ຈຳ­ນວນ​ຄົນ​ສູບ­ຢາ​ທົ່ວ​ໂລກ ຫຼຸດ​ລົງ 2,5% ໃນ​ຮອບ 10 ປີ

185 24 ມີ.ນ. 2017 ຂ່າວຕ່າງປະເທດ
ຈຳ­ນວນ​ຄົນ​ສູບ­ຢາ​ທົ່ວ​ໂລກ ຫຼຸດ​ລົງ 2,5% ໃນ​ຮອບ 10 ປີ

ຈຳ­ນວນ​ຄົນ​ສູບ­ຢາ​ໃນ​ທົ່ວ​ໂລກ ໄດ້​ຫຼຸດ​ລົງ 2,5% ພາຍ​ໃນ​ໜຶ່ງທົດ​ສະ​ວັດ ຫຼັງ​ຈາກ​ທີ່​ກົດ​ບັດ​ວ່າດ້ວຍ​ການ​ຄວບ​ຄຸມ​ຢາ­ສູບຂອງອົງ­ການ​ອະ­ນາ­ໄມ​ໂລກ (WHO) ເລີ່ມ​ມີ​ຜົນ​ສັກ­ສິດ ເມື່ອ​ປີ 2005.

ໃນ​ບົດ​ລາຍ​ງານ​ທີ່​ລົງ​ພິມ​ໃນວາ­ລະ­ສານ​ການ​ແພດ Lancet (ຂອງ​ຝຣັ່ງ) ໃຫ້​ຮູ້​ວ່າ ບັນ­ດາ​ນັກຄົ້ນ­ຄວ້າ​ຂອງ WHO ຢືນ­ຢັນ​ວ່າ ອັດ­ຕາ​ສ່ວນ​ຄົນ​ສູບ­ຢາ​ຫຼຸດ​ລົງແຮງ​ທີ່​ສຸດ​ແມ່ນ​ໃນ​ໄລ­ຍະ​ເວ­ລາທີ່​ປະ­ເທດ​ຕ່າງໆ ປະ­ຕິ­ບັດ​ມາດຕະ­ການ​ທີ່​ຮຽກ­ຮ້ອງອອກ​ມາ​ຢູ່ໃນ​ກົດ​ບັດ​ກ່ຽວ​ກັບ​ສຸ­ຂະ­ພາບ​ທົ່ວໂລກ​ດັ່ງ­ກ່າວ ແຕ່​ເຖິງ​ຢ່າງ­ໃດ​ກໍ່ຕາມ ຈຳ­ນວນ​ຄົນ​ສູບ­ຢາ​ພັດ​ເພີ່ມຂຶ້ນ​ຢູ່​ໃນບາງ​ປະ­ເທດ​ທີ່​ບໍ່​ປະ­ຕິ­ບັດຕາມ​ຄຳ​ສັນ­ຍາ​ຢູ່​ໃນ​ຂໍ້​ຕົກ­ລົງ​ດັ່ງກ່າວ.

ກົດ​ບັດ​ສະ­ບັບ​ຂອບ​ກ່ຽວ​ກັບການ​ຄວບ​ຄຸມ​ຢາ­ສູບ​ຂອງ WHO ລະ­ບຸ​ວ່າ 180 ປະ­ເທດ ທີ່​ລົງນາມ​ໃນ​ເອ­ກະ­ສານ​ດັ່ງ­ກ່າວ ໄດ້ເຫັນ​ດີ​ປະ­ຕິ­ບັດ ຫຼື ເພີ່ມ​ລະ­ດັບພາ­ສີ​ກັບ​ຢາ­ສູບ ສ້າງ​ເຂດ​ສູບ­ຢາຂຶ້ນ​ມາ ຕິດ​ປ້າຍ​ແຈ້ງ​ເຕືອນ​ກ່ຽວກັບ​ສຸ­ຂະ­ພາບ​ໃສ່ຊອງ­ຢາ​ສູບ ຫ້າມ​ໂຄ­ສະ­ນາ​ຢາ­ສູບ ແລະ ອື່ນໆ.

ບັນ­ດາ​ນັກ​ຄົ້ນ­ຄວ້າ​ເວົ້າ​ວ່າຈຳ­ນວນ​ຜູ້​ໃຊ້​ຢາ­ສູບ​ເພີ່ມ​ຂຶ້ນ​ຢູ່ໃນ​ບາງ​ປະ­ເທດ ແມ່ນ​ເປັນ​ຍ້ອນການ​ນຳ​ໃຊ້​ມາດ​ຕະ­ການ​ຄວບຄຸມ​ຍັງ​ບໍ່​ເຄັ່ງ​ຄັດ ຍິ່ງ​ໄປ​ກວ່າ​ນັ້ນ ແມ່ນ​ຍັງ​ບໍ່​ມີ​ເລີຍ​ຢູ່​ໃນ​ບາງ​ພາກພື້ນ ສະ­ຖິ­ຕິ​ຂອງ WHO ໃຫ້​ຮູ້​ວ່າ ໄລ່​ມາ​ຮອດ​ເວ­ລາ​ນີ້ ການ​ສູບ­ຢາຍັງ​ຄົງ​ຖື​ວ່າ​ເປັນ​ໜຶ່ງ​ໃນ​ສາ­ເຫດທີ່​ນຳ­ໄປ​ສູ່​ການ​ເສຍ​ຊີ­ວິດ​ໃຫຍ່​ສຸດຢູ່​ໃນ​ໂລກ ໂດຍ​ທີ່​ຈຳ­ນວນ​ຜູ້​ເສຍຊີ­ວິດ​ໃນແຕ່​ລະ​ປີ ມີ​ເຖິງ​ເກືອບ 6 ລ້ານ​ຄົນ ນອກ­ຈາກ​ການ​ເຮັດ​ໃຫ້ສະ­ມັດ​ຕະ​ພາບ​ການ​ອອກ­ແຮງງານ​ຫຼຸດ​ລົງ​ແລ້ວ ພະ­ຍາດຕ່າງໆທີ່​ເກີດ​ຈາກ​ການ​ສູບ­ຢາ​ ຍັງ​ເຮັດໃຫ້​ເກີດ​ຄວາມ​ເສຍ​ຫາຍ​ຕໍ່​ລະ­ບົບການ​ດູ​ແລ​ສຸ­ຂະ­ພາບ​ໃນ​ທົ່ວ​ໂລກ ເສຍ​ຫາຍ​ເປັນມູນ​ຄ່າ​ກວ່າ 1.000 ຕື້ໂດ​ລາ​ສະ­ຫະ­ລັດ ໃນ​ແຕ່​ລະ​ປີ.

ຂ່າວທີ່ກ່ຽວຂ້ອງ