30 ລ້ານ​ຄົນ​ໃນ​ຕາ­ເວັນ​ອອກ​ກາງ-ອາ​ຟຣິ​ກາ​ເໜືອ ປະ­ສົບ​ຄວາມ​ອຶດ​ຫີວ

145 03 ມ.ສ. 2017 ຂ່າວຕ່າງປະເທດ
30 ລ້ານ​ຄົນ​ໃນ​ຕາ­ເວັນ​ອອກ​ກາງ-ອາ​ຟຣິ​ກາ​ເໜືອ ປະ­ສົບ​ຄວາມ​ອຶດ​ຫີວ

ໃນ​ບົດ​ລາຍ​ງານ​ທີ່​ຫາ​ກໍ​ນຳອອກ​ມາ​ເປີດ­ເຜີຍ​ເມື່ອ​ວັນ​ທີ 28 ມີ­ນາ​ນັ້ນ ອົງ­ການ​ອາ­ຫານ ແລະ ກະ­ສິ­ກຳ​ຂອງ​ສະ­ຫະ​ປະ­ຊາຊາດ (FAO) ໃຫ້​ຮູ້​ວ່າ ການ​ພິ­ພາດ​ທີ່ຮ້າຍ​ແຮງ​ຢູ່​ໃນ​ເຂດ​ຕາ­ເວັນ​ອອກກາງ ແລະ ອາ​ຟຣິ​ກາ​ເໜືອ ໄດ້ເຮັດ​ໃຫ້​ຄົນ​ຢູ່​ທີ່​ນັ້ນຕົກ​ຢູ່​ໃນ​ສະພາບ​ອຶດ​ຫີວ 30 ລ້ານ​ຄົນ.

ບົດ​ລາຍ​ງານ​ຂອງ FAO ລະບຸ​ວ່າ ບັນ­ຫາ​ຄວາມ​ສະ­ຫງົບ​ທາງດ້ານ​ສະ­ບຽງ​ອາ­ຫານ ແລະ ສະພາບ​ການ​ຂາດ​ໂພ​ສະ​ນາການ (ຂາດ​ທາດ​ບຳ­ລຸງ) ຢູ່​ໃນ​ເຂດ​ຕາເວັນ​ອອກ​ກາງ ແລະ ອາ​ຟຣິ​ກາເໜືອ ໄດ້​ຂີ້­ຮ້າຍ​ລົງ​ໄປໃນ 5 ປີທີ່​ຜ່ານ​ມາ.

ອັດ­ຕາ​ສ່ວນ​ອຶດ​ຫີວ​ຂອງ​ຜູ້​ທີ່­ຢູ່ໃນ​ໄວ​ຜູ້​ໃຫຍ່​ຢູ່​ໃນ​ເຂດ​ດັ່ງ­ກ່າວ ຢູ່​ລະ­ດັບ​ເກືອບ 9,5% ຂອງ​ຈຳນວນ​ປະ­ຊາ­ກອນ ໃນ​ໄລ­ຍະ​ເວ­ລາແຕ່​ປີ 2014-2015 ຫຼື ເທົ່າ​ກັບເກືອບ 30 ລ້ານ​ຄົນ FAO ໃຫ້​ຮູ້ວ່າ ອີ​ຣັກ ຊູ​ດານ ຊີ​ຣີ ແລະ ເຢແມນ ແມ່ນ​ຕົກຢູ່​ໃນ​ບັນ­ດາ​ປະເທດ​ທີ່​ມີ​ອັດ­ຕາ​ສ່ວນ​ອຶດ​ຫີວ​ໃນກຸ່ມ​ຄົນ​ຜູ້​ໃຫຍ່​ສູງ​ສຸດ​ໃນ​ໂລກ ເປັນ​ການ­ສະ­ແດງ​ໃຫ້​ເຫັນ​ເຖິງ​ຜົນກະ­ທົບຂອງ​ການ​ພິ­ພາດ​ເກີດ​ຂຶ້ນໃນ​ປັດ­ຈຸ­ບັນ ທີ່​ມີ​ຕໍ່​ຄວາມ​ສະ­ຫງົບທາງ​ດ້ານ​ສະ­ບຽງ​ອາ­ຫານ ແລະ ບັນ­ຫາ​ໂພ​ສະ​ນາ​ການ.

ໃນ​ວັນ​ດຽວ​ກັນ ກອງ​ທຶນ​ສຳ­ລັບເດັກ­ນ້ອຍຂອງ​ອົງ­ການ​ສະ­ຫະປະ­ຊາ​ຊາດ (UNICEF) ກໍ່​ມີ​ຄຳແຈ້ງ​ເຕືອນ​ອອກ​ມາ​ວ່າ ມີເດັກນ້ອຍ​ຫຼາຍ​ລ້ານ​ຄົນ​ພວມ​ຢູ່​ໃນປາກ​ເຫວ​ຂອງ​ຄວາມ​ຕາຍ ຍ້ອນອຶດ​ຫີວ​ທີ່​ເກີດ​ຈາກ​ວິ​ກິດ​ການ​ມະນຸດ​ສະ​ທຳ​ທີ່​ຂີ້­ຮ້າຍທີ່​ສຸດ​ໃນ​ຮອບຫຼາຍ​ທົດ​ສະ​ວັດ​ທີ່​ຜ່ານ​ມາ.

UNICEF ຍັງ​ຮຽກ­ຮ້ອງ​ໃຫ້​ມີແຫຼ່ງ​ເງິນ​ໃນ​ກອງ​ທຶນ​ສຸກ​ເສີນ 255 ລ້ານ​ໂດ​ລາ​ສະ­ຫະ­ລັດ ໃຫ້ແກ່​ເດັກ­ນ້ອຍ 22 ລ້ານ​ຄົນ ຢູ່​ໃນປະ­ເທດນີ​ເຊ​ເຣຍ ໂຊ​ມາ­ລີ ຊູດານ​ໃຕ້ ແລະ ເຢ​ແມນ ແຫຼ່ງເງິນ​ດັ່ງ­ກ່າວ​ຈະ​ໄດ້​ນຳ­ໄປ​ປ້ອນ​ໃຫ້ບັນ­ດາ​ໂຄງ­ການ​ດ້ານ​ໂພສະ​ນາການ​ໃຫ້​ແກ່​ພວກ​ເດັກ­ນ້ອຍ ສະໜອງ​ສະ­ບຽງ​ອາ­ຫານ​ທີ່​ມີ​ປະໂຫຍດ​ໃຫ້​ແກ່​ເດັກ­ນ້ອຍ ລວມເຖິງ​ການ​ບໍ­ລິ­ການທາງ​ດ້ານ​ການແພດ ນ້ຳ ແລະ ດ້ານ​ອະ­ນາ­ໄມ.

ຄຳ​ສະ­ເໜີ​ຂອງ UNICEF ແມ່ນ​ນອນ​ຢູ່​ໃນ​ຍອດ​ຄັງ​ເງິນ 712 ລ້ານ​ໂດ​ລາ​ສະ­ຫະ­ລັດ ທີ່​ອົງ­ການນີ້​ວາງ​ຄາດ­ໝາຍ​ລະ­ດົມມາ​ໄດ້ ໃຫ້​ແກ່ 4 ປະ­ເທດ​ດັ່ງ­ກ່າວ ພາຍ ໃນ​ປີ 2017 ເພີ່ມ​ຂຶ້ນ 50% ເມື່ອທຽບ­ໃສ່​ຕົວ​ເລກ​ໃນ​ເວ­ລາ​ດຽວກັນ​ຂອງ​ປີ​ກາຍ​ທີ່ UNICEF ນຳສະ­ເໜີ.

ຂ່າວທີ່ກ່ຽວຂ້ອງ