ບັນ­ນາ­ທິ­ການ ແລະ ສື່​ມວນ​ຊົນ - ໂດຍ : ດັ້ນ​ກີບ​ເມກ

1,335 25 ມ.ກ. 2017 ນານາສາລະ

ວຽກ​ບັນ​ນາທິ​ການ ແລະ ສື່ມວນ​ຊົນ ແມ່ນວຽກ​ທີ່​ເປັນ​ສະໜາມ​ຮົບ​ທາງ​ປັນ­ຍາ ແລະ ກໍ່​ແມ່ນ​ວຽກ​ງານ​ທີ່ໃຊ້​ຄວາມ​ຮູກວດ­ກາ ເອົາ­ໃຈ­ໃສ່​ສື່​ທີ່​ຕົນ​ຮັບ​ຜິດຊອບ​ຢູ່ ເພາະ​ບໍ່​ດົນ​ມາ​ນີ້ ຂປລ ໄດ້​ລາຍ​ງານ​ຂ່າວວັນ​ທີ 11 ມັງ­ກອນ 2017 ຢູ່​ຫໍ​ປະ­ຊຸມ​ແຫ່ງ​ຊາດ ໄດ້ຈັດ​ກອງ​ປະ­ຊຸມ​ແລກ­ປ່ຽນ​ຄຳ​ຄິດ​ເຫັນ​ລະ­ຫວ່າງ ໂຄ­ສົກ​ລັດ­ຖະ­ບານກັບ​ຄະ­ນະ​ສື່​ຕ່າງໆ ເພື່ອ​ປຶກ­ສາ​ຫາ­ລື​ກ່ຽວ​ກັບ​ການ​ໂຄ­ສະ­ນາເຜີຍ­ແຜ່​ຜົນ­ງານແຫ່ງ​ການ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ.

ຂປລ ໄດ້​ລາຍ​ງານ​ວ່າ ທ່ານ ຈະ­ເລີນ ເຢຍປາວ​ເຮີ ຍັງ​ເນັ້ນ​ໃຫ້​ບັນ­ດາ​ຄະ­ນະ​ນຳ​ສື່​ຕ່າງໆ​ເອົາໃຈ​ໃສ່​ບາງ​ບັນ­ຫາເປັນ­ຕົ້ນ​ແມ່ນໃຫ້​ຢຶດ​ໝັ້ນ​ການນຳ­ພາ-ຊີ້​ນຳ​ສື່​ຂອງ​ຕົນ​ເຄື່ອນ​ໄຫວ​ຕາມ​ກົດ­ໝາຍ ແລະ ນິ­ຕິ​ກຳວ່າ​ດ້ວຍ​ສື່​ມວນ​ຊົນ​ຂອງ​ລັດ ໃຫ້ເຂັ້ມ​ງວດ ແລະ ສັກ­ສິດ... ເມື່ອ​ເປັນ​ແນວ​ນັ້ນມັນ​ຈຶ່ງ​ຮຽກ­ຮ້ອງ​ໃຫ້​ບັນ­ນາ­ທິ­ການ​ສື່​ ຕ້ອງ​ໄດ້​ເຮັດວຽກ​ໜັກ​ຕື່ມ ຕາມ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ ມາດ­ຕາ 3 ຂໍ້ 3 ໄດ້​ເວົ້າ​ເຖິງ​ບັນ­ນາ­ທິ­ການ​ວ່າ: ໝາຍ​ເຖິງ​ຜູ້​ກວດ­ແກ້ ກວດ​ຜ່ານ​ເນື້ອ​ໃນ ແລະ ຮູບແບບ​ຂອງ​ບົດ-ຂ່າວ ແລະ ລາຍ­ການ​ຂອງ​ສື່​ມວນຊົນ​ຕ່າງໆ... ແລະ ໃນ​ມາດ­ຕາ 35 ຍັງ​ເວົ້າ​ເຖິງສິດ ແລະ ໜ້າ­ທີ່​ຂອງຫົວ­ໜ້າ ແລະ ຮອງ​ຫົວ­ໜ້າຂອງ​ອົງ­ການ​ສື່​ມວນ​ຊົນ​ວ່າ: ຫົວ­ໜ້າ​ອົງ­ການ​ສື່ມວນ​ຊົນ​ເປັນ​ຜູ້​ຊີ້​ນຳ ແລະ ຄຸ້ມ​ຄອງ​ການ​ເຄື່ອນໄຫວ​ຂອງ​ອົງ­ການ​ສື່​ມວນ​ຊົນ​ຕົນ ມີ­ໜ້າ​ທີ່ ແລະ ສິດ​ພິ­ຈາ­ລະ­ນາອະ­ນຸ­ມັດ​ລົງ​ຂ່າວ-ບົດ​ໃນ​ສື່... ຮອງ​ຫົວ­ໜ້າ​ອົງ­ການ​ສື່ມວນ​ຊົນ​ມີ­ໜ້າ​ທີ່ ແລະ ສິດ ຊ່ວຍ​ຫົວ­ໜ້າ​ໃນ​ວຽກ​ງານ​ໃດ​ໜຶ່ງ ແລະ ຮັກ­ສາການ​ແທນ​ໃນ​ເວ­ລາ​ຫົວ­ໜ້າ​ບໍ່​ຢູ່​ຕາມ​ການມອບໝາຍ​ຂອງ​ຫົວ­ໜ້າ.

ຜູ້​ຂຽນ​ເຫັນ​ວ່າ​ເນື້ອ​ໃນ​ຂ່າວ​ທີ່​ທ່ານ​ໂຄ­ສົກ​ລັດຖະ​ບານ​ໄດ້​ຈັດ​ກອງ​ປະ­ຊຸມ​ແລກ­ປ່ຽນ​ກັບ​ຄະ­ນະ​ນຳສື່​ນັ້ນ​ ແມ່ນ​ເນັ້ນ​ໃຫ້​ສື່ມວນ​ຊົນ​ຕ້ອງ​ໄດ້​ເຮັດ​ວຽກ​ຈິງຈັງ ໜັກ​ແໜ້ນ ໂດຍ​ສະ­ເພາະຜູ້​ມີ­ໜ້າ​ທີ່​ກວດ­ແກ້ ແລະ ອະ­ນຸ­ມັດ ກໍ່​ຄືບັນ­ນາ­ທິ­ການ.

ໃນ​ເອ­ກະ­ສານ ​ຜູ້​ເຮັດ​ວຽກ​ບັນ­ນາ­ທິ­ການ​ໃນ​ສື່ສິ່ງ​ພິມ... ເຮັດ​ໜ້າ­ທີ່​ຫຍັງ? ຄົ້ນ­ຄວ້າ​ ຮຽບ​ຮຽງ ໂດຍທ່ານ ຄຳ​ວິ​ສັນ ແກ້ວສຸ­ວັນ ນັກ​ໜັງ­ສື­ພິມ​ອາວຸ​ໂສ ໄດ້​ເວົ້າ​ເຖິງ​ບັນ­ນາ­ທິ­ການ​ວ່າ: 1.ບັນ​ນາ​ທິການ​ຕ້ອງ​ເຊື່ອ​ໝັ້ນ​ຕໍ່​ຄວາມ​ຮູ້ຄວາມ​ສາ­ມາດຂອງຕົນ ຕ້ອງ​ມີ​ຄວາມ​ຮູ້​ຫຼາຍ​ຢ່າງ​ລື່ນ​ກາຍ​ຜູ້​ອື່ນ ມີ​ຄວາມ​ສາ­ມາດ​ໃນ​ການ​ຂຽນ... 2.ຕ້ອງ​ເປັນຄົນ​ພາ­ວະ​ວິ­ໄສ... 3.ບັນ­ນາ­ທິ­ການ​ຕ້ອງ​ຂຽນເກ່ງ ແລະ ກ້າວ​ໄປ​ເຖິງ​ຂັ້ນ​ຊ່ຽວ­ຊານ ອັນ​ນີ້​ບໍ່​ມີສອນ​ໃນ​ໂຮງ­ຮຽນ ມັນ​ຂຶ້ນ​ກັບ​ປະ­ສົບ​ການ​ໃນ​ພຶດຕິ​ກຳ​ຕົວຈິງ.

ໃນ​ເອ­ກະ­ສານ​ດັ່ງ­ກ່າວ ທ່ານ ຄຳ​ວິ​ສັນ ແກ້ວ​ສຸວັນ ຍັງ​ເນັ້ນ​ວ່າ: ບັນ­ນາ­ທິ­ການ​ແມ່ນຜູ້​ຮັບ​ຜິດຊອບ​ຕໍ່​ຄວາມ​ຜິດ­ພາດ​ທີ່​ເກີດຂຶ້ນ​ໃນ​ສື່​ທີ່​ຕົນ​ຮັບ​ຜິດຊອບ ໂດຍ​ສະ­ເພາະຜູ້​ເປັນ​ຫົວ­ໜ້າ​ຮັບ​ເຕັມ​ຮ້ອຍເປີ­ເຊັນ ການ​ບໍ­ລິ­ຫານ​ງານ​ຂອງ​ສຳ­ນັກ​ສື່ ທັງ​ພາກ ລັດ ແລະ ເອ­ກະ​ຊົນ ຜູ້​ເປັນ​ຫົວ­ໜ້າ​ຕ້ອງ​ບັນ­ຊາຢ່າງ​ເຂັ້ມ​ງວດ... ກ່ອນ​ຈະ​ເຂົ້າ​ໂຮງ­ພິມ ຫຼື ກະຈາຍ​ສຽງ ກະ­ຈາຍ​ພາບ ຫົວ­ໜ້າ​ບັນ­ນາ­ທິ­ການ ຕ້ອງ​ລົງ​ລາຍ​ເຊັນ​ກ່ອນ ເພາະ​ມັນ​ແມ່ນ​ຄວາມ​ຮັບຜິດ​ຊອບ​ຕໍ່­ໜ້າ​ກົດ­ໝາຍ ຕໍ່​ໜ້າ­ການ​ແຕ່ງ­ຕັ້ງ​ຈາກຜູ້ຄຸ້ມ​ຄອງ​ວຽກ​ງານ​ສື່​ມວນ​ຊົນ ດັ່ງ­ນັ້ນ ຜູ້​ທີ່​ມາ​ຢືນຢູ່​ໃນ​ຕຳ­ແໜ່ງ​ບັນ­ນາ­ທິ­ການ​ຈຶ່ງ​ບໍ່​ແມ່ນ​ຜູ້​ໃດ​ກໍ່ໄດ້... ຕ້ອງ​ແມ່ນ​ຜູ້​ມີ​ພອນສະ­ຫວັນ ມີ​ຄວາມ​ສາມາດ ມີ​ລະ­ດັບ​ຄວາມ​ຮູ້​ກວ້າງ­ຂວາງ ມີ​ປະ­ສົບການ​ວຽກ​ງານ​ຂີດ​ຂຽນ​ຫຼາຍ​ປີ ມີ​ຊື່​ສຽງ ແລະ ມີບົດ­ບາດ​ໃນ​ວົງ​ການ​ສື່​ມວນ​ຊົນ.

ທີ່​ຍົກ​ບັນ­ຫາ​ນີ້​ຂຶ້ນ​ມາ​ກໍ່​ເພາະ­ວ່າ ມີ​ບາງ­ເທື່ອ​ສື່ຂອງ​ພວກ​ເຮົາ​ກໍ່​ເກີດ​ຄວາມ​ບົກ​ຜ່ອງ​ໃນ​ດ້ານ​ເນື້ອໃນ​ບໍ່​ທັນ​ຊັດ​ເຈນ ຂໍ້​ມູນ​ບໍ່​ພຽງ­ພໍ ການ​ປະ­ກອບ​ຮູບພາບ​ບໍ່​ຖືກ­ຕ້ອງ​ເໝາະ​ສົມ... ຈຶ່ງ​ເປັນ​ເຫດ​ໃຫ້​ຜູ້ເສບ​ສື່​ຕັ້ງ​ບັນ­ຫາ​ວ່າ ໃຜ​ຮັບ­ຜິດ­ຊອບ ແລະ ແກ້ໄຂຢ່າງ?.

ສະ­ເໜີ​ເປັນ​ການ​ແລກ­ປ່ຽນ !.

ຂ່າວທີ່ກ່ຽວຂ້ອງ