ຂີ້­ກະ­ຕືກ​ເຈາະ​ໄສ້ - ໂດຍ : ດັ້ນ​ກີບ​ເມກ

1,382 22 ກ.ພ. 2017 ນານາສາລະ

ເວົ້າ​ເລື່ອງ​ຂີ້ກະ­ຕືກ​ເຈາະ​ໄສ້ ຄົນ​ລາວ​ນີ້​ຮູ້​ດີ ເພາະ​ມັນ​ແມ່ນພະ­ຍາດ​ຊະ­ນິດ​ໜຶ່ງ​ທີ່​ມັນ​ຄອຍ​ດູດ​ກິນ​ອາ­ຫານ​ໃນ​ລຳ​ໄສ້​ຂອງ​ຄົນ​ ເມື່ອ​ເຮົາ​ກິນ​ອາ­ຫານ​ລົງ​ໄປ ເຊິ່ງບາງ​ຄົນ​ເຖິງ​ແມ່ນ​ວ່າ​ຈະ​ກິນ​ອາ­ຫານ​ດີ​ພຽງ­ພໍປານ­ໃດ​ກໍ່​ຕາມ ແຕ່​ຖ້າ​ຫາກ​ໃນ​ທ້ອງ​ຜູ້­ກ່ຽວ​ຫາກມີ​ຂີ້­ກະ­ຕືກ​ຄອຍ​ດູດ​ກິນ​ອາ­ຫານ​ດັ່ງ­ກ່າວ​ແລ້ວ ຄົນ​ຜູ້​ນັ້ນ​ອາດ​ມີ​ຮ່າງ­ກາຍ​ຢູ່​ໃນ​ລັກ­ສະ­ນະ​ທີ່​ຂາດສານ​ອາ­ຫານ ເພາະ​ຂີ້­ກະ­ຕືກ​ທີ່​ເວົ້າ​ເຖິງ​ນັ້ນ​ ມັນກິນ​ລັດ​ຫົວ​ຄີວ​ກ່ອນ​ແລ້ວ!.

ເວົ້າ​ເລື່ອງ​ຂີ້­ກະ­ຕືກ​ເຈາະ​ໄສ້​ນີ້ ອາດ​ເຮັດ​ໃຫ້ທ່ານ​ຜູ້​ອ່ານ​ຫຼາຍ​ຄົນ​ຄິດ​ໄດ້​ວ່າມັນ​ອາດ​ບໍ່​ແຕກຕ່າງ​ກັນ​ປານ­ໃດ​ກັບ​ບັນ­ຫາການ​ສໍ້​ລາດ​ບັງ​ຫຼວງ ເພາະ​ພຶດ­ຕິ​ກຳ​ດັ່ງ­ກ່າວ​ມັນ​ກໍ່​ສະ­ແດງ​ອອກ​ເຖິງການ​ຄົດ​ໂກງ ບໍ່​ຊື່​ຕົງ​ຕໍ່­ໜ້າ​ວຽກ ມີ​ການ​ປິດ​ບັງອຳພາງ ເຊື່ອງ​ຊ້ອນ ຫຼື ພວກ​ຫົວ​ໃສ​ແນ່​ກໍ່​ອາດສ້າງ​ຫຼັກ​ຖານ​ປອມ​ແປງ​ຂຶ້ນ​ໃໝ່​ກໍ່​ໄດ້ ເພື່ອ​ໃຫ້​ໄດ້ປະ­ໂຫຍດ​ຕາມ­ໃຈ​ຕົນ​ຕ້ອງ­ການ ທັງໆ​ທີ່​ປະ­ເທດຊາດ ຫຼື ປະ­ຊາ­ຊົນ​ຈະ​ເສຍ​ຜົນ​ປະ­ໂຫຍດ​ກໍ່​ບໍ່​ສົນໃຈ ຫວນ​ຄືນ​ຫຼັງ​ຜູ້​ຂຽນ​ຄິດ​ໄດ້​ວ່າ ໄດ້​ອ່ານ​ເຫັນ​ບົດຂຽນ​ເລື່ອງ​ການ​ສໍ້​ລາດ​ບັງ​ຫຼວງໃນ​ໜັງ­ສື­ພິມ​ວຽງຈັນ​ໃໝ່ ປີ 2004 ວັນ​ທີ 30 ເດືອນ​ມັງ­ກອນ ນາມປາກ­ກາ​ວ່າ: ສັດ­ຈະ ເຊິ່ງ​ຜູ້​ຂຽນ​ບົດ​ນັ້ນ​ໄດ້​ຍົກ​ໃຫ້ເຫັນ​ຫຼາຍ​ເຫດ­ຜົນ​ເຖິງ​ສາ​ເຫດ­ການ​ສໍ້​ລາດ​ບັງຫຼວງ ເຊັ່ນ: ການ​ສໍ້​ລາດ​ບັງ​ຫຼວງ​ທີ່​ເກີດ​ຈາກການສົມ­ຮູ້​ຮ່ວມ​ຄິດ​ລະ­ຫວ່າງ​ນັກ­ທຸ­ລະ­ກິດທັງ​ພາຍ​ໃນ ແລະ ຕ່າງ­ປະ­ເທດ ກັບ​ເຈົ້າ​ໜ້າ­ທີ່​ຂອງ​ລັດ​ຖະບານ ເຊິ່ງ​ແມ່ນ​ຮູບການ​ໜຶ່ງ​ຂອງ​ການ​ປຸ້ນ​ສະດົມ​ເອົາ​ເງິນ​ຄຳ ຊັບ​ສິນ​ຂອງ​ປະ­ເທດ​ຊາດ ສ່ວນການ​ສໍ້​ລາດ​ບັງ​ຫຼວງ​ທີ່​ເກີດ​ຂຶ້ນລະ­ຫວ່າງ​ເຈົ້າໜ້າ­ທີ່​ຂອງ​ລັດ­ຖະ­ບານ​ດ້ວຍ​ກັນ ປຽບ​ເໝືອນ​ຂີ້ກະ­ຕືກ​ເຈາະ​ໄສ້ ຫຼື ຜີ​ດູດ​ເລືອດ ທັງ​ສອງ​ອັນ​ລວມເຂົ້າ­ກັນ​ສາ­ມາດ​ເປັນກຳ­ລັງ​ແຮງ​ທຳ­ລາຍຊາດ​ບ້ານ​ເມືອງ​ໄດ້.

ຜູ້​ຂຽນ​ເຫັນ​ວ່າດຽວ­ນີ້​ເຮົາ​ມີ​ກົດ­ໝາຍ​ຕ້ານ​ການສໍ້​ລາດ​ບັງ​ຫຼວງ ເຊິ່ງ​ສາ­ມາດ​ເອົາ​ຜູ້​ລະ­ເມີດ​ລະບຽບ​ວິ­ໄນ​ມາ​ລົງ­ໂທດ​ໄດ້ ຍົກ​ຕົວ­ຢ່າງຂໍ້ 6.4 ທີ່ຂຽນ​ໄວ້​ໃນ​ປື້ມ​ຄູ່​ມື​ຕ້ານ​ການ​ສໍ້​ລາດ​ບັງ​ຫຼວງ​ໄດ້​ກຳນົດ​ໄວ້​ວ່າ: ບຸກ­ຄົນ ຫຼື ການ­ຈັດ­ຕັ້ງ​ທີ່​ໄດ້​ລະ­ເມີດກົດໝາຍ​ຕ້ານ​ການ​ສໍ້​ລາດ​ບັງ​ຫຼວງ ເຊິ່ງ​ກໍ່​ຄວາມ​ເສຍຫາຍ​ໃຫ້​ແກ່​ຜົນ​ປະ­ໂຫຍດ​ຂອງ​ລັດ ສັງ­ຄົມ ຫຼື ສິດ ແລະ ຜົນ​ປະ­ໂຫຍດ​ອັນ​ຊອບ​ທຳ​ຂອງ​ພົນ­ລະ­ເມືອງ ຈະ​ຖືກ​ປະ­ຕິ­ບັດ​ມາດ​ຕະ­ການ​ຕາມ​ທີ່​ກຳ­ນົດ​ໃນ​ກົດໝາຍ​ຕ້ານ​ການ​ສໍ້​ລາດ​ບັງ​ຫຼວງ ຫຼື ຖືກ​ປະ­ຕິ­ບັດມາດ​ຕະ­ການ​ທາງ​ອາ­ຍາ ແລ້ວ­ແຕ່​ກໍ­ລະ­ນີ​ເບົາ ຫຼື ໜັກ ລວມ​ທັງ​ໃຊ້​ແທນ​ຄ່າ​ເສຍ​ຫາຍ​ທີ່​ຕົນ​ໄດ້​ກໍ່ຂຶ້ນ.

ດັ່ງ­ນັ້ນ ຜ່ານ​ມາ​ພວກ​ເຮົາ​ກໍ່​ໄດ້​ອ່ານ​ຂ່າວ​ຕາມໜ້າ​ໜັງ­ສື­ພິມ ຫຼື ວ່າ​ໜັງ­ສື­ພິມ​ປ້ອງ​ກັນ​ຄວາມ​ສະຫງົບ ​ກໍ່​ຈະ​ເຫັນ​ວ່າ ພວກລະ­ເມີດ​ລະ­ບຽບ​ກົດ­ໝາຍຖືກ​ລົງ­ໂທດ ເພາະ­ວ່າບ້ານ​ເຮົາ​ມີ​ລະ­ບຽບ ແລະ ກົດ­ໝາຍ​ຢ່າງ​ຈະ­ແຈ້ງ ທີ່​ໃຊ້​ເປັນ​ມາດ​ຕະ­ການ ແລະ ປະ­ຕິ­ບັດ​ຕໍ່​ຜູ້​ລະ­ເມີດ​ກົດ­ໝາຍ​ຕ້ານ​ການ​ສໍ້ລາດ​ບັງ​ຫຼວງ ເພາະ​ພວກ​ນີ້​ຄື​ດັ່ງ​ຂີ້­ກະ­ຕືກ​ເຈາະ​ໄສ້ ຕ້ອງ​ກິນ​ຢາ​ຂ້າ ເພື່ອປາບ​ໃຫ້​ມັນ​ໝົດ​ໄປ ແຕ່​ກໍ່ຕ້ອງ​ເຂົ້າ­ໃຈ​ວ່າ ວຽກ​ນີ້​ຕ້ອງ​ໄດ້​ເຮັດ​ເປັນ​ປະ­ຈຳ​ຕໍ່ເນື່ອງ ແລະ ຍາວ​ນານ.

ຂ່າວທີ່ກ່ຽວຂ້ອງ