ລາວ-ຫວຽດນາມ ເພີ່ມທະວີສາຍພົວພັນ

581 18 ມ.ສ. 2017 ຂ່າວໜ້າ​ໜຶ່ງ

ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ໄດ້​ໃຫ້ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ​ນາງ ຫວໍ ທິ ຍູງ ຮອງ​ເລຂາ​ຄະນະ​ພັກນະຄອນໂຮ່​ຈີ​ມິງ ພ້ອມ​ດ້ວຍ​ຄະນະ ໃນ​ວັນທີ 11 ເມສາ 2017 ຢູ່​ສະພາ​ແຫ່ງຊາດ ໂອກາດ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ.

ທ່ານ​ປະທານ​ສະພາ​ແຫ່ງ​ຊາດ ໄດ້​ສະແດງ​ຄວາມ​ຍິນ​ດີ​ຕ້ອນຮັບຊົມເຊີຍ ພ້ອມ​ທັງ​ຕີ​ລາຄາ​ສູງ​ຕໍ່ທ່ານ​ນາງ ຫວໍ ທິ ຍູງ ພ້ອມດ້ວຍ​ຄະນະ ​ໃນ​ການ​ມາ​ຢ້ຽມຢາມຄັ້ງ​ນີ້ ເຊິ່ງ​ເປັນ​ການ​ເພີ່ມ​ທະວີ ແລະ ຮັດ​ແໜ້ນ​ສາຍ​ພົວພັນ​ມິດຕະ​ພາບ​ທີ່​ເປັນ​ມູນເຊື້ອ ຄວາມ​ສາມັກ​ຄີ​ແບບ​ພິເສດ ແລະ ເພີ່ມ​ທະວີສາຍ​ພົວພັນ​ສະໜິດສະໜົມລະຫວ່າງ ລາວ-ຫວຽດນາມ ເວົ້າສະເພາະ ນະຄອນຫຼວງ​ວຽງ​ຈັນ ແລະ ນະຄອນ​ໂຮ່​ຈີ​ມິງ ບົນ​ພື້ນຖານ​ສາຍ​ພົວພັນ​ດັ່ງກ່າວ​ເຮັດ​ໃຫ້ນະຄອນຫຼວງ​ວຽງ​ຈັນ ແລະ ນະຄອນ​ໂຮ່​ຈີ​ມິງ ໃນ​ປັດຈຸບັນ​ມີ​ການຮ່ວມ​ມື​ກັນ​ຫຼາຍ​ດ້ານ ເຊັ່ນ: ດ້ານເສດຖະກິດ ວັດທະນະທຳ-ສັງຄົມ ມີ​ການ​ແລກປ່ຽນ​ຄວາມ​ຮູ້​ດ້ານ​ວິຊາ​ການ ໃຫ້ການ​ຊ່ວຍ​ເຕັກນິກການ​ລ້ຽງ​ງົວ​ພັນ​ຊີ້ນ ແລະ ອື່ນໆ ເຮັດ​ໃຫ້​ທັງ​ສອງ​ນະຄອນ​ນັບ​ມື້ນັບ​ໄດ້​ຮັບ​ການ​ພັດທະນາ​ຢ່າງ​ບໍ່ຢຸດ​ຢັ້ງ ພາຍ​ໃຕ້​ການ​ຮ່ວມ​ມື ແລະ ຊ່ວຍເຫຼືອ.

ພ້ອມ​ນີ້ ທ່ານ​ນາງ ຫວໍ ທິ ຍູງ ຕາງໜ້າ​ຄະນະ​ຍັງ​ໄດ້​ຖື​ໂອກາດນີ້​ອວຍພອນ​ປີ​ໃໝ່ ແລະ ສະແດງຄວາມ​ຂອບໃຈ​ຕໍ່​ປະທານ​ສະພາ ທີ່​ໄດ້​ສະຫຼະ​ເວລາ​ອັນ​ມີຄ່າ​ ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ໃນ​ຄັ້ງ​ນີ້ ພ້ອມ​ທັງ​ຈະ​ຍັງ​ສືບຕໍ່​ຮ່ວມ​ມື​ໃນວຽກ​ງານ​ຕ່າງໆ​ຕໍ່​ໄປ​ອີກ​ໃນ​ອະນາ​ຄົດ.

ຂ່າວທີ່ກ່ຽວຂ້ອງ