ສະຫຼອງບຸນປີໃໝ່ລາວ ດ້ວຍບັນຍາກາດເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດ

475 18 ມ.ສ. 2017 ຂ່າວໜ້າ​ໜຶ່ງ
ສະຫຼອງບຸນປີໃໝ່ລາວ ດ້ວຍບັນຍາກາດເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດ

ການ​ສະເຫຼີມສະຫຼອງ​ບຸນ​ປະເພນີ​ປີ​ໃໝ່​ລາວ ​ພສ 2560 ດຳເນີນ​ໄປ​ດ້ວຍ​ບັນຍາກາດ​ເບີກບານ​ມ່ວນຊື່ນ ນັບ​ແຕ່​ຂັ້ນ​ສູນ​ກາງຈົນ​ເຖິງ​ທ້ອງຖິ່ນ ໂດຍ​ສະເພາະ ຊາວ​ນະຄອນຫຼວງ​ວຽງ​ຈັນ ໄດ້ຮ່ວມ​ກັນ​ອະນຸ​ຮັກ ແລະ ລະ​ຫຼິ້ນບຸນ​ກຸດ​ສົງການ​ສົ່ງ​ທ້າຍ​ປີ​ເກົ່າ ແລະ ຕ້ອນຮັບ​ປີ​ໃໝ່​ລາວ​ຢ່າງເປັນ​ຂະ​ບວນ​ຟົດຟື້ນ ເຊິ່ງ​ເທສະການ​ບຸນ​ປະເພນີ​ປີ​ໃໝ່​ລາວ​ປີ​ນີ້ ຈັດ​ຂຶ້ນ​ລະຫວ່າງ​ວັນ​ທີ 14-16 ເມສາ 2017 ອຳນາດ​ການ​ປົກຄອງ​ນະຄອນຫຼວງ​ວຽງ​ຈັນ ກໍ່​ຄືພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ໄດ້​ຈັດ​ໃຫ້​ມີ​ຫຼາຍກິດຈະກຳ​ທີ່​ສົ່ງເສີມ​ຄວາມ​ສາມັກ​ຄີ ຮັກສາ​ຮີດຄອງ​ປະເພນີ​ປີໃໝ່​ລາວ​ໃຫ້​ຢູ່​ຄຽງ​ຄູ່​ກັບ​ສັງຄົມຕະຫຼອດ​ໄປ ແລະ ກິດຈະກຳຕ່າງໆ ​ໄດ້​ຮັບ​ຄວາມ​ສົນໃຈ​ຈາກຊາວ​ນະຄອນຫຼວງ​ວຽງ​ຈັນ ຕ່າງແຂວງ ແລະ ຊາວ​ຕ່າງປະເທດຫຼາຍ​ສົມຄວນ.

ວັນ​ທີ 12 ເມສາ 2017 ຢູ່ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ໄດ້​ຈັດ​ພິທີ​ບາສີ​ສູ່ຂວັນ ແລະ ອວຍພອນ​ໃຫ້ການນຳ​ນະຄອນຫຼວງ ມີ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງຊາດ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ບັນດາ​ການ​ນຳ​ນະຄອນຫຼວງ ແລະ ພະນັກງານ​ທຸກ​ຂະແໜງການ​ເຂົ້າ​ຮ່ວມ ວັນ​ທີ 14 ເມສາ 2017 ເຊິ່ງ​ເປັນ​ມື້​ເລີ່ມ​ຕົ້ນ​ຂອງການ​ຈັດ​ງານ​ສະເຫຼີມສະຫຼອງ​ປີໃໝ່​ລາວ​ທີ່​ວັດ​ອິນ​ແປງ ນຳ​ໂດຍທ່ານ ສິນ​ລະ​ວົງ ຄຸດ​ໄພທູນ ເຈົ້າຄອງ​ນະຄອນຫຼວງ​ວຽງ​ຈັນ ໄດ້​ນຳພາ​ຫົດ​ນ້ຳ​ພະ​ພຸດ​ທະ​ຮູບ ຫົວ​ພະຍາ​ກະບິນ​ລະ​ພົມ ພ້ອມ​ທັງ​ຈັດ​ຂະບວນ​ແຫ່​ພະ​ພຸດ​ທະ​ຮູບ ແລະ ຫົວພະຍາກະບິນ​ລະ​ພົມ​ອ້ອມ​ເມືອງ ນຳ​ໜ້າ​ໂດຍ​ທ່ານ ສີ​ຫຸນ ສິດທິ​ລືໄຊ ຮອງ​ເຈົ້າ​ຄອງ​ນະຄອນຫຼວງວຽງ​ຈັນ ເລີ່ມ​ຈາກ​ຂະ​ບວນ​ແຫ່ຂອງ​ພະ​ພຸດ​ທະ​ຮູບ ພະສົງ​ສາ​ມະເນນ ຕາມ​ມາ​ດ້ວຍ​ການ​ນຳ​ນະຄອນ​ຫຼວງ ເຖົ້າ​ແກ່​ແນວ​ໂຮມ ອົງການຈັດຕັ້ງ​ມະຫາຊົນ ຂະ​ບວນນາງ​ສາວ​ນະຄອນຫຼວງ ຕົວ​ແທນລູກ​ສາວ​ທັງ 7 ຂອງ​ພະຍາ​ກະບິນ​ລະ​ພົມ ຕໍ່​ມາ​ແມ່ນ​ຂະ​ບວນມວນ​ຊົນ ແລະ ປິດ​ທ້າຍ​ດ້ວຍ​ຂະບວນ​ມະໂຫລີ​ດົນຕີ​ພື້ນເມືອງ​ລາວ ​ຢ່າງ​ເປັນ​ຂະ​ບວນ​ຟົດຟື້ນ​ມ່ວນຊື່ນ ​ຕາມ​ແບບ​ປະເພນີ​ທີ່​ສືບ​ທອດ​ກັນມາ​ຫຼາຍເຊັ່ນຄົນ ຂະ​ບວນ​ແຫ່ເລີ່ມ​ຈາກ​ວັດ​ອິນ​ແປງ​ໄປ​ຕາມເສັ້ນທາງ​ເຊດ​ຖາ​ທິ​ລາດ ຫາ​ນ້ຳພຸ ລ້ຽວ​ອອກ​ເສັ້ນທາງ​ເຈົ້າຟ້າ​ງຸ່ມ ແລ້ວ​ກັບ​ຄືນ​ມາ​ວັດ​ອິນ​ແປງ ແລະ ວັນ​ທີ 15 ເມສາ 2017 ຈັດໃຫ້​ມີ​ການ​ແຂ່ງຂັນ​ກີລາ​ຢູ່​ຫາດຊາຍ​ດອນ​ຈັນ.

ເນື່ອງ​ໃນ​ໂອກາດ​ວັນ​ສັງຂານຂຶ້ນ (ວັນ​ຂຶ້ນ​ປີ​ໃໝ່​ລາວ) ​ພສ 2560 ກົງ​ກັບ​ວັນ​ທີ 16 ເມສາ 2017 ຕອນ​ເຊົ້າ​ສາ​ສະ​ນິ​ກະ​ຊົນຊາວ​ນະຄອນຫຼວງ​ວຽງ​ຈັນ ຜູ້​ເຖົ້າຜູ້​ແກ່ ໄວ​ໜຸ່ມ ຍິງ​ສາວ ຕ່າງ​ກໍ່ເຂົ້າ​ວັດ​ຟັງ​ທຳ ທຳບຸນ​ໃສ່​ບາດຖວາຍ​ວັດຖຸ​ປັດ​ໄຈ​ໄຊ​ຍະ​ທານຕາມ​ວັດ​ວາ​ອາ​ຮາມ​ຕ່າງໆ ທີ່​ວັດພະ​ເຈົ້າ​ອົງ​ຕື້​ໃຫຍ່​ມະຫາ​ວິຫານ ເມືອງ​ຈັນທະ​ບູ​ລີ ນະຄອນຫຼວງວຽງ​ຈັນ ກໍ່​ມີ​ພໍ່​ແມ່​ປະຊາຊົນ​ເຂົ້າຮ່ວມ​ພິທີ​ໃສ່​ບາດ​ ຮັບ​ສິນ​ຮັບ​ພອນໃນ​ວັນ​ປີ​ໃໝ່​ເຊັ່ນ​ດຽວ​ກັນ ສ່ວນຕອນ​ບ່າຍ​ກິດຈະກຳ​ໜຶ່ງ​ທີ່​ຂາດ​ບໍ່ໄດ້ ​ໃນ​ງານ​ສະເຫຼີມສະຫຼອງ​ປີ​ໃໝ່​ກຸດ​ສົງການ ແມ່ນ​ການ​ຕົບ​ພະທາດ​ຊາຍ ເປັນ​ກິດຈະກຳ​ປິດທ້າຍ​ການ​ສະເຫຼີມສະຫຼອງ​ປີ​ໃໝ່ລາວ ເປັນ​ປະເພນີ​ທີ່​ສືບ​ທອດ​ກັນມາ​ແຕ່​ດົນ​ນານ ເຊິ່ງ​ປີຜ່ານມາ​ມີ 45 ຫົວໜ່ວຍ​ເຂົ້າ​ຮ່ວມ ສະເພາະປີ​ນີ້​ມີ 33 ຫົວໜ່ວຍ ມາ​ຈາກເມືອງ​ສີ​ສັດຕະ​ນາກ ສີ​ໂຄດ​ຕະບອງ ແລະ ເມືອງ​ຈັນທະ​ບູ​ລີ ຈາກ​ນັ້ນ ເວລາ​ຕໍ່​ມາ​ກໍ່​ມີ​ພິທີ​ປິດການ​ແຂ່ງຂັນ​ກີລາ​ມວນ​ຊົນ​ທີ່ຫາດ​ຊາຍ​ດອນ​ຈັນ.

ໂດຍ​ລວມ​ແລ້ວ ຕະຫຼອດ​ໄລຍະ 3 ວັນຂອງ​ການ​ສະເຫຼີມ​ສະຫຼອງ​ບຸນ​ປະເພນີ​ປີ​ໃໝ່​ລາວ ​ພສ 2560 ຢູ່​ນະຄອນຫຼວງ​ວຽງ​ຈັນ ຖື​ວ່າ​ປະສົບ​ຜົນສຳເລັດ​ຕາມ​ຄາດໝາຍ​ວາງ​ໄວ້ ຊາວ​ນະຄອນຫຼວງວຽງ​ຈັນ ​ໄດ້​ຮ່ວມ​ຫຼິ້ນ​ບຸນປີໃໝ່ດ້ວຍ​ຄວາມ​ສາມັກຄີ​ປອງ​ດອງ ຮັກສາ​ໄດ້​ວັດທະນະທຳ​ຮີດຄອງປະເພນີ​ອັນ​ດີງາມ​ຂອງ​ຊາດ ​ໄວ້ໃຫ້​ລູກ​ຫຼານ​ໄດ້​ສືບ​ທອດ​ຕໍ່ໆ​ໄປ.

ຂ່າວທີ່ກ່ຽວຂ້ອງ