ລາວ ສຸມໃສ່ແກ້ໄຂບັນຫາ ລບຕ ແນໃສ່ຫຼຸດຈຳນວນຜູ້ເຄາະຮ້າຍ

401 19 ມ.ສ. 2017 ຂ່າວໜ້າ​ໜຶ່ງ
ລາວ ສຸມໃສ່ແກ້ໄຂບັນຫາ ລບຕ ແນໃສ່ຫຼຸດຈຳນວນຜູ້ເຄາະຮ້າຍ

ໃນ​ແຕ່​ລະ​ປີ ​ໄດ້​ມີ​ປະຊາຊົນໄດ້​ຮັບ​ຜົນ​ກະທົບ​ຈາກ​ບັນຫາ​ລະເບີດ​ບໍ່​ທັນ​ແຕກ (​ລບຕ) ເຮັດ​ໃຫ້ປະຊາຊົນ​ລາວ​ບັນດາເຜົ່າເສຍຊີວິດ ແລະ ບາດເຈັບ​ຈຳນວນຫຼວງຫຼາຍ ສະເລ່ຍ​ແຕ່​ປີ 1964-2008 ມີ​ປະມານ 300 ຄົນ​ຕໍ່​ປີ ແລະ 2009 ເຖິງ​ປັດຈຸບັນ ມີ​ປະມານ 50 ຄົນ​ຕໍ່​ປີ ພ້ອມ​ນີ້ ​ລບຕ ຍັງ​ກົດ​ໝ່ວງ​ການ​ທຳ​ມາ​ຫາ​ກິນ ເຮັດ​ໃຫ້​ປະຊາຊົນ​ລາວ​ທຸກ​ຍາກ ເຊິ່ງ​ໃນ 46 ເມືອງ​ທຸກ​ຍາກ​ທີ່​ສຸດນັ້ນ​ມີ ​ລບຕ ຢູ່ 41 ເມືອງ.

ເພື່ອ​ແກ້​ໄຂ​ບັນຫາ​ນີ້ ໃນ​ຊຸມ​ປີຕໍ່ໜ້າ​ນີ້ ​ສປປ ລາວ ຈະ​ສຸມ​ໃສ່ຈັດ​ຕັ້ງ​ປະຕິບັດ​ບັນດາ​ຄາດໝາຍວຽກ​ງານ​ແກ້​ໄຂ​ບັນຫາ​ລະເບີດ​ບໍ່ທັນ​ແຕກ (​ລບຕ) ໃຫ້​ສຳເລັດ ໂດຍ​ສະເພາະການ​ສຳ​ຫຼວດ​ບໍ່ແມ່ນ​ວິຊາ​ການ​ຢູ່ 3.800 ກວ່າບ້ານທີ່​ມີ​ຂໍ້​ມູນ​ການ​ຖີ້ມ​ລະເບີດ ເພື່ອ​ຊອກ​ຫາ​ຈຸດ​ຫຼັກ​ຖານ ​ລບຕ ສຳ​ຫຼວດ​ວິຊາ​ການ​ໄປ​ຕາມ​ຫຼັກຖານ​ທີ່​ໄດ້​ຈາກ​ການ​ສຳ​ຫຼວດ ບໍ່ແມ່ນ​ວິຊາ​ການເພື່ອ​ຊອກ​ຫາ ​ລບຕ ດຳເນີນ​ການ​ກວດ​ກູ້ ​ລບຕ ຕາມ​ບຸລິມະສິດ​ຈຸດ​ສຸມ​ພັດທະນາໂຄງການ​ພັດທະນາ​ຕ່າງໆ ແລະ ພື້ນ​ທີ່ທີ່​ປະຊາຊົນ​ຈະ​ເຮັດ​ການຜະລິດ ສືບຕໍ່​ໂຄສະນາ​ທີ່​ມາ ແລະ ຜົນ​ຮ້າຍ​ຂອງ ​ລບຕ ແນໃສ່​ຫຼຸດຈຳນວນຜູ້​ຖືກ​ເຄາະ​ຮ້າຍ​ຈາກ ​ລບຕ ໃຫ້​ຕ່ຳ​ກວ່າ 40 ຄົນ​ຕໍ່​ປີ ແລະ ສືບຕໍ່​ຊ່ວຍເຫຼືອ​ຜູ້​ເຄາະຮ້າຍ​ຈາກ ​ລບຕ ທາງ​ດ້ານ​ການປິ່ນປົວ​ການ​ຟື້ນ​ຟູ​ສຸຂະພາບ ແລະ ການ​ປະກອບ​ອາຊີບ ໃຫ້​ໄດ້​ປະມານ 1.500 ຄົນ.

ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ໄດ້ກ່າວ​ໃນ​ວັນ​ທີ 4 ເມສາ ວັນ​ສາກົນ​ໂຄສະນາ​ເພື່ອ​ຕ້ານ​ລະເບີດບໍ່​ທັນ​ແຕກ ປີ 2017 ວ່າ: ເພື່ອບັນລຸ​ຕາມ​ຄາດໝາຍ​ທີ່​ກ່າວ​ມານັ້ນ ​ລັດຖະບານ​ຈະ​ເປັນ​ເຈົ້າ​ການສ້າງ​ແຜນ​ງານ ໂຄງການ ແລະ ກຳນົດ​ບຸລິມະສິດ​ຢ່າງ​ລະອຽດ ກໍ່​ຄື​ຈະ​ປະກອບສ່ວນ​ທຶນຮອນ ເພື່ອ​ເປັນ​ທຶນ​ສົມທົບ​ກັບ​ສາກົນ ເຂົ້າ​ໃນ​ວຽກ​ງານ​ດັ່ງກ່າວ​ຕາມຄວາມ​ເໝາະ​ສົມ ພ້ອມ​ຮຽກຮ້ອງມາ​ຍັງ​ບັນດາ​ອົງ​ການຈັດຕັ້ງ​ສາກົນ ແລະ ບັນດາ​ປະເທດ​ຜູ້​ໃຫ້ທຶນ​ຈົ່ງ​ສືບຕໍ່​ສະໜັບສະໜູນ​ວຽກງານ​ນີ້​ຕໍ່​ໄປ​ໃນ​ອະນາຄົດ ເພື່ອເຮັດ​ໃຫ້​ບັນຫາ ​ລບຕ ໝົດ​ໄປ​ຈາກດິນແດນ ​ສປປ ລາວ ເທື່ອ​ລະກ້າວ.

ຂ່າວທີ່ກ່ຽວຂ້ອງ