ທ່ານນາຍົກ ໄດ້ຮັບປະລິນຍາກິດຕິມະສັກ

367 12 ມ.ສ. 2017 ຂ່າວໜ້າ​ໜຶ່ງ
ທ່ານນາຍົກ ໄດ້ຮັບປະລິນຍາກິດຕິມະສັກ

ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ ແຫ່ງ ​ສປປ ລາວ ຖື​ເປັນ​ຜູ້ນຳ ​ສປປ ລາວ ບຸກຄົນໜຶ່ງ​ທີ່​ມີ​ສ່ວນ​ສຳຄັນ ​ໃນ​ການ​ເສີມຂະຫຍາຍ​ສາຍ​ພົວພັນ​ມິດ​ຕະພາບ ແລະ ຮ່ວມ​ມື​ໃນ​ຫຼາຍ​ລະດັບ​ລະຫວ່າງ​ສອງ​ປະເທດ ລາວ-ໄທ ໂດຍ​ຕະຫຼອດ​ໄລຍະ​ຜ່ານ​ມາ ທ່ານ​ນາຍົກລັດຖະມົນຕີ​ ໄດ້​ປະກອບ​ສ່ວນ​ເຂົ້າ​ໃນ​ການ​ຊຸກຍູ້​ສົ່ງເສີມ​ການ​ສ້າງ​ເຄືອ​ຂ່າຍ​ຄົມ​ມະນາ​ຄົມ ການ​ເຊື່ອມ​ໂຍງ​ລະຫວ່າງປະເທດ ເປັນຕົ້ນ​ແມ່ນ ໂຄງການກໍ່ສ້າງ​ຂົວ​ມິດຕະພາບ ລາວ-ໄທ ແຫ່ງ​ທີ 3 ໂຄງການ​ເສັ້ນທາງລົດໄຟ ລາວ-ໄທ ເຊື່ອມ​ໂຍງຫວຽດນາມ ແລະ  ບາງກອກ ສະໜັບສະໜູນ​ການ​ຮ່ວມ​ມື​ພາຍໃຕ້​ຂອບ​ອາ​ຊຽນ ກຸ່ມ​ປະເທດ​ລຸ່ມແມ່ນ້ຳ​ຂອງ ແລະ ຍຸດ​ທະ​ສາດການ​ຮ່ວມ​ມື​ທາງ​ດ້ານ​ເສດຖະກິດ ອະ​ຣະ​ວະ​ດີ-ເຈົ້າ​ພະຍາ-ແມ່ນ້ຳຂອງ ແລະ ອື່ນໆ ອັນ​ໄດ້​ສ້າງສາຍ​ພົວພັນ​ຮ່ວມ​ມື​ອັນ​ດີລະຫວ່າງ​ສອງ​ປະເທດ ​ໃຫ້​ນັບ​ມື​ສູງຂຶ້ນ​ເປັນ​ກ້າວໆ.

ວັນ​ທີ 11 ເມສາ 2017 ທີ່ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ໄດ້​ມີ​ພິທີ​ມອບ​ປະລິນ​ຍາ​ດຸ​ສະ​ດີ​ບັນດິດ​ກິດ​ຕິ​ມະ​ສັກຂອງມະຫາວິທະຍາໄລ​ຂອນ​ແກ່ນ ແຫ່ງ ຣາ​ຊະ​ອານາຈັກ​ໄທ ໃຫ້​ແກ່ທ່ານ ທອງ​ລຸນ ສີ​ສຸ​ສິດ ນາຍົກລັດຖະມົນຕີ ໃຫ້​ກຽດ​ມອບ​ໂດຍທ່ານ ກິດ​ຕິ​ໄຊ ໄຕຣ​ຣັດ​ສິ​ຣິ​ໄຊ ອະທິການ​ບໍດີ​ມະຫາວິທະຍາໄລຂອນ​ແກ່ນ ໂດຍ​ມີ​ທ່ານ ເພັດ ພົມ​ພິ​ພັກ ຫົວໜ້າ​ຫ້ອງ​ວ່າການສຳນັກງານ​ນາຍົກລັດຖະມົນຕີ ທ່ານ ສະເຫຼີມ​ໄຊ ກົມ​ມະ​ສິດ ລັດຖະ​ມົນຕີ​ກະຊວງ​ການ​ຕ່າງ​ປະເທດ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ໂອກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຂອບໃຈ​ມາ​ຍັງ​ທ່ານ​ອະທິການ​ບໍດີ ພະນັກ​ງານ​ຄູ-ອາຈານ ມະຫາ​ວິ​ທະຍາ​ໄລ​ຂອນ​ແກ່ນ ທີ່​ໄດ້​ມອບ​ປະລິນ​ຍາ​ອັນ​ຊົງ​ກຽດ​ດັ່ງກ່າວ ​ໃຫ້ເຊິ່ງ​ຖື​ເປັນ​ກຽດ​ຢ່າງ​ສູງ ທັງ​ເປັນການ​ໃຫ້​ກຳລັງ​ໃຈ ເພື່ອ​ສືບຕໍ່​ປະຕິ​ບັດ​ໜ້າທີ່​ໃນ​ການ​ປະກອບສ່ວນ ເຂົ້າ​ໃນ​ການ​ເສີມ​ຂະຫຍາຍ​ສາຍພົວພັນ​ມິດຕະພາບ ແລະ ການຮ່ວມ​ມື​ອັນ​ດີງາມລະຫວ່າງ​ສອງປະເທດ ລາວ-ໄທ ເປັນ​ການ​ຊຸກຍູ້​ສົ່ງເສີມ​ການ​ຮ່ວມ​ມື​ໃນ​ພາກພື້ນ ແລະ ສາກົນ ກໍ່​ຄືຄອບຄົວອາ​ຊຽນ​ໃຫ້​ມີ​ຄວາມ​ຈະເລີນ​ກ້າວໜ້າ ເປັນ​ພາກ​ພື້ນ​ທີ່​ມີ​ຄວາມ​ສັນຕິ​ພາບ ສະຖຽນ​ລະ​ພາບ ແລະ ການ​ຮ່ວມ​ມື​ພັດທະນາ​ຕາມ​ແຜນຂອງ​ຜູ້ນຳ​ອາ​ຊຽນ​ວາງ​ໄວ້​ໃຫ້​ປາກົດ​ຜົນ​ເປັນ​ຈິງ ແລະ ຫວັງ​ຢ່າງຍິ່ງ​ວ່າ ມະຫາວິທະຍາໄລ​ຂອນແກ່ນ ຈະ​ສືບຕໍ່​ໃຫ້ການ​ຮ່ວມ​ມືຊ່ວຍເຫຼືອ​ກໍ່ສ້າງ​ບຸ​ຄະລາ​ກອນລາວ ເພື່ອ​ປະກອບສ່ວນ​ເຂົ້າ​ໃນການ​ເສີມ​ຂະຫຍາຍ​ສາຍ​ພົວພັນມິດຕະພາບ ກໍ່​ຄືການ​ເພີ່ມ​ທະວີການ​ຮ່ວມ​ມື​ຂອງ​ຂະແໜງການສຶກ​ສາ ລະຫວ່າງ​ສອງ​ປະເທດ​ໃຫ້ນັບ​ມື້​ມີ​ຜົນສຳເລັດ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ