ລົງມືປູກຫຍ້າເຂດບຶງທາດຫຼວງ ສະໜອງຟາມງົວ

416 19 ມ.ສ. 2017 ຂ່າວໜ້າ​ໜຶ່ງ
ລົງມືປູກຫຍ້າເຂດບຶງທາດຫຼວງ ສະໜອງຟາມງົວ

ຕາມ​ແຄມ​ສອງ​ຟາກ​ບຶງ​ທາດຫຼວງ ​ກຳລັງ​ຈະ​ເປັນ​ສີຂຽວ​ດ້ວຍ​ຫຍ້າຊະນິດ​ຕ່າງໆ ທີ່​ທາງ​ສະມາຄົມ​ຜູ້​ປະກອບ​ການ​ລ້ຽງ​ງົວ ນະຄອນຫຼວງວຽງ​ຈັນ ກຳລັງ​ເລີ່ມ​ລົງມື​ປູກ​ເພື່ອ​ນຳ​ຫຍ້າ​ໄປ​ສະໜອງ​ໃຫ້​ກັບ​ສະ​ມາຊິກ ແລະ ຟາມ​ທີ່​ມີ​ຄວາມ​ຕ້ອງການຄາດ​ວ່າ​ອີກ 2 ເດືອນ​ຂ້າງ​ໜ້າ ຈະ​ສາມາດ​ຂະຫຍາຍ​ແນວ​ພັນ​ຫຍ້າ.

ທ່ານ ຈັນ​ເພັງ ອິນ​ສະຫວັນ ປະທານ​ສະມາຄົມ​ຜູ້​ປະກອບ​ການ​ລ້ຽງງົວ ນະຄອນຫຼວງ​ວຽງ​ຈັນ (ນວ) ກ່າວ​ວ່າ: ພາຍຫຼັງ​ທີ່​ໄດ້​ຮັບ​ອະນຸມັດ​ຈາກ​ເຈົ້າ​ຄອງ ນວ ເຂດບຶງ​ທາດຫຼວງ ເນື້ອທີ່ 1.500 ເຮັກຕາ ໄດ້​ຮ່ວມ​ມື​ກັບ​ພາກສ່ວນທີ່​ກ່ຽວຂ້ອງ​ສຳ​ຫຼວດ​ສຳເລັດ 200 ເຮັກຕາ ມາ​ເຖິງ​ວັນ​ທີ 6 ເມສາ 2017 ໄດ້​ເລີ່ມ​ປູກ​ຫຍ້າ​ຈຳນວນ​ໜຶ່ງ​ເປັນ​ຊະນິດ​ທີ່​ທົນ​ທານ​ຕໍ່ນ້ຳ​ຖ້ວມ​ໄດ້​ດີ ເຊິ່ງ​ມີ​ກຳນົດ​ນັບຈາກ​ມື້​ປູກ​ປະມານ 45 ວັນ ກໍ່​ສາມາດ​ຕັດ​ໄປ​ຈຳໜ່າຍ ຫຼື ນຳໄປ​ຂະຫຍາຍ​ພັນ.

ສຳລັບ​ການ​ປູກ​ເບື້ອງ​ຕົ້ນ​ແມ່ນ 5 ເຮັກຕາ ໃນ​ເນື້ອທີ່ 200 ເຮັກຕາ​ທີ່​ມີ​ການ​ສຳ​ຫຼວດ​ສຳເລັດ​ ຈະນຳ​ເອົາ​ແນວ​ພັນ​ທີ່​ປູກ​ຄັ້ງ​ທຳ​ອິດນີ້​ໄປ​ຂະຫຍາຍ​ຕື່ມ ເນື່ອງ​ຈາກຫຍ້າ​ຊະນິດ​ດັ່ງກ່າວ ​ເປັນ​ແນວ​ພັນ​ທີ່​ນຳ​ເຂົ້າ​ຈາກ​ຕ່າງປະເທດ ຕາມແຜນການ​ໃນ​ຈຳນວນ​ເນື້ອທີ່​ທັງໝົດ​ເຂດ​ບຶງ​ທາດຫຼວງ ນັບ​ແຕ່​ຂົວໜອງ​ໜ່ຽງ​ໄປ​ຫາ​ຫ້ວຍ​ໝາກ​ຮຽວ ​ໂດຍ​ຈະ​ປູກ​ຫຍ້າ​ລ້ຽງ​ງົວ 4 ຊະນິດ ປະກອບ​ມີ: ຫຍ້າ​ດູ​ຊີ ກິ​ນິ​ຊີ ງວງ ນີ​ເປຍ ແລະ ແຟຣງ​ໂກ​ລາ ແລະ ພືດ​ສາລີ ພືດ​ຖົ່ວ​ຈຳນວນໜຶ່ງ ​ເພື່ອ​ສະໜອງ​ໃຫ້​ກັບ​ບັນດາຟາມ​ທີ່​ເປັນ​ສະມາຊິກ ແລະ ຟາມທີ່​ມີ​ຄວາມ​ຕ້ອງການ ເພາະ​ຜ່ານມາ​ບັນດາ​ຟາມ​ແມ່ນ​ມີ​ຫຍ້າ​ທີ່​ໄດ້ຈາກ​ການ​ປູກ​ແບບ​ຈຳກັດ ເຊັ່ນ: ຫຍ້າ​ນີ​ເປຍ ປາກ​ຊອງ​ນຶງ ແລະ ເຟືອງ​ແຫ້ງ​ເປັນ​ອາຫານ​ໃຫ້​ແກ່ງົວ.

ພາຍຫຼັງ​ປູກ​ຫຍ້າ​ສຳເລັດ ​ສະມາ​ຄົມ​ຈະ​ມີ​ການ​ນຳ​ເຂົ້າ​ງົວ​ຈາກຕ່າງປະເທດ​ມາ​ລ້ຽງ ​ເພື່ອ​ສະໜອງ​ໃຫ້​ກັບ​ຕະຫຼາດ​ພາຍ​ໃນ​ ທີ່ເຫັນ​ວ່າ​ຍັງ​ມີ​ຄວາມ​ຕ້ອງການ​ສູງ ແລະ ສະໜອງ​ໃຫ້​ກັບ​ນະຄອນໂຮ່​ຈິ​ມິງ ​ສສ ຫວຽດນາມ ທີ່​ໄດ້ມີ​ການ​ເຊັນ​ສັນຍາ​ກັບ ນວ ທັງ​ນີ້ກໍ່​ຂຶ້ນ​ກັບ​ຄວາມ​ສາມາດ​ໃນ​ການສະໜອງ​ຂອງ ນວ ກໍ່​ຄື​ສະມາຄົມຜູ້​ປະກອບ​ການ​ລ້ຽງ​ງົວ ໂດຍ​ຕົວເລກ​ສະເລ່ຍ​ເບື້ອງ​ຕົ້ນ​ໂຮ່​ຈິ​ມິງຕ້ອງການ​ງົວ​ຈາກ ນວ 400 ໂຕຕໍ່​ວັນ ນ້ຳໜັກ​ງົວ​ຕ້ອງ​ຢູ່​ໃນ​ເກນ 400 ກິ​ໂລ​ຂຶ້ນ​ໄປ.

ທ່ານ ຈັນ​ເພັງ ອິນ​ສະຫວັນ ກ່າວ​ຕື່ມ​ວ່າ: ຕາມ​ແຜນການເບື້ອງ​ຕົ້ນ​ຈະ​ປູກ​ຫຍ້າ​ໃຫ້​ສຳເລັດກ່ອນ​ຈະ​ມີ​ການ​ນຳ​ເອົາ​ງົວ​ເຂົ້າມາ ເຊິ່ງ​ສະມາຄົມ​ຈະ​ແບ່ງ​ການລ້ຽງ​ງົວ​ອອກ​ເປັນ 3 ສ່ວນຄື: ສ່ວນ​ລ້ຽງ​ພໍ່​ພັນ​ແມ່​ພັນລູກ ແລະ ງົວ​ຂຸນ ການຈຳໜ່າຍ​ຂັ້ນ​ຕົ້ນແມ່ນ​ຈະ​ເນັ້ນ​ຕະຫຼາດ​ພາຍ​ໃນ.

ຂ່າວທີ່ກ່ຽວຂ້ອງ