຕກ​ແຍກ​ຢູ່​ອາ​ເມ​ຣິ​ກາ​ ສົງຄາມ​ຢູ່​ຊີ​ຣີ ບັນ­ຫາ​ອາ­ວຸດນິວ​ເຄຼຍ​ຢູ່​ແຫຼມ​ເກົາ­ຫຼີ ຕະ­ຫຼອດ​ຮອດ​ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ກໍ່​ຄືສິ່ງ­ແວ­ດລ້ອມ​ຂອງ​ໂລກ ທັງ​ໝົດ​ນັ້ນ​ຄື​ສິ່ງ​ທ້າ​ທາຍ​ຕໍ່​ມວນ​ມະ­ນຸດ​ໃນໂລກ​ຂອງ​ພວກ​ເຮົາ.

ຢືນ​ຕໍ່­ໜ້າ​ສະ­ພາບ​ການ​ດັ່ງ­ກ່າວ ໃນ​ຖະ­ແຫຼງການ​ຕ້ອນ­ຮັບ​ປີ​ໃໝ່ 2017  ທ່ານ ອັນ­ໂຕ​ນີ​ໂອ ກູ​ເຕີເຣ​ສ ເລ­ຂາ­ທິ­ການ​ໃຫຍ່ ສປຊ ໄດ້​ປະ­ກາດວ່າ: ປີ 2017 ຈະ​ເປັນ​ປີ​ບູ​ລິ​ມະ​ສິດ​ອັນ​ດັບ​ຕົ້ນ​ໃຫ້ແກ່​ສັນ­ຕິ­ພາບ ແລະ ໄດ້​ເນັ້ນ​ວ່າ: ປະ­ຊາ­ຊົນ​ທົ່ວໂລກ​ຈົ່ງ​ຕັດ­ສິນ​ໃຈ​ຮ່ວມ​ກັນ ​ຈັດ​ເອົາ​ສັນ­ຕິ­ພາບ​ໄວ້ຢູ່​ໃນ​ອັນ​ດັບ​ໜຶ່ງ ເຮັດ​ໃຫ້​ປີ 2017 ກາຍ­ເປັນ​ປີແຫ່ງ​ສັນ­ຕິ­ພາບ ປີ 2016 ຜ່ານ​ໄປ ພວກ​ເຮົາ​ໄດ້ເຫັນ​ປະ­ຈັກ​ຕາ​ຄວາມ​ແຕກ​ຕ່າງ​ກັນ​ຢ່າງ​ໃຫຍ່​ຫຼວງໃນ​ການ​ແກ້​ໄຂ​ການ​ປະ​ທະ​ກັນ ແລະ ປະ­ຊາ​ຄົມໂລກ ໄດ້​ຂາດ​ພື້ນ­ຖານ​ການ​ທູດ​ເພື່ອ​ສັນ­ຕິ­ພາບ ສະນັ້ນ ປີ 2017 ຈະ​ແມ່ນ​ປີ​ທີ່​ປະ­ຊາ­ຊົນ​ທຸກ​ຄົນ ລັດຖະ​ບານ ກໍ່​ຄື​ບັນ­ດາຜູ້­ນຳ ​ຕ້ອງ​ມີ​ຄວາມ​ພະ­ຍາ­ຍາມເພື່ອ​ພ້ອມ​ກັນ​ຜ່ານ​ຜ່າ​ສິ່ງ​ທີ່​ແຕກ​ຕ່າງ​ກັນ ໃນ​ບົດທີ່​ພາດ​ຫົວ­ຂໍ້: “ປີ 2017 ຄວາມ​ຫວັງຂອງ​ໂລກສັນ­ຕິ­ພາບ” ຂອງ​ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ ສະ­ບັບ​ອອນ​ລາຍ ວັນ​ທີ 3 ມັງ­ກອນ 2017 ມີບາງ​ຈຸດ​ເນັ້ນວ່າ:

“...ພາຍ​ໃຕ້​ບັນ­ດາ​ສາຍ­ຕາ​ຂອງ​ນັກ​ສັງ­ເກດການ​ທີ່​ໜ້າ​ປະ​ເອີບ​ໃຈ ໂລກໃນ​ປີ 2017 ຈະ​ໄດ້ເຫັນ​ປະ­ຈັກ​ຕາ​ທ່າອຽງ​ຮ່ວມມື​ຫຼາຍ​ກວ່າ ​ລະ­ຫວ່າງປະ­ເທດ​ຕ່າງໆ ເພື່ອ​ການ​ພັດ­ທະ­ນາ ແລະ ສັນ­ຕິພາບ​ລວມ​ຂອງ​ພາກ​ພື້ນ ແລະ ຢູ່​ໃນ​ໂລກ ໃນ​ຈຳນວນ​ນັ້ນ​ສາຍ​ພົວ­ພັນ​ລະ­ຫວ່າງ​ບັນ­ດາ​ປະ­ເທດໃຫຍ່​ຖື​ວ່າ​ແມ່ນ​ສຳ­ຄັນ ຍ້ອນ​ມັນ​ໄດ້​ສ້າງ​ຄວາມເປັນ​ລະ­ບຽບ​ຮຽບ​ຮ້ອຍໃນ​ການ​ພົວ­ພັນ​ສາ­ກົນ 175 ປະ­ເທດ​ພາ­ຄີ ສປຊ ກໍ່​ພ້ອມ​ກັນ​ລົງ​ນາມ​ໃນ​ຂໍ້​ຕົກລົງ ປາ​ຣີ ກ່ຽວ​ກັບ​ການ​ປ່ຽນ­ແປງ​ຂອງ​ດິນຟ້າ​ອາກາດ ຫຼັງ​ຈາກ​ນັ້ນ ອາ​ເມ​ຣິ​ກາ ຈີນ ອີ​ຢູ ແລະ ປະ­ເທດ​ອື່ນໆ​ກໍ່​ໄດ້​ໃຫ້ສັດ­ຕະ­ຍາ­ບັນ​ແກ່​ຂໍ້​ຕົກ­ລົງ​ນີ້​ເປັນທາງ​ການ ເປີດ​ບັນ­ດາ​ຄວາມ​ຫວັງ​ປີ 2017 ແລະ ຊຸມ​ປີ​ຕໍ່​ໄປ​ໃນ​ການ​ປົກ​ປັກ​ຮັກ­ສາ​ສະ­ພາບ​ແວດລ້ອມ ປົກ​ປ້ອງ​ໜ່ວຍ​ໂລກ ປີ 2017 ແມ່ນ​ປີ​ຮັບຕຳ­ແໜ່ງ​ຂອງ​ທ່ານ Antonio ເລ­ຂາ­ທິ­ການ​ໃຫຍ່ ສປຊ ຄົນ​ໃໝ່ ດ້ວຍ​ຄວາມ​ຊຳ­ນານ​ໃນ​ການ​ເປັນຫົວ­ໜ້າ​ອົງ­ການ​ຊ່ວຍ​ຊາວ​ອົບ​ພະ​ຍົບ ພ້ອມ​ທັງ​ຄຸນທາດ​ດ້ານ​ການ​ທູດ​ມາ​ເປັນ​ເວ­ລາ​ຫຼາຍ​ປີ ໃນ​ຖາ­ນະຕຳ­ແໜ່ງ​ໃໝ່ ປະ­ຊາຄົມ​ສາ­ກົນ​ໄດ້​ຕັ້ງ​ຄວາມ​ເຊື່ອໝັ້ນ​ວ່າ ທ່ານ​ຈະ​ແມ່ນ​ຄົນ​ກາງ​ໄກ່​ເກ່ຍ​ບັນ­ດາ​ບັນຫາ​ເຄັ່ງ­ຮ້ອນ​ຂອງ​ໂລກ ແກ້​ໄຂ​ບັນ­ຫາ​ບັນ­ດາ​ຊາວອົບ​ພະ​ຍົບ​ຢ່າງ​ຄັກ­ແນ່ ແລະ ຄ່ອຍໆ​ສິ້ນ​ສຸດ​ບັນດາ​ສະ­ຖານ­ທີ່​ເກີດ​ການ​ປະ​ທະ​ກັນ​ໃນ​ທົ່ວ​ໂລກ ການ​ພົວ­ພັນ​ທາງການ​ທູດ​ໃນ​ທ້າຍ​ປີ 2016 ໄດ້​ມີບັນ­ດາ​ການ​ກະ­ທຳ​ທີ່​ສະ­ແດງ​ໃຫ້​ເຫັນ​ວ່າ ­ການ​ພົວພັນ ຣັດ​ເຊຍ-ອາ​ເມ​ຣິ​ກາ ພາຍ​ໃຕ້​ອາ­ຍຸ​ການ​ຂອງທ່ານ​ປະ­ທາ­ນາ­ທິ­ບໍ­ດີ Donald Trump ຈະ​ດີ​ຂຶ້ນ ແລະ ຄ່ອຍໆ​ຫຼຸດ­ຜ່ອນ​ຄວາມ​ເຄັ່ງ​ຕຶງ ການ​ພົວ­ພັນລະ­ຫວ່າງ ຈີນ ແລະ ຟິ​ລິບ​ປິນ ພວມຫຍັບ​ມໍ່​ເຂົ້າ­ກັນ ໂດຍ​ບໍ່​ຫົວ­ຊາ​ຕໍ່​ບັນ­ດາ​ການ​ປະທະ​ກັນ​ລະ­ຫວ່າງ 2 ປະ­ເທດ​ຢູ່​ທະ­ເລ​ຕາ­ເວັນ​ອອກ ຂໍ້​ຕົກ­ລົງ​ຢຸດ​ຍິງ​ຢູ່ຊີ​ຣີ ສະ­ບັບ​ໜຶ່ງ ໂດຍຣັດ​ເຊຍ ແລະ ຕວກ​ກີ ເປັນ​ຄົນກາງ​ໄກ່​ເກ່ຍ​ ກໍ່​ຖືກ​ຈັດ​ຕັ້ງ​ປະ­ຕິ­ບັດ.

ສັນ­ຍານ​ທັງ​ໝົດ​ເຫຼົ່າ​ນີ້ ພ້ອມ​ກັບ​ບັນ­ດາ​ຄຳ​ໝັ້ນສັນ­ຍາ​ຈາກ​ເລ­ຂາ­ທິ­ການ​ໃຫຍ່ ສປຊ ໄດ້​ນຳ​ມາເຊິ່ງ​ຄວາມ​ໄວ້​ເນື້ອ​ເຊື່ອໃຈ​ສ່ວນ​ໃດ​ສ່ວນ​ໜຶ່ງ ​ໃນ​ປີ 2017 ໂລກ​ພ້ອມ​ກັນ​ຕັ້ງ​ຄວາມ​ຫວັງ​ຕໍ່​ປີ 2017 ຈະມີ​ບັນ­ດາ​ສິ່ງ​ທີ່​ສວຍ​ງາມ ສຽງ​ປືນ ແລະ ສຽງ​ລະເບີດ​ຈະ​ຄ່ອຍໆ​ຫຼຸດ​ລົງ​ຢູ່​ບັນ­ດາ​ສະ­ຖານ­ທີ່​ພວມ​ມີການ​ປະ​ທະ​ກັນ​ໃນ​ໂລກ ສາ­ມັນ​ຊົນ​ຈະ​ບໍ່​ຖືກ​ນອງເລືອດ ແລະ ສູນ​ເສຍ​ນ້ຳ​ຕາ​ອີກ.

ທ່ານ ອັນ­ໂຕ​ນີ​ໂກ ກູ​ເຕີ​ເຣ​ສ ເປັນ​ເລ­ຂາ­ທິ­ການໃຫຍ່ ສປຊ ຄົນ­ທີ 9 ໂດຍ​ໄດ້​ຮັບ​ການ​ແຕ່ງ­ຕັ້ງຈາກ​ສະ­ມັດ­ຊາ​ໃຫຍ່ ສປຊ ໃນ​ເດືອນ​ຕຸ­ລາ 2016 ມີ​ຜູ້​ແທນ​ຈາກ 193 ປະ­ເທດ​ເຂົ້າ​ຮ່ວມ ແລະ ທ່ານໄດ້​ສາ­ບານ​ກ່າວ​ຮັບ​ຕຳ­ແໜ່ງ​ໃນ​ວັນ​ທີ 12 ທັນ­ວາ 2016 ແລະ ເລີ່ມ​ມີ​ອຳ­ນາດ​ບໍ­ລິ­ຫານ​ແຕ່​ວັນ​ທີ 1 ມັງ­ກອນ 2017.

ຂ່າວທີ່ກ່ຽວຂ້ອງ