ໃຊ້ລົດໃຊ້ຖະໜົນ ຂັບຂີ່ປອດໄພ

203 12 ມ.ສ. 2017 ຂ່າວໜ້າ​ໜຶ່ງ
ໃຊ້ລົດໃຊ້ຖະໜົນ ຂັບຂີ່ປອດໄພ

ຕົວ​ເລກ​ການ​ເກີດ​ອຸບັດ​ຕິເຫດ​ໄລຍະ​ການ​ສະເຫຼີມສະຫຼອງບຸນປີໃໝ່​ລາວ ​ພສ 2559 (ປີ 2016) ເລີ່ມ​ແຕ່​ວັນ​ທີ 12-17 ເມສາ 2016 ຢູ່​ນະຄອນຫຼວງ​ວຽງຈັນ​ມີ​ອຸບັດ​ຕິ​ເຫດ​ເກີດ​ຂຶ້ນ ທັງ​ໝົດ 49 ຄັ້ງ ລົດ​ເປ່​ເພ 96 ຄັນ ຄົນ ບາດເຈັບ 78 ຄົນ ແລະ ມີ​ຜູ້​ເສຍຊີວິດ 8 ຄົນ ສຳລັບ​ຕົວ​ເລກ​ອຸບັດຕິ​ເຫດ​ທາງ​ຖະໜົນ​ຢູ່​ນະຄອນຫຼວງ​ວຽງ​ຈັນ ປີ 2016 ຄື​ວັນ​ທີ 15/9/2015-15/9/2016 ເກີດຂຶ້ນ​ທັງ​ໝົດ 1.570 ຄັ້ງ ລົດ​ເປ່ເພ 3.061 ຄັນ ຄົນ​ເຈັບ 1.762 ຄົນ ແລະ ເສຍ​ຊີວິດ 266 ຄົນ.

ເພື່ອ​ຫຼີກ​ລ່ຽງ​ຈາກ​ການ​ເກີດອຸບັດ​ຕິ​ເຫດ ​ໃນ​ໄລຍະ​ສະເຫຼີມ​ສະຫຼອງ​ບຸນປີໃໝ່​ລາວ ​ພສ 2560 (ປີ 2017) ພະ​ແນກ​ໂຍທາ​ທິ​ການ ແລະ ຂົນສົ່ງ ແລະ ພະ​ແນກ​ຕຳຫຼວດ​ຈະລາຈອນ ນວ ໄດ້​ສົມທົບກັບ​ບໍລິສັດ ຮອນ​ດ້າ​ນິວ​ຈິບ​ເຊັງ ຈຳກັດ ຈັດ​ກິດຈະກຳ​ຄາ​ລະວານ​ລົດຈັກ​ ເຊີນຊວນ​ໃຫ້​ຜູ້​ໃຊ້​ລົດໃຊ້​ຖະໜົນ​ຂັບ​ຂີ່​ປອດ​ໄພ​ໄລຍະ​ສະເຫຼີມ​ສະຫຼອງ​ບຸນປີໃໝ່​ລາວ ​ພສ 2560 ການ​ຈັດ​ກິດຈະກຳ​ຄັ້ງ​ນີ້ແມ່ນ​ນຳ​ໃຊ້​ລົດຈັກ 100 ຄັນ ຂະບວນ​ລົດ​ໄດ້​ເລີ່ມ​ອອກ​ຈາກ​ເດີ່ນທາດຫຼວງ-ວົງວຽນ 450 ປີ-ວົງວຽນ​ດອນ​ໜູນ​ໂຄ້ງ​ກັບ​ທາງ​ເກົ່າ-ປະຕູ​ໄຊ-ຕະຫຼາດ​ເຊົ້າ​ລ້ຽວ​ໄປຕາມ​ຖະໜົນ​ສາມ​ແສນ​ໄທ-ໂຮງແຮມ​ເມີ​ກ້ຽວ​ ໂຄ້ງ​ກັບ​ຕາມ​ຖະໜົນ​ສຸ​ພານຸ​ວົງ-ສາມ​ແຍກ​ຫໍຄຳ-ປະຕູ​ໄຊ-ຖະໜົນ 23 ສິງຫາ-ເດີ່ນ​ທາດຫຼວງ​ຈຸດ​ປ່ອຍ​ລົດ ໃນກິດຈະກຳ​ຍັງ​ມີ​ການ​ເຜີຍແຜ່​ຂໍ້​ມູນອຸບັດ​ຕິ​ເຫດການ​ສັນຈອນ​ຕົວ​ຈິງໃນ ນວ ໃຫ້​ນັກຮຽນ​ເຂົ້າ​ຮ່ວມ​ຮັບຊາບ ໃຫ້​ຄວາມ​ຮູ້​ດ້ານ​ກົດ​ຈະລາຈອນ ຫຼັກການ​ຂັບ​ຂີ່​ປອດ​ໄພ ຕັ້ງຄຳ​ຖາມ (ຕອບ-ຄຳ​ຖາມ) ເພື່ອຮັບ​ເອົາ​ຂອງ​ລາງວັນ ເຊັ່ນ: ໝວກ​ກັນ​ກະທົບ ເສື້ອ​ຍືດ ແລະ ຂອງ​ລາງວັນ​ອື່ນໆ.

ກິດຈະກຳ​ຄັ້ງ​ນີ້​ຈັດຂຶ້ນ​ວັນ​ທີ 11 ເມສາ 2017 ຢູ່​ເດີ່ນ​ທາດຫຼວງ ນະຄອນຫຼວງ​ວຽງ​ຈັນ ມີ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ສະເໜີ ຈຸນ​ລະ​ມະນີ ຮອງປະທານ​ບໍລິສັດ ຮອນ​ດ້າ​ນິວ​ຈິບເຊັງ ຈຳກັດ ທ່ານ​ພັນ​ໂທ ຢຸດ​ຕະພົງ ສຸວັນນະ​ສິງ ຫົວໜ້າ​ພະ​ແນກຕຳຫຼວດ​ຈະລາຈອນ ນວ ແລະ ນັກຮຽນ​ຈາກ​ໂຮງຮຽນ ​ມສ ຕານມີ​ໄຊ ​ມສ ດອນ​ໜູນ ເຂົ້າ​ຮ່ວມ.

ຂ່າວທີ່ກ່ຽວຂ້ອງ