ເປີດນຳໃຊ້ອາຄານສູນເລືອດຫຼັງໃໝ່

337 19 ມ.ສ. 2017 ຂ່າວໜ້າ​ໜຶ່ງ
ເປີດນຳໃຊ້ອາຄານສູນເລືອດຫຼັງໃໝ່

ຍ້ອນ​ຄວາມ​ເອົາໃຈໃສ່​ຂອງພັກ-ລັດຖະບານ ໃນ​ການ​ພັດ​ທະນາ​ທາງ​ດ້ານ​ວິຊາ​ການ ໂດຍສະເພາະ ວຽກ​ງານ​ບໍລິຈາກເລືອດ​ທີ່​ປອດ​ໄພແກ່​ປະຊາຊົນບັນດາເຜົ່າ ​ໃນ​ຂອບ​ເຂດ​ທົ່ວ​ປະເທດ ໃຫ້​ນັບ​ມື້​ດີ​ຂຶ້ນ​ເທື່ອ​ລະ​ກ້າວ ອາຄານ​ສູນ​ເລືອດ​ຫຼັງ​ໃໝ່ ໄດ້ເລີ່ມ​ກໍ່ສ້າງ​ມາ​ແຕ່ສົກ​ປີ 2011-12 ເປັນ​ອາຄານ 4 ຊັ້ນ ທຶນ​ກໍ່ສ້າງ​ຂອງ​ລັດຖະບານ ລວມ​ມູນຄ່າ 12 ຕື້​ກວ່າ​ກີບ ໂດຍ​ບໍລິສັດ ວິໄລ​ພອນ​ກໍ່ສ້າງ ເປັນ​ຜູ້​ຮັບ​ເໝົາກໍ່ສ້າງ.

ສຳລັບ​ຊັ້ນ​ທີ 1 ຂອງ​ອາຄານເປັນ​ບ່ອນ​ເກັບ​ຮັກສາ-ຜະລິດສ່ວນ​ປະກອບ​ຂອງ​ເລືອດ ແລະ ແຈກ​ຈ່າຍ​ເລືອດ ຊັ້ນ 2 ເປັນບ່ອນ​ຂຽນ​ໃບ​ສະໝັກ​ຜູ້​ບໍລິຈາກເລືອດ ຫ້ອງ​ເຈາະ​ເກັບ​ເລືອດ ບ່ອນ​ພັກຜ່ອນ​ຜູ້​ບໍລິຈາກ​ເລືອດ ບ່ອນ​ເກັບ​ຂໍ້​ມູນ​ຕ່າງໆ​ກ່ຽວ​ກັບ​ຜູ້​ບໍລິຈາກ​ເລືອດ​ທັງ​ໝົດ ຊັ້ນ 3 ແມ່ນ​ຫ້ອງ​ວິເຄາະ ວິໄຈ​ເລືອດ ຫ້ອງ​ວິເຄາະ​ພະຍາດ ຫ້ອງ​ກວດໝວດ​ເລືອດ​ທີ່​ເຂົ້າກັນ​ໄດ້ ແລະ ຊັ້ນ 4 ເປັນ​ຫ້ອງ​ປະຊຸມ ຫ້ອງ​ໄອ​ທີ ຫ້ອງ​ບໍລິຫານ​ແຜນການ-ການເງິນ ແລະ ຫ້ອງ​ສະໝຸດ ອາຄານແຫ່ງ​ນີ້ ສ້າງ​ຂຶ້ນ​ເພື່ອ​ອຳນວຍຄວາມ​ສະດວກ​ໃຫ້​ແກ່​ວຽກ​ງານການ​ບໍລິຈາກ​ເລືອດ​ປອດ​ໄພ ທັງເປັນ​ການ​ຍົກ​ລະດັບ​ຄຸນະພາບດ້ານ​ການ​ປິ່ນປົວ​ຂອງ​ທ່ານໝໍ ໃຫ້ແກ່​ຄົນ​ເຈັບ​ໃນ​ຂອບ​ເຂດ​ທົ່ວ​ປະເທດ ກາຍເປັນ​ສູນ​ລວມ​ຂອງການ​ບໍລິຈາກ​ເລືອດ​ທີ່​ປອດ​ໄພ ສາມາດ​ພັດທະນາ​ວຽກ​ງານ​ບໍ​ລິຈາກ​ເລືອດ​ໃຫ້​ທັນ​ສະໄໝ ວ່ອງໄວ ເທົ່າ​ທຽມ​ພາກ​ພື້ນ ແລະ ສາກົນ.

ພິທີ​ມອບ-ຮັບອາຄານ​ສູນເລືອດ​ຫຼັງ​ໃໝ່ ​ຈັດ​ຂຶ້ນ​ໃນ​ວັນ​ທີ 12 ເມສາ 2017 ທີ່​ສູນ​ດັ່ງກ່າວ ​ຕັ້ງ​ຢູ່ດ້ານ​ຫຼັງ​ຂອງ​ອາຄານ​ຫຼັງ​ເກົ່າ ໂດຍ​ມີ​ທ່ານ ຄຳ​ຮຸ່ງ ເຮືອງ​ວົງ​ສີ ປະທານ​ອົງການ​ກາແດງ​ລາວ ທ່ານ ບຸນ​ກອງ ຊາ​ພັກດີ ປະທານບໍລິສັດ ວິໄລ​ພອນ​ກໍ່ສ້າງ ພ້ອມທ່ານ​ຮອງ​ປະທານ​ກາແດງ ແຂກຖືກ​ເຊີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ