ສາວ ສ ​ເກົາຫຼີ ຄອງ​ຂັນ​ຊະນະ​ເລີດ ອາຊີ ຣັກ​ບີ້ ເຊ​ເວັນ ໂທຣ​ຟີ 2017

1,205 23 ກ.ພ. 2017 ວົງຈອນກີລາ
ສາວ ສ ​ເກົາຫຼີ ຄອງ​ຂັນ​ຊະນະ​ເລີດ ອາຊີ ຣັກ​ບີ້ ເຊ​ເວັນ ໂທຣ​ຟີ 2017

ການ​ແຂ່ງຂັນ​ຣັກ​ບີ້ ໃນ​ເທ​ສະການ​ ລາວ ​ຣັກ​ບີ້ 2017 ລາຍການ​ ອາຊີ​ ຣັກ​ບີ້ ​ເຊ​ເວັນ​ ໂທຣ​ຟຣີ ທີມ​ຊາດ​ຍິງ ປະເພດ 7 ຄົນ​ມີ 7 ປະເທດເຂົ້າ​ຮ່ວມ​ແຂ່ງຂັນ ແລະ ແຂ່ງ​ແບບ​ພົບ​ກັນ​ໝົດ ​ຈັດ​ເອົາ​ທີມ​ທີ່​ມີ​ຄະແນນ​ດີ​ທີ່​ສຸດ​ເປັນ​ແຊັມ ປະກອບ​ມີ: ລາວ (ເຈົ້າພາບ) ອິນ​ເດຍ ມາ​ເລ​ເຊຍ ເນ​ປານ ຟິ​ລິບ​ປິນ ປາ​ກິດ​ສະຖານ ແລະ ສ ເກົາຫຼີ ໂດຍ​ເລີ່ມ​ການ​ແຂ່ງ​ລະຫວ່າງວັນ​ທີ 17-18 ກຸມພາ 2017 ທີ່​ຜ່ານ​ມາ ທີ່​ສະໜາມ​ກີລາເຈົ້າ​ອາ​ນຸ​ວົງ.

ຜ່ານ​ການ​ແຂ່ງຂັນ​ປາກົດ​ວ່າ: ສາວ ສ ເກົາຫຼີ ສ້າງ​ຜົນງານ​ຢ່າງ​ໂດດ​ເດັ່ນ ລົງ​ສະໜາມ​ນັດ​ທຳ​ອິດ​ຖະ​ຫຼົ່ມ ພິ​ລິບ​ປິນ ຂາດຮອຍ 48-0 ນັດ​ທີ 2 ຖະ​ຫຼົ່ມ ເນ​ປານ 39-0 ນັດ​ທີ 3 ຊະນະ ມາ​ເລ​ເຊຍ 10-0 ນັດ​ທີ 4 ຊະນະ ຟິ​ລິບ​ປິນ 22-5 ນັດ​ທີ 5 ຊະນະ ອິນ​ເດຍ 29-0 ແລະ ນັດ​ສຸດ​ທ້າຍ​ຊະນະ ລາວ 35-5 ຄວ້າ​ຂັນ​ແຊັມ​ໄປ​ຄອງ ສ່ວນ​ອັນ​ດັບ 2 ເປັນ​ຂອງ​ອິນ​ເດຍ ຊະນະ 5 ແລະ ເສຍ 1 ນັດ ອັນ​ດັບ 3 ເປັນ​ຂອງ​ມາ​ເລ​ເຊຍ ຊະນະ 4 ແລະ ເສຍ 2 ນັດ ອັນ​ດັບ 4 ຟິ​ລິບ​ປິນ ຊະນະ 3 ແລະ ເສຍ 3 ນັດ.

ຂະນະ​ທີ່ ທີມ​ຣັກ​ບີ້​ຍິງ​ຂອງ ​ສປປ ລາວ ລົງ​ສະໜາມ​ນັດ​ທຳ​ອິດ​ເສຍ​ໃຫ້ອິນ​ເດຍ 9-22 ນັດ​ທີ 2 ຊະນະ ປາ​ກິດ​ສະຖານ 35-5 ນັດ​ທີ 3 ເສຍ​ໃຫ້ ຟິ​ລິບ​ປິນ 22-31 ນັດ​ທີ 4 ເສຍ​ໃຫ້ ມາ​ເລ​ເຊຍ 5-26 ນັດ​ທີ 5 ເສຍ​ໃຫ້ ສ ເກົາຫຼີ 5-35 ແລະ ນັດສຸດ​ທ້າຍ​ຖະ​ຫຼົ່ມ ເນ​ປານ 29-0 ຈັດ​ຢູ່​ອັນ​ດັບ​ທີ 5 ຂອງ​ຕາຕະລາງ ສ່ວນ​ອັນ​ດັບ​ທີ 6 ແລະ 7 ເປັນ​ຂອງປາ​ກິດ​ສະຖານ ແລະ ເນ​ປານ ຕາມ​ລຳດັບ.

ສຳລັບ​ການ​ແຂ່ງ​​ຂັນ​ຣັກ​ບີ້ ໃນ​ເທ​ສະການ​ ລາວ ​ຣັກ​ບີ້ 2017 ຍັງ​ມີ​ລາຍການ ​ຣັກ​ບີ້​ ຊີງ​ແຊັມ​ສະໂມສອນ​ວຽງ​ຈັນ​ນາໆຊາດ ຄັ້ງ​ທີ 10 ແມ່ນ​ມີ​ທັງ​ປະເພດ​ທີມ​ຊາຍ-ທີມ​ຍິງ ແຂ່ງຂັນ​ລະຫວ່າງ​ວັນ​ທີ 18-19 ກຸມພາ 2017 ຜ່ານ​ການ​ແຂ່ງຂັນຜົນ​ປາກົດ​ວ່າ: ຊະນະ​ເລີດ​ປະເພດ​ທີມ​ຊາຍ​ໄດ້ແກ່ Brigalow Bushwacker ສ່ວນ​ທີມ Vientiane Lions ໄດ້​ເປັນ​ແຊັມ​ຣັກ​ບີ້ ປະເພດ​ຍິງ ແລະ DAC Rejectors ໄດ້​ແຊັມ​ທີມ​ຊາຍພັດທະນາ​ໄປ​ຄອງ.

ຂ່າວທີ່ກ່ຽວຂ້ອງ