ຟຸດ​ຊໍ ກຽມ​ຈັດ​ຍົກ​ລະດັບ​ກຳມະການ​ຕັດສິນ ລະດັບ AFC

1,526 17 ມີ.ນ. 2017 ວົງຈອນກີລາ
ຟຸດ​ຊໍ ກຽມ​ຈັດ​ຍົກ​ລະດັບ​ກຳມະການ​ຕັດສິນ ລະດັບ AFC

    ສະຫະພັນ​ບານເຕະ​ແຫ່ງ​ຊາດ​ລາວ ອະນຸ​ກຳມະ ການ​ບານເຕະ​ຟຸດ​ຊໍ ແລະ ຫາດ​ຊາຍ ຂໍ​ແຈ້ງ​ມາ​ຍັງ​ບັນດາ​ຜູ້​ທີ່​ສົນໃຈ ແລະ ມີໃຈ​ມັກ​ຢາກ​ເປັນ​ກຳມະການ​ຕັດສິນ​ຟຸດ​ຊໍ​ ຊາບ​ວ່າ: ທາງ​ສະຫະພັນ​ບານ ເຕະ​ແຫ່ງ​ຊາດ​ລາວ ຈະ​ໄດ້​ຈັດ​ເຝິກອົບຮົມ​ກຳມະ ການ​ຕັດສິນ​ຟຸດ​ຊໍ​ລະດັບ​ສູງ ໂດຍ​ຄູ​ເຝິກ​ມາ​ຈາກ (AFC) ໃນ​ລະຫວ່າງ​ວັນ​ທີ 24-28 ເມສາ 2017.
    ສຳລັບ​ເງື່ອນໄຂ​ຂອງ​ສຳ​ມະ​ນາ​ກອນ​ທີ່​ຈະ​ມາ​ເຂົ້າ​ຮ່ວມ​ເຝິກອົບຮົມ​ຈະ​ຕ້ອງ​ມີ​ອາຍຸ 18-35 ປີ ມີ​ລະດັບ​ການ​ສຶກ​ສາ​ຢ່າງ​ຕ່ຳ​ຈົບ ມ​ປາຍ​ຂຶ້ນ​ໄປ ແລະ ມີ​ຄວາມ​ຮູ້​ພາສາ​ອັງກິດ​ຍິ່ງ​ເປັນ​ການ​ດີ ເພດ​ຊາຍ ມີ​ສະພາບ​ຮ່າງກາຍ​ແຂງແຮງ​ສົມບູນ​ດີ ແລະ ສາຍຕາ​ດີ ມີໃຈ​ມັກ​ໃນ​ການ​ເປັນ​ກຳມະການ​ຕັດສິນ​ຟຸດ​ຊໍ ມີ​ຄວາມ​ບຸກ​ບືນ​ສູງ ແລະ ພ້ອມ​ປະ​ເຊີນ​ໜ້າ​ກັບ​ຄວາມ​ທ້າ​ທາຍ​ຕໍ່​ອາຊີບ​ນີ້ ນອກຈາກ​ນີ້​ຕ້ອງ​ເຄີຍ​ຜ່ານ​ການ​ເຝິກອົບຮົມ​ກຳມະການ​ຕັດສິນ​ຂັ້ນ​ພື້ນຖານ​ຂອງ​ກີລາ​ບານເຕະ ຫຼື ຟຸດ​ຊໍ.
    ສ່ວນ​ຄ່າ​ສະໝັກ​ແມ່ນ 3 ແສນ​ກີບ​ຕໍ່​ຄົນ ສິ່ງ​ທີ່​ສຳ​ມະ​ນາ​ກອນ​ຈະ​ໄດ້​ຮັບ​ປະກອບ​ມີ: ເສື້ອ​ເຝິກອົບຮົມ 2 ຊຸດ ໃບຢັ້ງຢືນ ແລະ ອາຫານ​ທ່ຽງ ສຳລັບ​ສຳ​ມະ​ນາ​ກອນ​ຈາກ​ຕ່າງ​ແຂວງ ຈະ​ໄດ້​ຮັບ​ເພີ່ມ​ອາຫານ​ເຊົ້າ ແລະ ແລງ ສ່ວນ​ສຳ​ມະ​ນາ​ກອນ​ທີ່​ທົດ​ສອບ​ຜ່ານ​ການ​ເຝິກອົບຮົມ​ຄັ້ງ​ນີ້​ຈະ​ໄດ້​ມີ​ໂອກາດ​ຕັດສິນ​ການ​ແຂ່ງຂັນ​ຟຸດ​ຊໍ​ລີກ​ທີ່​ຈະ​ໄດ້​ຈັດ​ຂຶ້ນ​ໃນ​ໄວໆ​ນີ້ ເປີດ​ຮັບ​ພຽງ​ແຕ່ 30 ຄົນ​ເທົ່າ​ນັ້ນ.
    ສະຖານທີ່​ສະຫະພັນ​ບານເຕະ​ແຫ່ງ​ຊາດ​ລາວ (ສູນ​ເຝິກ​ກີລາ​ບານເຕະ​ຫ້ວຍ​ຫົງ) ປິດ​ຮັບ​ສະໝັກວັນ​ທີ 10 ເມສາ 2017 ລາຍ​ລະອຽດ​ຕິດຕໍ່​ເອົາ​ແບບ​ຟອມ​ໃບ​ສະໝັກ​ທີ່​ສະຫະພັນ​ບານເຕະ​ແຫ່ງ​ຊາດ​ລາວ ວັນ​ຈັນ-ວັນ​ສຸກ ໃນ​ໂມງ​ລັດ​ຖະ​ການ​ທີ່​ໜ່ວຍ​ງານ​ຟຸດ​ຊໍ ໂທ:020 78575554 020 55411932.

ຂ່າວທີ່ກ່ຽວຂ້ອງ