ຢ່າ​ຫຼິ້ນ​ກັບ­ໄຟ - ໂດຍ: ດັ້ນ​ກີບ​ເມກ

2,314 03 ມ.ສ. 2017 ນານາສາລະ

ຄົນ​ລາວ​ບູຮານ​ສອນ​ວ່າ ງູ​ໂຕ​ນ້ອຍໆ ແຕ່ເປັນ​ງູ​ພິດ ກໍ່​ສາມາດ​ຂົບ​ຄົນ​ຕາຍ​ໄດ້ ເຊັ່ນ​ດຽວ​ກັບ­ໄຟ ເຖິງ​ວ່າ​ມັນຈະ​ນ້ອຍ​ເທົ່າກັບ­ໄມ້­ຂີດ­ໄຟ​ກ້ານ​ດຽວ ແຕ່​ກໍ່​ສາມາດ​ຈູດ​ເຜົາ​ໂລກ​ທັງ​ໂລກ​ໄດ້ ເລື່ອງ​ຂອງ​ໄຟ​ຈຶ່ງມີ​ທັງ​ບວກ ແລະ ລົບ ມີ​ທັງ​ຄຸນ ແລະ ໂທດ ຖ້າຍາມ​ໃດ​ຄົນ​ທີ່​ໃຊ້​ໄຟ​ຂາດ​ສະ­ຕິ ​ປະ­ໝາດ ​ໄຟ​ນັ້ນ​ກໍ່​ສາ­ມາດ​ສ້າງ​ຄວາມ​ເສຍ​ຫາຍ​ໃຫຍ່​ຫຼວງ​ໄດ້ ທັງຄອບ­ຄົວ ແລະ ໝູ່​ບ້ານ ມື້­ກ່ອນ​ອ່ານ​ຂ່າວ​ໜ້າເຟ​ສ​ບຸກ (FB) ເລື່ອງ​ໄຟ​ໄໝ້​ກຸດ­ຕິ​ວັດ​ແຫ່ງ​ໜຶ່ງ​ຢູ່ເມືອງ​ໂຂງ ຈຶ່ງ​ຢາກ​ໃຫ້​ທຸກ​ຄົນ​ມີ​ສະ­ຕິ​ວ່າ ໄຟ​ນັ້ນໄໝ້​ໄດ້​ທຸກ​ບ່ອນ ທັງ​ບ້ານ ແລະ ວັດ.

ວັນ​ທີ 23/03/2017 ໄດ້​ອ່ານ­ໜັງ­ສື​ພິມ​ວຽງຈັນ​ໃໝ່ ເຫັນ​ແຈ້ງ​ການ​ຂອງ​ກອງ​ບັນ­ຊາ​ການ​ປ້ອງກັນ​ຄວາມ​ສະ­ຫງົບ​ນະ­ຄອນ­ຫຼວງ ເລື່ອງ​ການ​ເພີ່ມທະ­ວີ​ປ້ອງ​ກັນ ສະ­ກັດ​ກັ້ນ ແລະ ຕ້ານ​ອັກ­ຄີ​ໄພ ຜູ້ຂຽນ​ຈຶ່ງ​ຂໍ​ນຳ​ມາ​ສະ­ເໜີ​ຕື່ມ​ໃຫ້​ຫຼາຍ​ຄົນ​ໄດ້ຮັບ​ຮູ້ ແລະ ມີ​ສະ­ຕິ​ນຳ​ກັນ​ວ່າ ດຽວ­ນີ້​ແມ່ນ​ຢ່າງ​ເຂົ້າ​ລະດູ​ແລ້ງ ອາ­ກາດ​ຮ້ອນ​ແຮງ​ ເຮັດ​ໃຫ້​ເກີດ​ອັກ­ຄີ​ໄພໄດ້​ງ່າຍ ພວກ​ເຮົາບໍ່​ຄວນ​ປະ­ໝາດ​ໃນ​ການ​ໃຊ້​ໄຟເຮັດ​ອາ­ຫານ​ໃນ​ເຮືອນ​ຊານ ໂດຍ​ສະ­ເພາະໃນ​ຂໍ້ແຈ້ງ​ການ​ດັ່ງ­ກ່າວ​ກໍ່​ໄດ້​ບອກ​ແຈ້ງ­ວ່າ: 1. ການ​ນຳໃຊ້​ໄຟ­ຟ້າ​ເຂົ້າ​ໃນ​ການ​ຜະ­ລິດ ການ​ດຳ­ລົງ​ຊີ­ວິດ​ປະ­ຈຳ​ວັນ ຫຼື ວຽກ​ງານ​ອື່ນ ​ຕ້ອງ​ໄດ້​ປະ­ຕິ­ບັດ​ຕາມຂໍ້​ກຳ­ນົດ​ຂອງບໍ­ລິ­ສັດ​ໄຟ­ຟ້າ​ໄດ້​ວາງ​ອອກ ກວດ­ກາເອົາ­ໃຈ­ໃສ່​ສາຍ​ໄຟ­ຟ້າ ເຄື່ອງ­ໃຊ້​ໄຟ­ຟ້າ ​ໃຫ້​ຢູ່​ໃນ​ສະພາບ​ສົມ­ບູນ ຖ້າ​ເຫັນ​ວ່າ​ເກົ່າ​ແກ່ເປ່​ເພ ​ກໍ່​ຄວນປ່ຽນ ກ່ອນ​ອອກ​ຈາກ​ບ້ານ ຫຼື ເຂົ້າ​ນອນ ຕ້ອງ​ກວດກາ​ເຄື່ອງ­ໃຊ້​ໄຟ­ຟ້າ ຖອດ​ປັກ​ສຽບ ຫຼື ມອດ​ຟືນ​ໄຟໃຫ້ລະ­ອຽດ 2. ໃຕ້​ທູບ​ທຽນ​ໄຫວ້​ພະ​ສູດ​ມົນ​ ຕ້ອງມີ​ສະ­ຕິ... 3. ຫ້າມ​ຈູດ​ຂີ້​ເຫຍື້ອ​ຊະ­ຊາຍ... ມັນ​ເປັນຕົ້ນ​ເຫດ​ອັກ­ຄີ​ໄພ 4. ຫ້າມ​ຈູດ​ວັດ­ຖຸ​ທີ່​ເປັນ​ທາດແຕກ ທາດ​ລະ­ເບີດ ໝາກ​ກະ­ໂພກ 5. ຫ້າມ​ເອົານ້ຳ­ມັນ​ເຊື້ອ​ໄຟ​ມາ​ໄວ້​ເຮືອນ 6. ບັນ­ດາ​ສຳ­ນັກງານ​ອົງ­ການ ບໍ­ລິ­ສັດ ຫົວ­ໜ່ວຍ​ທຸ­ລະ​ກິດ ອຳ­ນາດການ​ປົກ­ຄອງ​ທ້ອງ­ຖິ່ນ ​ຕ້ອງ​ເພີ່ມ​ທະ­ວີ​ຄວາມ​ເອົາໃຈ​ໃສ່​ໃນ​ການ­ຈັດ­ຕັ້ງປ້ອງ​ກັນ​ເວນ­ຍາມ​ສະ­ຖານທີ່​ຕົນ​ຮັບ­ຜິດ­ຊອບ​ຢ່າງ​ເຂັ້ມ​ງວດ ຖ້າ​ເກີດ​ອັກ­ຄີ​ໄພສາ­ມາດ​ໂທ​ແຈ້ງ: 1190 ຫຼື 021 212707.

ເລື່ອງ​ຂອງ​ຟືນ​ໄຟ​ໃນ​ຍາມ​ແລ້ງ ປາ­ກົດ​ວ່າ​ມີຂ່າວ​ໄຟ​ໄໝ້​ທຸກ​ປີ ເຖິງ​ແມ່ນ​ວ່າ​ພວກ​ເຮົາ​ໄດ້​ເອົາໃຈ​ໃສ່​ປານ­ໃດ​ກໍ່​ຕາມ ເພາະ­ວ່າ​ຍັງ​ປາ­ກົດ​ມີ​ຄົນ​ທີ່ປະ­ໝາດ​ຂາດ​ສະ­ຕິ ທັງ​ທີ່​ເຈ­ຕະ­ນາ ຫຼື ບໍ່​ເຈ­ຕະ­ນາ ເຊັ່ນ​ວ່າ: ຍາມ​ປີ​ໃໝ່​ມີ​ການ​ຊຸມ​ແຊວ​ດື່ມ­ກິນຈົນມຶນ­ເມົາ ທຳ​ໃຫ້​ຫຼົງ​ລືມ​ໃນ​ການ​ປິດ-ມອດ​ໄຟ​ທີ່ຕົນ​ໃຊ້​ແຕ່ງ​ຢູ່​ຄົວ­ກິນ ເມື່ອ​ມີ​ທັງ​ແຈ້ງ​ການ​ອອກ​ມາຕັກ­ເຕືອນ​ຄື​ແນວ​ນີ້ ພວກ​ເຮົາ​ຄວນ​ຊ່ວຍ​ກັນ​ປະ­ຕິບັດ ຕັກ­ເຕືອນ​ລູກ​ຫຼານ​ໃຫ້​ເອົາ­ໃຈ­ໃສ່ ບໍ່​ຖື​ເບົາ​ໃນການ​ໃຊ້​ເຄື່ອງ­ໃຊ້​ໄຟ­ຟ້າ​ທຸກ​ປະ­ເພດ ເຖິງແມ່ນ​ວ່າ: ໄຟ​ໄໝ້​ມີ​ສິບ​ເທື່ອ ບໍ່​ທໍ່​ນ້ຳ​ຖ້ວມ​ເທື່ອ​ໜຶ່ງ​ກໍ່​ຕາມ ແຕ່​ໄຟ​ໄໝ້​ກໍ່​ເຮັດ​ໃຫ້​ຫຼາຍ​ຄົນ​ສູນ​ເສຍ​ຊັບ​ສິນ​ມີ­ຄ່າທີ່​ຫາ​ມາ​ໄດ້ດ້ວຍ​ຢາດ​ເຫື່ອ­ແຮງ​ກາຍ! ສະ­ນັ້ນ ຕ້ອງ​ມີ​ສະ­ຕິ ແລະ ຕັກ­ເຕືອນ​ລູກ​ຫຼານ​ໃຫ້​ເອົາ­ໃຈໃສ່​ການ​ໃຊ້​ຟືນ​ໄຟ ເຮັດ​ເປັນ​ນິ­ໄສ​ຈຶ່ງຈະ​ປອດ​ໄພ.

ຂ່າວທີ່ກ່ຽວຂ້ອງ