ທ່ານ ວິ​ເພັດ ສີ​ຫາ​ຈັກ ກັບ​ມາ​ຮັບ​ຕຳແໜ່ງ​ປະທານ ​ສຕລ ຄືນໃໝ່

550 23 ກ.ພ. 2017 ວົງຈອນກີລາ
ທ່ານ ວິ​ເພັດ ສີ​ຫາ​ຈັກ ກັບ​ມາ​ຮັບ​ຕຳແໜ່ງ​ປະທານ ​ສຕລ ຄືນໃໝ່

ທ່ານ ວິ​ເພັດ ສີ​ຫາ​ຈັກ ກັບ​ມາ​ຮັບ​ຕຳແໜ່ງ​ປະທານ​ສະຫະພັນ​ບານເຕະ​ແຫ່ງ​ຊາດ​ລາວ (​ສຕລ) ຄືນໃໝ່ ​ຫຼັງ​ຈາກ​ທີ່​ຄົບ​ກຳນົດ​ການ​ລົງໂທດ​ລະບຽບ​ວິໄນຂອງ​ທາງ FIFA ເປັນ​ເວລາ 2 ປີ​ ພ້ອມ​ທັງ​ຢືນຢັນ​ຈະ​ສືບຕໍ່​ພັດ​ທະນາ​ວົງ​ການ​ກີລາບານເຕະ​ຂອງ ​ສປປ ລາວ ໃຫ້​ດີ​ຂຶ້ນ​ເລື້ອຍໆ.

ກອງ​ປະຊຸມ​ວິສາມັນ​ຄົບ​ຄະນະ​ບໍລິຫານ​ງານ ​ສຕລ ແລະ ພິທີ​ມອບ-ຮັບ​ຕຳແໜ່ງ​ຄືນໃໝ່​ ລະຫວ່າງ ທ່ານ ປະສາດ​ໄຊ ພິລາ​ພັນ​ເດ​​ຊ ຮັກສາ​ການ​ປະທານ ​ສຕລ ແລະ ທ່ານ ວິ​ເພັດ ສີ​ຫາ​ຈັກ ປະທານ ​ສຕລ ຈັດ​ຂຶ້ນ​ໃນ​ວັນ​ທີ 21 ກຸມພາ 2017 ທີ່​ຫ້ອງ​ປະ​ຊຸມ ​​ສຕລ ບ້ານຫ້ວຍ​ຫົງ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ໂດຍ​ໃຫ້​ກຽດ​ເຂົ້າ​ຮ່ວມ​​ເປັນ​ສັກຂີ​ພິຍານ​ມີ ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີກະຊວງ​ສຶກ​ສາ​ທິ​ການ ແລະ ກີລາ ທ່ານ ແສງ​ພອນ ພົນ​ອາມາດ ຫົວຫນ້າກົມ​ກີລາ​ລະດັບ​ສູງ​ ກະຊວງ​ສຶກ​ສາ​ທິ​ການ ແລະ ກີລາ ພ້ອມ​ດ້ວຍ​ຄະນະ​ບໍລິຫານ​ງານ-ພະນັກງານ ​ສຕລ ຕະຫຼອດ​ຮອດສື່​ມວນ​ຊົນ.

ທ່ານ ວິ​ເພັດ ສີ​ຫາ​ຈັກ ຈະ​ດຳລົງ​ຕຳແໜ່ງ​ເປັນ​ປະທານສະຫະພັນ​ບານເຕະ​ແຫ່ງ​ຊາດ​ລາວ ຈົນ​ເຖິງ​ຄົບ​ວາລະ​ໃນ​ປີ 2019 ເຊິ່ງ​ທ່າ​ນຢືນຢັນ​ຈະ​ສືບຕໍ່​ພັດທະນາ​ວົງ​ການ​ກີລາ​ບານເຕະຂອງ​​ ສປປ ລາວ ໃຫ້​ດີ​ຂຶ້ນ​ເລື້ອຍໆ ແລະ ຈະ​ໃຊ້​ຄວາມພະຍາຍາມ​ຢ່າງ​ເຕັມທີ່ ເພື່ອ​ແກ້​ໄຂ​ກັບ​ສິ່ງ​ທ້າ​ທາຍ​ທີ່​ເກີດ​ຂຶ້ນ.

ຂ່າວທີ່ກ່ຽວຂ້ອງ