ສະ­ພາ​ປະ­ເທດ​ທີ່​ໃຊ້​ພາ­ສາ​ຝຣັ່ງ ຫາ­ລື​ຫຼາຍ​ບັນ­ຫາ

397 03 ມ.ສ. 2017 ຂ່າວຕ່າງປະເທດ
ສະ­ພາ​ປະ­ເທດ​ທີ່​ໃຊ້​ພາ­ສາ​ຝຣັ່ງ ຫາ­ລື​ຫຼາຍ​ບັນ­ຫາ

ໃນ​ລະ­ຫວ່າງ​ວັນ​ທີ 24-26 ມີ­ນາ 2017 ຄະ­ນະ​ຜູ້​ແທນ​ສະພາ​ແຫ່ງ​ຊາດ​ລາວ ນຳ​ໂດຍ​ທ່ານນາງ ພອນ​ເພັດ ບຸບ­ຜາ ຮອງປະ­ທານ​ກຳ­ມາ​ທິ​ການ​ວັດ­ທະ­ນະທຳ-ສັງ­ຄົມ ໄດ້​ສຳ­ເລັດ​ເຂົ້າ​ຮ່ວມກອງ​ປະ­ຊຸມ​ກຳ­ມາ​ທິ​ການ​ວຽກງານ​ລັດ​ຖະ​ສະ­ພາ​ຂອງອົງ­ການລັດ​ຖະ​ສະ­ພາ​ປະ­ເທດ​ທີ່​ໃຊ້​ພາ­ສາຝຣັ່ງ (APF) ຈັດ​ຂຶ້ນ​ທີ່​ນະ­ຄອນໂຮ່​ຈິ​ມິງ ສສ ຫວຽດ­ນາມ ມີ​ຜູ້ແທນ​ປະ­ເທດສະ­ມາ­ຊິກ​ຂອງ APF 15 ປະ­ເທດ ຄະ­ນະ​ສະ​ມາຊິກ​ລັດ​ຖະ​ສະ­ພາ​ໜຸ່ມ ແລະ ກອງເລ­ຂາ​ອົງ­ການ APF ເຂົ້າ​ຮ່ວມ.

ໃນ​ພິ­ທີ ​ທ່ານ ຟູງ ກວກ​ຫຽນ ຮອງ​ປະ­ທານ​ສະ­ພາ​ແຫ່ງ​ຊາດຫວຽດ­ນາມ ໄດ້​ກ່າວ​ສະ­ແດງຄວາມ​ຕ້ອນ­ຮັບ ແລະ ຊົມ­ເຊີຍຕໍ່ການ​ມາ​ເຂົ້າ​ຮ່ວມ​ກອງ​ປະ­ຊຸມ​ດັ່ງກ່າວ​ຂອງ​ບັນ­ດາ​ປະ­ເທດ​ສະ​ມາຊິກ​ຂອງ​ອົງ­ການ APF ໂດຍ​ໄດ້​ຕີລາ­ຄາ​ສູງ​ຕໍ່​ການ­ເຄື່ອນ­ໄຫວ​ຂອງອົງ­ການ​ລັດ​ຖະ​ສະ­ພາ​ປະ­ເທດ​ທີ່ໃຊ້​ພາ­ສາ​ຝຣັ່ງ ຕະ­ຫຼອດ​ໄລ­ຍະ 50 ປີ­ຜ່ານ­ມາ ພ້ອມ​ນັ້ນ​ທ່ານ​ຍັງໄດ້ເນັ້ນ​ໃສ່​ຫຼາຍ​ບັນ­ຫາ ໂດຍ​ສະເພາະ​ແມ່ນ​ບົດ­ບາດ​ຄວາມ​ສຳ­ຄັນ​ຂອງ​ສະ­ມາ­ຊິກ​ສະ­ພາ​ທີ່​ໃຊ້​ພາ­ສາຝຣັ່ງ ​ເຂົ້າ​ໃນ​ການ​ຊຸກ­ຍູ້​ສົ່ງ­ເສີມ ແລະ ຕິດ­ຕາມ​ກວດ­ກາ​ການ​ຈັດຕັ້ງ​ປະ­ຕິ­ບັດ​ຂອງ​ລັດ­ຖະ­ບານ ​ໃນການ​ພັດ­ທະ­ນາ​ແບບ​ຍືນ​ຍົງ​ ແກ້ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ ສົ່ງ­ເສີມການ​ຮ່ວມ​ມື​ກັນ​ທາງດ້ານ​ວັດ­ທະ­ນະ­ທຳ ທ່ອງ​ທ່ຽວ ຮ່ວມ​ກັນ​ຕ້ານ​ການ​ກໍ່​ການ​ຮ້າຍ ແລະ ບັນ­ຫາ​ອື່ນໆ.

ກອງ​ປະ­ຊຸມ​ຜູ້​ເຂົ້າ​ຮ່ວມ​ໄດ້​ຮັບຟັງ​ລາຍ​ງານ​ຄືນ​ບັນ­ດາ​ໜ້າ​ວຽກທີ່​ຜ່ານ​ມາ ​ເປັນ­ຕົ້ນ​ການ​ຮັບ­ຮອງເອົາບັນ­ດາ​ບົດ​ລາຍ​ງານຂອງກອງ​ປະ­ຊຸມ​ວຽກ​ງານ​ອົງ­ການ APF ທີ່​ຈັດ​ຂຶ້ນ​ຢູ່​ປະ­ເທດ​ມາ­ດາກັດ​ສະ­ກາ ໃນ​ເດືອນ​ກໍ­ລະ­ກົດ 2016 ຮັບ​ຟັງ​ການ­ຈັດ­ຕັ້ງ​ຂອງບັນ­ດາ​ລັດ​ຖະ​ສະ­ພາ ການ​ປົກປ້ອງ​ຂໍ້​ມູນ-ຂ່າວ­ສານ​ໃນ​ບັນ­ດາປະ­ເທດ​ຝຣັ່ງ​ໂກ​ໂຟນ​ນີ ກົດ​ຈັນຍາ​ບັນ ບັນ­ດາ​ນິ­ຕິກຳ​ຂອງ​ລັດ​ຖະສະ­ພາ​ຝຣັ່ງ​ໂກ​ໂຟນ​ນີ ແລະ ການຕິດ­ຕາມ​ເດັກ­ນ້ອຍ​ທີ່​ບໍ່​ມີ​ການ​ບັນທຶກ​ລາຍ​ເກີດ ພ້ອມ​ດຽວ​ກັນ​ນັ້ນ ໄດ້​ຕີລາ­ຄາ​ຜົນ­ສຳ­ເລັດ ບັນ­ຫາຄົງ​ຄ້າງ ແລະ ປຶກ­ສາ​ຫາ­ລື​ແຜນຮ່ວມ​ມືໃນ­ຕໍ່­ໜ້າ  ການ​ກະ­ກຽມ​ບັນດາ​ເນື້ອ​ໃນ​ຍັດ­ຕິ​ຂອງ​ກຳ­ມາທິການ​ທີ່​ຈະ​ນຳ​ເອົາ​ສະ­ເໜີ​ຜ່ານ​ໃນກອງ​ປະ­ຊຸມ​ໃຫຍ່​ລັດ​ຖະ​ສະ­ພາ​ສາກົນ ບັນ­ດາ​ປະ­ເທດ​ທີ່​ໃຊ້​ພາ­ສາຝຣັ່ງ ຄັ້ງ​ທີ 12 ຈະ​ຈັດ​ຂຶ້ນ​ຕົ້ນເດືອນ​ກໍ­ລະ­ກົດ 2017 ທີ່​ປະ­ເທດລຸກ​ຊຳ​ບວກ.

ຂ່າວທີ່ກ່ຽວຂ້ອງ