ກຽມ​ຈັດ​ແລ່ນ ວຽງ​ຈັນ ຮາ​ຟ ມາ​ຣາ​ທອນ ນາໆຊາດ 2017

472 28 ກ.ພ. 2017 ວົງຈອນກີລາ
ກຽມ​ຈັດ​ແລ່ນ ວຽງ​ຈັນ ຮາ​ຟ ມາ​ຣາ​ທອນ ນາໆຊາດ 2017

    ພິ­ທີ​ຖະ­ແຫຼງ​ຂ່າວ​ການ​ຈັດ​ແຂ່ງ­ຂັນ​ແລ່ນ ວຽງ​ຈັນ ຮາ​ຟ ມາ​ຣາ​ທອນ ນາໆຊາດ 2017 ຄັ້ງ​ທີ 2 ຈັດ​ຂຶ້ນ​ວັນ​ທີ 23 ກຸມ­ພາ 2017 ທີ່​ນະ­ຄອນ­ຫຼວງ​ວຽງ​ຈັນ ມີ​ທ່ານ ແສງ​ພອນ ພົນ​ອາ­ມາດ ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ພັອ ພິມ​ພາ ສີ​ໂພ​ໄຊ ປະ­ທານ​ສະ­ຫະ­ພັນ​ກີ­ລາ​ແລ່ນ-ລານ​ແຫ່ງ​ຊາດ​ລາວ ຜູ້­ຕາງ­ໜ້າ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ ຜູ້​ສະ­ໜັບ­ສະ­ໜູນ ນັກ­ກີ­ລາ ແລະ ສື່​ມວນ​ຊົນ​ເຂົ້າ​ຮ່ວມ.

    ທ່ານ ພັອ ພິມ​ພາ ສີ​ໂພ​ໄຊ ໄດ້​ກ່າວ​ວ່າ: ການ​ຈັດ​ງານ​ຄັ້ງ​ນີ້ ເພື່ອ​ສົ່ງ­ເສີມ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ ແລະ ມິດ­ຕະ­ພາບ​ລະ­ຫວ່າງ​ນັກ​ແລ່ນ​ດ້ວຍ​ກັນ ພ້ອມ​ກັນ​ນັ້ນ​ກໍ່​ເພື່ອ​ເຮັດ​ໃຫ້ ນະ ຄອນ​ຫຼວງ​ວຽງ​ຈັນ ກາຍ­ເປັນ​ນະ­ຄອນ­ຫຼວງ​ທີ່​ມີ​ການ​ຈັດ­ການ​ແຂ່ງ­ຂັນ​ກີ­ລາ​ມວນ​ຊົນ​ໃນ​ລະ­ດັບ​ນາໆຊາດ ນອກ​ນັ້ນ​ຍັງ​ເປັນ​ການ​ສົ່ງ­ເສີມ​ການ​ທ່ອງ​ທຽວ​ລາວ​ໃຫ້​ມີ​ຄວາມ​ຄຶກ­ຄື້ນ​ຜ່ານ​ກິດ­ຈະ­ກຳ​ນີ້ ສຳ­ລັບ​ການ​ເລືອກ​ເສັ້ນ­ທາງ​ແລ່ນ​ໃນ​ນະ­ຄອນ­ຫຼວງ​ວຽງ​ຈັນ ເນື່ອງ​ຈາ​ກວ່າ​ນະ­ຄອນ­ຫຼວງ​ວຽງ​ຈັນ​ແມ່ນ​ມີ​ຄວາມ​ໜ້າ​ສົນ­ໃຈ​ຫຼາຍ ເພາະ​ແລ່ນ​ຜ່ານ​ຈຸດ​ທ່ອງ​ທ່ຽວ​ວັດ­ທະ­ນະ­ທຳ ແລະ ເສັ້ນ­ທາງ​ແຄມ​ຂອງ​ທີ່​ມີ​ທິວ​ທັດ​ອັນ​ສວຍ​ງາມ.

    ສ່ວນ​ປະ­ເພດ​ການ​ແຂ່ງ­ຂັນ​ລວມ​ມີ ປະ­ເພດ ຮາ​ຟ ມາ​ຣາ​ທອນ 21 ກິ­ໂລ­ແມັດ ມິ​ນິ ມາ­ລາ​ທອນ 10,5 ກິ­ໂລ­ແມັດ ແລະ ແລ່ນ​ເພື່ອ​ສຸ­ຂະ­ພາບ 5 ກິ­ໂລ­ແມັດ ເຊິ່ງ​ການ​ແຂ່ງ­ຂັນ​ຄັ້ງ​ນີ້​ຈະ​ຈັດ​ຂຶ້ນ​ວັນ​ທີ 12 ມີ­ນາ 2017 ສ່ວນ​ລາ­ງວັນ ອັນ​ດັບ 1-5 ທັງ​ປະ­ເພດ​ຍິງ-ຊາຍ ແມ່ນ​ເງິນ­ສົດ ແລະ ຂັນ​ລາ­ງວັນ.

    ສຳ­ລັບ​ຄ່າ​ລົງ​ທະ​ບຽບ​ສະ­ເພາະ​ຄົນ​ລາວ ແລ່ນ 21 ກິ­ໂລ­ແມັດ 120.000 ກີບ​ຕໍ່​ຄົນ 10,5 ກິ­ໂລ­ແມັດ 100.000 ກີບ​ຕໍ່​ຄົນ ແລະ 5 ກິ­ໂລ­ແມັດ 50.000 ກີບ​ຕໍ່​ຄົນ ສ່ວນ​ຄົນ​ຕ່າງ­ປະ­ເທດ​ຄ່າ​ສະ­ໝັກ​ແລ່ນ 21 ກິ­ໂລ­ແມັດ 40 ໂດ​ລາ​ສະ­ຫະ­ລັດ​ຕໍ່​ຄົນ ຫຼື ປະ­ມານ 320.000 ກີບ 10,5 ກິ­ໂລ­ແມັດ  30 ໂດ​ລາ​ຕໍ່​ຄົນ ຫຼື ປະ­ມານ 240.000 ກີບ ແລະ 5 ກິ­ໂລ­ແມັດ 10 ໂດ​ລາ​ຕໍ່​ຄົນ ຫຼື ປະ­ມານ 80.000 ກີບ.

ຂ່າວທີ່ກ່ຽວຂ້ອງ