ງານວາງສະແດງສິນຄ້າເຟີນີເຈີວຽງຈັນ ຄັ້ງທີ 2 ມີມູນຄ່າການຊື້-ຂາຍ 80%

393 19 ມ.ສ. 2017 ຂ່າວໜ້າ​ໜຶ່ງ
ງານວາງສະແດງສິນຄ້າເຟີນີເຈີວຽງຈັນ ຄັ້ງທີ 2 ມີມູນຄ່າການຊື້-ຂາຍ 80%

ທ່ານ ກອງ​ມາລາ ພົມມາ​ໄລ ຮອງ​ປະທານ​ສະມາຄົມ​ເຟີ​ນີ​ເຈີລາວ (​ສຟລ) ປະທານ​ບໍລິສັດ ເຄ​ແອນ​ບີ​ເນີ​ເຈີ ໄດ້​ໃຫ້​ສຳພາດວ່າ: 2nd Vientiane Furniture Fair 2017 ໄດ້​ຈັດ​ຂຶ້ນ​ວັນ​ທີ 1-9 ເມສາ 2017 ຢູ່​ສູນ​ການ​ຄ້າ ລາວ-ໄອ​ເຕັກ ໂດຍ​ມີ​ຜູ້​ປະກອບ​ການດ້ານ​ເຟີ​ນີ​ເຈີຈາກ​ນະຄອນຫຼວງວຽງ​ຈັນ ແລະ ຕ່າງ​ແຂວງ ຈຳນວນ 118 ຫ້ອງ​ວາງສະແດງ ໄດ້ນຳ​ເອົາ​ຜະລິດ​ຕະ​ພັນ​ເຄື່ອງ​ເຟີ​ນີເຈີ​ທີ່​ຜະລິດ​ດ້ວຍ​ໄມ້​ຫວາຍ ໄມ້ປ່ອງ ແລະ ວັດ​ສະ​ດຸ​ເສດ​ເຫຼືອ​ເຮັດເປັນ​ເຄື່ອງ​ເຟີ​ນີ​ເຈີ ຜະລິດ​ຕະ​ພັນຫັດຖະກຳ​ແກະສະຫຼັກ ເບ້ຍ​ໄມ້ ແລະ ອຸປະກອນ​ປະກອບ-ຮັບໃຊ້​ເຄື່ອງມື ແລະ ເຄື່ອງ​ຈັກຕ່າງໆ​ກ່ຽວ​ກັບ​ການ​ຜະລິດ​ເຟີ​ນີເຈີ​ໄມ້​ມາ​ວາງສະແດງ ແລະ ຈຳໜ່າຍໃນ​ລາຄາ​ໂຮງງານ ບັນ​ຍາກາດ​ການ​ຈັດ​ງານ​ຄັ້ງ​ນີ້​ແມ່ນ​ມີຄວາມ​ຄຶກຄື້ນ​ກວ່າ​ຄັ້ງ​ຜ່ານ​ມາ ສະແດງ​ອອກບັນດາ​ຜູ້​ປະກອບການ​ເຟີ​ນີ​ເຈີ ​ສາມາດ​ຈຳໜ່າຍສິນຄ້າ​ໄດ້​ຫຼາຍ​ສົມຄວນ ຍ້ອນ​ລູກຄ້າ​ໄດ້​ພົບ​ປະ​ໂດຍ​ກົງ​ກັບ​ຜູ້​ຜະລິດ ເຮັດ​ໃຫ້​ສາມາດ​ເລືອກ​ຊື້​ຜະລິດຕະ​ພັນ​ໄດ້​ຕາມ​ຄວາມ​ຕ້ອງການ ນອກ​ນີ້ຍັງ​ມີ​ການ​ຫຼຸດ​ລາຄາ​ພິເສດ​ຕ້ອນຮັບ​ປີ​ໃໝ່​ລາວ ແລະ ມີ​ກິດຈະກຳ​ອື່ນໆທີ່​ໜ້າ​ສົນໃຈ ຈຶ່ງ​ເຮັດ​ໃຫ້​ລູກ​ຄ້າ​ຫຼັ່ງໄຫຼ​ເຂົ້າ​ມາຊົມ ແລະ ຊື້​ສິນຄ້າ​ຢ່າງ​ຄຶກຄື້ນ.

2nd Vientiane Furniture Fair 2017 ມີ​ຜົນສຳເລັດ​ເປັນຢ່າງ​ດີ ຍ້ອນ​ໄດ້​ຮັບ​ການ​ຮ່ວມ​ມືຢ່າງ​ໃກ້ຊິດ​ຈາກ​ຫຼາຍ​ພາກສ່ວນທາງ​ພາກ​ລັດ ແລະ ພາກ​ທຸລະກິດ ບວກ​ໃສ່​ຄວາມ​ເອົາໃຈໃສ່ຢ່າງ​ຕັ້ງໜ້າ ແລະ ເປັນ​ເຈົ້າການ​ຂອງ​ຄະນະ​ບໍລິຫານ ແລະ ສະມາຊິກ ​ສຟລ ທຸກ​ຄົນ ເຮັດໃຫ້​ງານ​ຄັ້ງ​ນີ້​ມີ​ຜົນສຳເລັດ​ຢ່າງໜ້າ​ເພິ່ງ​ພໍໃຈ ສະແດງ​ອອກ​ມູນຄ່າ​ສິນຄ້າ​ທີ່​ນຳ​ມາ​ຈຳໜ່າຍ​ທັງໝົດ 40 ຕື້​ກີບ ສາມາດ​ມີ​ການ​ຊື້-ຂາຍ​ເຖິງ 32 ຕື້​ກີບ ຫຼື ເທົ່າ​ກັບ 80% ພິເສດ​ໃນ​ງານ​ຄັ້ງ​ນີ້ ນອກຈາກ​ຜູ້​ປະກອບ​ການ​ຈະ​ໄດ້​ຈຳໜ່າຍ​ສິນຄ້າ​ຫຼາຍ​ສົມຄວນ​ແລ້ວ ຍັງ​ໄດ້​ຮັບ​ການ​ສັ່ງ​ຊື້​ຈາກ​ລູກ​ຄ້າ​ທີ່​ມາ​ຮ່ວມ​ງານ​ຫຼາຍ​ກວ່າ 10 ຕື້​ກີບອີກ​ດ້ວຍ.

ຂ່າວທີ່ກ່ຽວຂ້ອງ