ທີມ​ບານ­ເຕະ​ຄົນ​ພິ­ການ​ຕາ​ ຍາດ​ໄດ້​ອັນ​ດັບ 3 ຊີງ​ແຊັມ​ປະ­ເທດ​ໄທ

462 02 ມີ.ນ. 2017 ວົງຈອນກີລາ
ທີມ​ບານ­ເຕະ​ຄົນ​ພິ­ການ​ຕາ​ ຍາດ​ໄດ້​ອັນ​ດັບ 3 ຊີງ​ແຊັມ​ປະ­ເທດ​ໄທ

ທີມ​ສະ­ໂມ­ສອນ Tiger star ໃນ​ນາມ​ທີມ​ບານ­ເຕະ​ຄົນ​ພິ­ການຕາ​ຂອງລາວ ສາ­ມາດ​ຍາດ​ໄດ້​ອັນ​ດັບ 3 ໃນ​ການ​ແຂ່ງ­ຂັນບານ­ເຕະ​ຄົນພິ­ການ​ຕາ ຊີງ​ແຊັມ​ປະ­ເທດ​ໄທ ຄັ້ງ​ທີ 5 ລະ­ຫວ່າງ​ວັນ​ທີ 21-23 ກຸມ­ພາ 2017 ທີ່​ສະ­ໜາມ​ບານເຕະ 354 FOOTBALL CLUB ແຂວງ​ປະ­ທຸມ​ທາ­ນີ ປະ­ເທດ​ໄທ.

ອີງ​ຕາມ​ຂໍ້​ມູນ​ຈາກ​ອົງ­ການ​ຄົນພິ­ການ​ອາ­ຊີເພື່ອ​ການ​ພັດ­ທະ­ນາ ໃຫ້​ຮູ້​ວ່າ: ການ​ແຂ່ງ­ຂັນ​ດັ່ງ­ກ່າວ ຈັດ​ຂຶ້ນ​ເປັນ​ເວ­ລາ 3 ວັນ ແລະ ທາງ​ປະ­ເທດ​ໄທ ​ເຊີນ​ທີມ​ລາວ​ເຂົ້າຮ່ວມ​ແຂ່ງ­ຂັນເພື່ອ​ແລກ­ປ່ຽນ​ປະສົບ​ການ ແລະ ໃຫ້­ການ​ສະ­ໜັບສະ​ໜູນ​ຊ່ວຍ­ເຫຼືອ​ທີມ​ລາວ ເຊິ່ງການ​ເດີນ­ທາງ​ໄປ​ຄັ້ງ​ນີ້​ແມ່ນ​ໄປໃນ​ນາມ​ສະ­ໂມ­ສອນ Tiger star ໂດຍ​ມີ​ຄະ­ນະ​ນຳ ແລະ ຄະ­ນະ​ຄູເຝິກ 8 ຄົນ ແລະ ນັກ­ກີ­ລາ 7 ຄົນ.

ສຳ­ລັບ​ການ​ໄປ​ຮ່ວມ​ແຂ່ງ­ຂັນ​ ມີເປົ້າ​ໝາຍ​ເພື່ອ​ສົ່ງ­ເສີມ​ເກັບກ່ຽວ​ປະ­ສົບ​ການ ແລະ ພັດ­ທະ­ນາໃຫ້​ແກ່​ທີມ​ເຕະ­ບານ​ຄົນ​ພິ­ການ​ຕາ​ໃຫ້​ຫຼາຍ​ຂຶ້ນ ພ້ອມ​ທັງ​ໃຫ້​ທີມ​ບານເຕະ​ຄົນ​ພິ­ການ​ຕາ​ລາວ​ຍືນ​ຍົງ ເພີ່ມ​ທັກ​ສະ​ໃນ​ການ​ຫຼິ້ນ​ດີ​ຂຶ້ນ​ຕື່ມ ແລະ ເປັນໂອ­ກາດ​ດີ​ທີ່​ໄດ້​ທົດສອບ​ຄວາມ​ສາ­ມາດ​ຂອງ​ຕົວ​ເອງ ຜ່ານ​ການ​ແຂ່ງ­ຂັນເພື່ອ​ກະ­ກຽມຄວາມ​ພ້ອມ​ເຂົ້າ​ຮ່ວມ​ງານ​ກີ­ລາ ອາ​ຊຽນ ​ພາ​ຣາ ​ເກມ ຄັ້ງ​ທີ 9 ທີ່ປະ­ເທດ​ມາ​ເລ​ເຊຍ ໃນ​ເດືອນ​ກັນຍາ 2017.

ການ​ແຂ່ງ­ຂັນ​ ​ມີ 5 ທີມເຂົ້າ​ຮ່ວມ ​ໄດ້­ແກ່​ ທີມ​ສະ­ມາ­ຄົມ​ຄົນ​ຕາ­ບອດ​ຕາ​ແຫ່ງ​ປະ­ເທດ​ໄທ ທີມ A ທີມ​ສະ­ມາ­ຄົມ​ສົ່ງ­ເສີມ ແລະ ພັດ­ທະ­ນາ​ອາ­ຊີບ​ຄົນ​ຕາ­ບອດ ​ນະຄອນ​ຣາດ​ຊິ​ສີ­ມາ ທີມ​ສະ­ມາ­ຄົມຄົນ​ຕາ­ບອດ​ແຫ່ງ​ປະ­ເທດ​ໄທ ທີມ B ສະ­ມາ­ຄົມສິດ​ເກົ່າ​ໂຮງ­ຮຽນສອນ​ຄົນ​ຕາ­ບອດ​ກຸງ​ເທບ ແລະ Tiger star (ທີມ​ຈາກ​ລາວ) ສ່ວນ​ຮູບ​ແບບ​ການ​ແຂ່ງ­ຂັນ ​ແມ່ນແຂ່ງ​ແບບພົບ​ກັນ​ໝົດ ເພື່ອ​ຄັດ​ເອົາທີມ​ທີ່​ດີ​ທີ່​ສຸດ​ອັນ​ດັບ 1 ແລະ 2 ໄປ​ຊີງ​ຊະ­ນະ​ເລີດ ສ່ວນ​ທີມ​ອັນ​ດັບ 3 ແລະ 4 ແມ່ນ​ໄປຊີງ​ທີ 3 ຜ່ານ ການ​ແຂ່ງ­ຂັນຜົນ​ປາ­ກົດ​ວ່າ: ທີມຈາກ​ລາວ Tiger star ສາ­ມາດຜ່ານ​ເຂົ້າ​ໄປ​ຊີງ​ອັນ​ດັບ 3 ກັບ​ທີມສະ­ມາ­ຄົມ​ຄົນ​ຕາ­ບອດ​ແຫ່ງ​ປະເທດ​ໄທ ທີມ B ແລະ ສາ­ມາດບຽດ​ເອົາ​ຊະ­ນະ​ໄປ​ໄດ້ 2-1 ຄອງອັນ​ດັບ 3.

ຂ່າວທີ່ກ່ຽວຂ້ອງ