ແຈ້ງເຕືອນຈະມີພາຍຸລະດູຮ້ອນພັດຜ່ານ

247 12 ມ.ສ. 2017 ຂ່າວໜ້າ​ໜຶ່ງ

ເນື່ອງ​ຈາ​ກວ່າ​ບໍລິເວນ​ຄວາມກົດ​ດັນ​ຕ່ຳ​ຂອງ​ອາກາດ​ຮ້ອນ​ ໄປປົກ​ຄຸມ​ຢູ່​ທົ່ວ​ທຸກ​ພາກ​ຂອງ​ປະເທດ​ລາວ ​ໃນ​ໄລຍະ​ຫຼາຍ​ວັນ​ຜ່ານ​ມາ ແລະ ຈະ​ສືບຕໍ່​ປົກ​ຄຸມ​ຕື່ມ​ອີກ​ຈົນຮອດ​ໄລຍະ​ຕອນ​ເຊົ້າຂອງ​ວັນ​ທີ 12 ເມສາ 2017 ຫຼັງ​ຈາກ​ນັ້ນ ມວນ​ອາກາດ​ເຢັນ​ຈາກ​ປະເທດຈີນ ​ຈະ​ແຜ່​ມາ​ປົກ​ຄຸມ​ອີກ​ເທື່ອ​ໃໝ່ ແລະ ຈະ​ເຮັດ​ໃຫ້​ເກີດ​ມີ​ເຂດ​ແລວປະ​ທະ​ຂອງ​ມວນ​ອາກາດ​ຮ້ອນ ແລະ ມວນ​ອາກາດ​ເຢັນ ພ້ອມດຽວ​ກັນ​ນັ້ນ ກະແສ​ລົມ​ຕາເວັນຕົກ​ສຽງ​ໃຕ້​ຈະ​ພັດ​ປົກ​ຄຸມ ເຊິ່ງ​ຈະເຮັດ​ໃຫ້​ມີ​ລົມພາຍຸ​ລະດູ​ຮ້ອນ​ເກີດຂຶ້ນ​ບາງ​ທ້ອງຖິ່ນ ​ແຂວງ​ພາກເໜືອ​ດ້ານ​ຕາເວັນຕົກ​ລົງ​ຫາ​ພາກກາງ ແລະ ພາກ​ໃຕ້​ໃນ​ໄລຍະ​ວັນທີ 12-16 ເມສາ 2017.

ຂໍ​ແຈ້ງ​ເຕືອນ​ມາ​ຍັງ​ພໍ່​ແມ່​ປະຊາ​ຊົນ ອຳນາດ​ການ​ປົກຄອງ ແລະ ອົງ​ການຈັດຕັ້ງ​ທຸກ​ພາກສ່ວນ ​ທີ່​ອາໄສ​ຢູ່​ແຂວງ​ຊຽງ​ຂວາງ ບໍ່​ແກ້ວ ຫຼວງ​ພະ​ບາງ ອຸດົມ​ໄຊ ໄຊ​ຍະ​ບູ​ລີ ນະຄອນຫຼວງ​ວຽງ​ຈັນ ແຂວງ​ວຽງ​ຈັນ ໄຊ​ສົມບູນ ບໍ​ລິຄຳ​ໄຊ ຄຳ​ມ່ວນ ສະຫວັນ​ນະ​ເຂດ ສາລະ​ວັນ ເຊ​ກອງ ຈຳປາ​ສັກ ແລະ ແຂວງ​ອັດ​ຕະ​ປື ຈົ່ງ​ມີ​ສະຕິ ກຽມພ້ອມ​ຮັບ​ມື​ກັບ​ສະພາບ​ລົມແຮງ ຝົນຕົກ ຟ້າຮ້ອງ ໝາກເຫັບ​ຕົກ ແລະ ອາດ​ຈະ​ເຮັດ​ໃຫ້ມີ​ຕົ້ນໄມ້​ຫັກ ເສົາ​ໄຟຟ້າ​ຫັກ ແລະ ເຮືອນ​ຊານ​ເປ່​ເພ ຂໍ​ໃຫ້​ຫຼີກ​ລ່ຽງການ​ຢູ່​ໃກ້ ຫຼື ຈອດ​ລົດ​ຢູ່​ກ້ອງ​ຕົ້ນໄມ້​ໃຫຍ່ ຫຼື ສິ່ງ​ກໍ່ສ້າງ​ທີ່​ບໍ່​ແຂງແຮງ ເພາະ​ຕົ້ນໄມ້ ຫຼື ສິ່ງ​ກໍ່ສ້າງອາດ​ຫັກ ຫຼື ລົ້ມ​ທັບ​ໄດ້ ພ້ອມ​ນີ້ ຂໍ​ໃຫ້​ຕິດຕາມ​ການ​ລາຍ​ງານ​ສະພາບ​ອາກາດ​ຈາກ​ກົມ​ອຸຕຸນິຍົມ ແລະ ອຸ​ທົກ​ກະ​ສາດ​ຢ່າງ​ເປັນ​ປະຈຳ.

ຂ່າວທີ່ກ່ຽວຂ້ອງ