ເກຣັກ EU ແລະ IMF ບັນ­ລຸ​ຂໍ້​ຕົກ­ລົງ​ກ່ຽວ​ກັບ​ໂຄງ­ການ​ຊ່ວຍ­ເຫຼືອ

134 03 ມ.ສ. 2017 ຂ່າວຕ່າງປະເທດ
ເກຣັກ EU ແລະ IMF ບັນ­ລຸ​ຂໍ້​ຕົກ­ລົງ​ກ່ຽວ​ກັບ​ໂຄງ­ການ​ຊ່ວຍ­ເຫຼືອ

ເກຣັກ ແລະ ບັນ­ດາ​ເຈົ້າ​ໜີ້​ສາກົນ ທີ່​ປະ­ກອບ​ດ້ວຍ​ສະ­ຫະ­ພາບເອີ​ຣົບ (EU) ແລະ ກອງ​ທຶນ​ເງິນຕາ​ສາ­ກົນ (IMF) ໄດ້ບັນ­ລຸ​ຂໍ້​ຕົກລົງ​ເບື້ອງ​ຕົ້ນ ກ່ຽວ​ກັບ​ການ​ປະ­ຕິຮູບ​ທີ່​ເປັນ​ຂໍ​ກຸນ­ແຈ​ຢູ່​ໃນ​ຂົງ­ເຂດກົດ­ໝາຍ​ວ່າ​ດ້ວຍ​ແຮງ​ງານ ການໃຊ້​ຈ່າຍພາກ​ລັດ ແລະ ຊັບ​ພະຍາ​ກອນ​ພະ­ລັງ­ງານ ຊ່ວຍ​ໃຫ້ສອງ​ຝ່າຍ​ກ້າວ​ໄປ​ໃກ້​ຂຶ້ນ​ກັບ​ການເຊັນ​ຂໍ້​ຕົກ­ລົງ​ກ່ອນ​ການ​ປະ­ຊຸມຂອງ​ລັດ­ຖະ­ມົນ­ຕີ​ການ​ເງິນບັນດາ​ປະ­ເທດ​ໃນ​ເຂດ​ໃຊ້​ເງິນ​ເອີ​ໂຣ (Eurozone) ທີ່​ຈະ​ມີ​ຂຶ້ນ​ໃນ​ວັນ​ທີ 7 ເມ­ສາໜ້າ​ນີ້.

ການ​ເຈລະ­ຈາ​ລະ­ຫວ່າງ ​ເກຣັກ ກັບ EU ແລະ IMF ໄດ້­ແກ່​ຍາວມາ​ເປັນ​ເວ­ລາ​ຫຼາຍ​ເດືອນ ເຮັດໃຫ້​ເກີດ​ຄວາມ​ກັງ­ວົນກ່ຽວ​ກັບວິ​ກິດ​ການ​ເທື່ອ​ໃໝ່​ຢູ່​ໃນ​ເອີ​ຣົບ.

ຄວາມ​ກ້າວ­ໜ້າ​ດັ່ງ­ກ່າວ ອາດເຮັດ​ໃຫ້​ຫົວ­ໜ້າ​ຄະ­ນະ​ເຈລະ­ຈາຂອງ EU ແລະ IMF ກັບ​ໄປ​ຍັງເກຣັກ ​ໃນ​ຊຸມ​ມື້​ຂ້າງ​ໜ້າ​ນີ້ ເພື່ອເຮັດ​ສຳ­ເລັດ​ລາຍ​ລະ­ອຽດ​ກັບ​ລັດຖະ​ມົນ­ຕີ​ການ​ເງິນ ແລະ ລັດ​ຖະມົນ­ຕີ​ແຮງ​ງານ​ຂອງ​ເກຣັກ  ກ່ອນທີ່ Eurogroup ຈະ​ປະ­ຊຸມ​ຢູ່​ທີ່​ປະເທດມາ​ລ​ຕາ.

ບັນ­ດາ​ເຈົ້າ​ໜ້າ­ທີ່ EU ໃຫ້​ຮູ້​ວ່າ ເກຣັກ ​ຍິນ​ດີ​ທີ່​ຈະ​ຕັດ​ຫຼຸດ​ເງິນ​ບຳນານພາຍ​ໃນ​ປີ 2019 ທີ່​ມີ​ມູນຄ່າ​ເຖິງ 1% ຂອງ GDP ລວມເຖິງ​ການ​ປັບ​ຫຼຸດ​ລະ­ດັບ​ລາຍ​ຮັບທີ່​ຕ້ອງ​ເສຍ​ພາ­ສີເພື່ອ​ປະ­ຢັດ​ຕື່ມອີກ​ປະ­ມານ 1% ຂອງ GDP ນີ້​ກໍ່ເປັນ​ມາດ​ຕະ­ການ​ທີ່​ເກຣັກ​ຍອມຮັບ​ເພື່ອ​ຈູງ​ໃຈ​ໃຫ້ IMF ເຂົ້າ​ຮ່ວມໃນ​ໂຄງ­ການ​ຊ່ວຍ­ເຫຼືອ​ຕາມ​ທີ່ EU ສະ­ເໜີ.

ປັດ­ຈຸ­ບັນ​ນີ້ ເກຣັກ ພວມ​ປະ­ຕິບັດ​ໂຄງ­ການ​ຊ່ວຍ­ເຫຼືອ​ງວດ​ທີ 3 ນັບ​ແຕ່​ປີ 2010 ເປັນ­ຕົ້ນ​ມາ ຊຶ່ງຢູ່​ໃນ​ພູດ​ຊ່ວຍ­ເຫຼືອ​ປະ­ເທດ​ນີ້​ໃຫ້ຫຼີກ­ເວັ້ນ​ທີ່​ຈະ​ເກີດ​ບັນ­ຫາ​ໜີ້​ດ້ອຍຄຸ­ນະ­ພາບ ໂຄງ­ການ​ທີ່ 3 ນີ້ ໄດ້ຮັບ​ການ​ຮັບ­ຮອງ​ເມື່ອ​ປີ 2015 ເພື່ອ​ແລກ​ກັບຄຳ​ສັນ­ຍາ​ໃນ​ການປະ­ຕິ​ຮູບ​ລະ­ບົບ​ບຳ­ນານ ແລະ ຫັນ​ການ​ຄອບ​ຄອງ​ຂອງ​ພາກ​ລັດ ໄປ​ເປັນ​ຫຸ້ນ​ສ່ວນໂຄງ­ການ​ຊ່ວຍເຫຼືອ​ທີ່​ມີ​ຍອດ​ມູນ​ຄ່າ 86 ຕື້ເອີ​ໂຣ ແມ່ນ​ມາ​ຈາກ​ການ​ປະ­ກອບ­ສ່ວນຂອງ​ບັນ­ດາ​ປະ­ເທດ Eurozone ໂດຍ​ຜ່ານ​ກອງ​ທຶນຄວາມ​ໝັ້ນ­ຄົງເອີ​ຣົບ (ESM).

ຂ່າວທີ່ກ່ຽວຂ້ອງ