ລລບສ ມີການພັດທະນາຢ່າງຕໍ່ເນື່ອງ ແລະ ຮອບດ້ານ

185 12 ມ.ສ. 2017 ຂ່າວໜ້າ​ໜຶ່ງ
ລລບສ ມີການພັດທະນາຢ່າງຕໍ່ເນື່ອງ ແລະ ຮອບດ້ານ

ການ​ພັດທະນາ​ລັດ​ວິ​ສາ​ຫະກິດ​ລາວ​ ບໍລິການ​ສິນຄ້າ​ຜ່ານແດນ (​ລລບສ) 9 ປີຜ່ານມາ (2008-2017) ໄດ້​ຖືກ​ຈັດ​ຕັ້ງ​ປະຕິ​ບັດ​ຕາມ​ທິດ​ທາງ​ແຜນການ​ທີ່ ​ລລບສ ກຳນົດ​ໄວ້ ພ້ອມ​ທັງ​ມີການ​ປັບປຸງ​ທຸລະ​ກິດ​ໃຫ້​ດີ​ຂຶ້ນ​ຢ່າງຕໍ່​ເນື່ອງ ແລະ ຮອບດ້ານ ເຮັດ​ໃຫ້ ​ລລບສ ມີ​ການ​ເຕີບ​ໃຫຍ່​ຂະຫຍາຍ​ຕົວ ມີ​ປະ​ສິດທິ​ຜົນ​ສູງ​ຖານລາຍ​ຮັບ​ເພີ່ມ​ຂຶ້ນ​ທຸກໆ​ປີ ການມອບ​ພັນທະ​ໃຫ້​ລັດ​ກໍ່​ເພີ່ມ​ຂຶ້ນ ແລະ ທັນ​ຕາມ​ກຳນົດ​ເວລາ ພ້ອມ​ນີ້ ດ້ານ​ກຳໄລ​ກໍ່​ເພີ່ມ​ຂຶ້ນ​ໃນລະດັບ​ສູງ.

ທ່ານ ຄຳ​ແພງ ສີ​ສະຫງ່າ ຜູ້ອຳນວຍ​ການ​ໃຫຍ່ ​ລລບສ ໄດ້ກ່າວ​ໃນ​ພິທີ​ສະເຫຼີມສະຫຼອງ ຄົບຮອບ 9 ປີ ແຫ່ງ​ການ​ພັດທະນາ ​ລລບສ ແລະ ເປີດ​ນຳ​ໃຊ້​ອາຄານສຳນັກງານ​ໃຫຍ່​ຫຼັງ​ໃໝ່ ວັນ​ທີ 7 ເມສາ 2017 ວ່າ: 9 ປີຜ່ານມາ ​ລລບສ ໄດ້​ເອົາໃຈໃສ່​ຈັດ​ຕັ້ງ​ປະຕິບັດ ​ແຜນການດຳເນີນ​ການ​ປັບປຸງ​ທຸລະ​ກິດ​ໃຫ້​ເຕີບ​ໃຫຍ່​ ຂະຫຍາຍ​ຕົວຢ່າງ​ບໍ່​ຢຸດ​ຢັ້ງ ການ​ກໍ່ສ້າງ​ພື້ນຖານ​ໂຄງ​ລ່າງ​ຢູ່​ບັນດາສາຂາ ໜ່ວຍ​ບໍລິການ​ໃນ​ທົ່ວ​ປະເທດ​ຢ່າງ​ເປັນ​ລະບົບ​ຄົບ​ຊຸດ​ຂະຫຍາຍ​ສາຂາ 3 ແຫ່ງຄື: ສາຂາແຂວງ​ບໍ່​ແກ້ວ ແຂວງ​ຄຳ​ມ່ວນ ແຂວງ​ຈຳປາ​ສັກ 2 ໜ່ວຍ​ບໍ​ລິການ (ນາ​ເພົ້າ ແລະ ປາກ​ຊັນ) ແລະ ມີ 2 ເຂດ​ບໍລິການ​ໃຫຍ່​ທີ່ຂຶ້ນ​ກັບ​ສຳນັກງານ​ໃຫຍ່ (ສາງທ່າ​ນາ​ແລ້ງ ແລະ ສາງ​ຕູ້​ຄອນເທັນ​ເນີ​ຊີ​ວາຍ ສະຖານີ​ລົດໄຟ​ທ່ານາ​ແລ້ງ) ນອກ​ນີ້ຍັງ​ມີ ​ລລບສ ທີ່​ທ່າເຮືອ​ຫວູງ​ອ່າງ ​ສສ ຫວຽດນາມ ເຊິ່ງ​ເປັນ​ບໍລິສັດ​ລູກ ແລະ ມີ​ຄູ່​ຮ່ວມ​ມື​ທັງ​ພາຍ​ໃນ ແລະ ຕ່າງປະເທດ ນັບ​ແຕ່​ສ້າງຕັ້ງ​ເປັນວິ​ສາ​ຫະ​ກິດ​ຈົນ​ເຖິງ​ປັດຈຸບັນ ລລບສ ມີ​ການ​ເຕີບ​ໃຫຍ່​ຂະຫຍາຍ​ຕົວ ມີ​ປະ​ສິດທິ​ຜົນຖານລາຍ​ຮັບ​ເພີ່ມ​ຂຶ້ນ​ແຕ່​ລະ​ປີ ສະເລ່ຍ​ຫຼາຍ​ກວ່າ 20% ສາມາດເພີ່ມ​ທຶນ​ຈົດ​ທະບຽນ​ຈາກ 10 ຕື້ກີບ ໃນ​ປີ 2008 ມາ​ເປັນ 33 ຕື້ກີບ ໃນ​ປີ 2017 ຍອດ​ລາຍ​ຮັບ 9 ປີ​ປະຕິບັດ​ໄດ້ 190 ຕື້​ກີບ ຍອດກຳໄລ 62,3 ຕື້​ກີບ ປະຕິບັດ​ພັນທະ​ອາກອນ​ປະເພດ​ຕ່າງໆ 24 ຕື້ກີບ ມອບ​ເງິນ​ປັນ​ຜົນ​ເຂົ້າ​ງົບ​ປະມານ 34 ຕື້​ກີບ ນອກ​ນີ້ຍັງ​ໄດ້ເອົາໃຈໃສ່​ປະຕິບັດ​ນະໂຍບາຍ​ຕໍ່ພະນັກງານ ແລະ ຊ່ວຍເຫຼືອ​ສັງຄົມ​ອີກ​ດ້ວຍ.

ເຂົ້າ​ຮ່ວມ​ໃນ​ພິທີ​ດັ່ງກ່າວ​ມີທ່ານ​ນາງ ທິບ​ພະ​ກອນ ຈັນທະວົງສາ ຮອງ​ລັດຖະມົນຕີ​ກະຊວງການ​ເງິນ ພ້ອມ​ດ້ວຍ​ພາກສ່ວນກ່ຽວຂ້ອງ.

ຂ່າວທີ່ກ່ຽວຂ້ອງ