ເປ​ຕັງ ນວ ຕັ້ງ​ເປົ້າ 2 ຫຼຽນ​ຄຳ ນົກ­ກົກ​ຄຳ ເກມ

676 27 ມ.ກ. 2017 ວົງຈອນກີລາ
ເປ​ຕັງ ນວ ຕັ້ງ​ເປົ້າ 2 ຫຼຽນ​ຄຳ ນົກ­ກົກ​ຄຳ ເກມ

ທີມ​ນັກ­ກີ­ລາ​ເປ​ຕັງ​ນະ­ຄອນ­ຫຼວງ​ວຽງ​ຈັນ (ນວ) ມີ​ຄວາມ​ພ້ອມ​ເກືອບ​ເຕັມ​ຮ້ອຍ​ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ມັດ­ທະ­ຍົມ​ສຶກ​ສາ​ທົ່ວ​ປະ­ເທດ ຄັ້ງ​ທີ 6 ທີ່​ແຂວງ​ບໍ​ລິ​ຄຳ​ໄຊ ເປັນ​ເຈົ້າ­ພາບ (ນົກ­ກົກ​ຄຳ ເກມ) ເຊິ່ງ​ໄດ້​ຈະ​ເປີດ​ຂຶ້ນ​ຢ່າງ​ເປັນ​ທາງ​ການ ໃນ​ວັນ​ທີ 1-9 ກຸມ­ພາ 2017 ທີ່​ຈະ​ມາ​ເຖິງ​ນີ້ ພ້ອມ​ຈະ​ສູ້​ຊົນ​ຮັກ­ສາ​ມູນ­ເຊື້ອ​ທີ່​ເຄີຍ​ເຮັດ​ໄດ້ 2 ຫຼຽນ​ຄຳ​ຄັ້ງ​ຜ່ານ​ມາ.

ທ່ານ ສຸ­ບັນ ລັດ­ຕະ­ນະ ຫົວ­ໜ້າ​ຄູ​ເຝິກ​ກີ­ລາ​ເປ​ຕັງ ນວ ໃຫ້​ສຳ­ພາດ​ໃນ​ວັນ​ທີ 24 ມັງ­ກອນ 2017 ຜ່ານ​ມາ​ທີ່​ສະ­ໜາມ​ເຝິກ­ຊ້ອມ​ບຶງ​ຂະ​ຫຍອງ​ວ່າ: ສຳ­ລັບ​ກີ­ລາ​ເປ​ຕັງ ພວກ​ເຮົາ​ແມ່ນ​ໄດ້​ເກັບ​ໂຕ​ເຝິກ­ຊ້ອມ​ມາ​ຕັ້ງ­ແຕ່​ກາງ​ເດືອນ​ທັນ­ວາ 2016 ແລະ ໄດ້​ເລີ່ມ​ເຂົ້າ​ນອນ​ສູນ​ເປັນ​ລະ­ບົບ ເລີ່ມ​ແຕ່​ວັນ​ທີ 2 ມັງ­ກອນ 2017 ຜ່ານ​ມາ ໂດຍ​ແບ່ງ​ອອກ​ເປັນ 2 ຕອນ​ຄື: ຕອນ​ເຊົ້າ 8:00-11:00 ໂມງ ສ່ວນ​ຕອນ​ບ່າຍ 15:00-18:00 ໂມງ ເຊິ່ງ​ມາ​ຮອດ​ປັດ­ຈຸ­ບັນ​ເຫັນ​ວ່າ​ນັກ­ກີ­ລາ​ພວກ​ເຮົາ​ມີ​ຄວາມ​ພ້ອມ​ທາງ​ດ້ານ​ຈິດ­ໃຈ ເຕັກ­ນິກ ແລະ ພະ­ລະ​ກຳ­ລັງ​ເກືອບ​ເຕັມ​ຮ້ອຍ​ແລ້ວ ພ້ອມ​ທີ່​ຈະ​ເຂົ້າ​ຮ່ວມ​ງານ​ກີ­ລາ​ດັ່ງ­ກ່າວ ໂດຍ​ພວກ​ເຮົາ​ຕັ້ງ​ຄວາມ​ຫວັງ​ຈະ​ສູ້​ຊົນ​ຮັກ­ສາ​ມູນ­ເຊື້ອ​ທີ່​ເຄີຍ​ເຮັດ​ໄດ້ 2 ຫຼຽນ​ຄຳ​.

ສຳ­ລັບ​ທີມ​ນັກ­ກີ­ລາ​ເປ​ຕັງ ນວ ພວກ​ເຮົາ​ມີ​ທັງ​ໝົດ 10 ຄົນ​ຍິງ 5 ຄົນ​ຈະ​ສົ່ງ​ເຂົ້າ​ຮ່ວມ​ແຂ່ງ­ຂັນ 9 ລາຍ­ການ ໃນ​ນັ້ນ​ປະ­ກອບ​ມີ ປະ­ເພດ​ດ່ຽວ​ຍິງ-ຊາຍ ປະ­ເພດ​ຄູ່​ຍິງ-ຊາຍ ປະ­ເພດ​ຄູ່​ປະ­ສົມ ປະ­ເພດ​ທີມ​ຍິງ-ຊາຍ ປະ­ເພດ​ທີມ​ຊຸດ (ຊາຍ 2+ຍິງ 1) ແລະ​ປະ­ເພດ​ທີມ​ຊຸດ (ຍິງ 2+ຊາຍ 1).

ຂະ­ນະ​ທີ່ ນາງ ພິ​ໄລ​ວັນ ບຸນ​ພັນ ນັກ­ກີ­ລາ​ເປ​ຕັງ​ນະ­ຄອນ­ຫຼວງ​ວຽງ​ຈັນ ເຈົ້າ​ຂອງ 2 ຫຼຽນ​ຄຳ (ປະ­ເພດ​ທີມ​ຊຸດ​ຍິງ 1 ຫຼຽນ ແລະ ປະ­ເພດ​ທີມ​ຊຸດ​ປະ­ສົມ​ຍິງ 2+ຊາຍ 1) ຄັ້ງ​ຜ່ານ​ມາ​ກ່າວ​ວ່າ: ຮູ້­ສຶກ​ດີ­ໃຈ​ທີ່​ຈະ​ໄດ້​ເຂົ້າ​ຮ່ວມ​ງານ​ກີ­ລາ​ນັກ­ຮຽນ​ມັດ­ທະ­ຍົມ​ສຶກ​ສາ​ທົ່ວ​ປະ­ເທດ​ອີກ​ຄັ້ງ​ໜຶ່ງ ເຊິ່ງ​ນ້ອງ​ເອງ​ມີ​ຄວາມ​ພ້ອມ​ເຕັມ­ທີ່ ແລະ ຈະ​ເຮັດ​ໃຫ້​ດີ​ທີ່​ສຸດ ເພື່ອ​ຍາດ​ເອົາ​ຫຼຽນ​ລາ­ງວັນ​ມາ​ໃຫ້​ແກ່​ທີມ​ນັກ­ກີ­ລາ​ນະ­ຄອນ­ຫຼວງ​ວຽງ​ຈັນ​ພວກ​ເຮົາ.

ສ່ວນ​ຜົນ­ງານ​ຂອງ​ທີມ​ນັກ­ກີ­ລາ​ເປ​ຕັງ ນວ ທີ່​ເຂົ້າ​ຮ່ວມ​ງານ​ກີ­ລາ​ນັກ­ຮຽນ ຄັ້ງ​ທີ 5 ໃນ​ປີ 2014 ທີ່​ແຂວງ​ຈຳ­ປາ​ສັກ ສາ­ມາດ​ຍາດ​ມາ​ໄດ້ 2 ຫຼຽນ​ຄຳ 1 ຫຼຽນ​ເງິນ ແລະ 1 ຫຼຽນ​ທອງ.

ຂ່າວທີ່ກ່ຽວຂ້ອງ