ຮອງນາຍົກ ເຄື່ອນໄຫວຕິດຕາມໂຄງການໄຟຟ້ານ້ຳອູ

487 19 ມ.ສ. 2017 ຂ່າວໜ້າ​ໜຶ່ງ
ຮອງນາຍົກ ເຄື່ອນໄຫວຕິດຕາມໂຄງການໄຟຟ້ານ້ຳອູ

ໃນ​ໂອກາດ​ເດີນທາງ​ມາ​ເຄື່ອນໄຫວ ແລະ ຢ້ຽມຢາມ​ແຂວງ​ຜົ້ງສາລີ ວັນ​ທີ 11 ເມສາ 2017 ທ່ານ ສອນ​ໄຊ ສີ​ພັນ​ດອນ ຮອງນາຍົກລັດຖະມົນຕີ ພ້ອມ​ດ້ວຍຄະນະ​ ໄດ້​ໄປ​ຢ້ຽມຢາມ ແລະ ຊຸກຍູ້​ການຈັດຕັ້ງ​ປະຕິບັດ​ໂຄງການເຂື່ອນ​ໄຟຟ້າ​ນ້ຳຕົກ​ນ້ຳ​ອູ 6 ແລະ ນ້ຳ​ອູ 7 ທີ່ເມືອງ ແລະ ແຂວງຜົ້ງ​ສາລີ ເຊິ່ງ​ມີ​ທ່ານ ຄຳ​ເຈນ ວົງໂພ​ສີ ເຈົ້າແຂວງ​ຜົ້ງ​ສາລີ ພ້ອມດ້ວຍ​ບັນດາ​ຄະນະ​ນຳ​ແຂວງ ແລະ ຄະນະ​ຮັບຜິດຊອບ​ໂຄງການ​ໃຫ້ການ​ຕ້ອນຮັບ.

ການ​ໄປ​ຢ້ຽມຢາມ​ຄັ້ງ​ນີ້ ທ່ານຮອງ​ນາຍົກລັດຖະມົນຕີ ​ໄດ້​ຮັບ​ຟັງການ​ລາຍ​ງານ​ກ່ຽວ​ກັບ​ການ​ຈັດຕັ້ງ​ປະຕິບັດ ແລະ ວຽກ​ງານ​ຈຸດສຸມ​ຂອງ​ໂຄງການ​ເຂື່ອນ​ໄຟຟ້ານ້ຳຕົກ​ນ້ຳ​ອູ 6 ແລະ ນ້ຳ​ອູ 7 ເຊິ່ງເປັນ 2 ເຂື່ອນ​ທີ່​ນອນ​ຢູ່​ໃນ​ໂຄງການ​ກໍ່ສ້າງ​ເຂື່ອນ​ໄຟຟ້າ​ຕາມສາຍ​ນ້ຳ​ອູ ແລະ ເປັນ​ເຂື່ອນ​ລະບົບ​ຂັ້ນໄດ ໂດຍ​ເປັນ​ການ​ລົງທຶນຮ່ວມ​ລະຫວ່າງ ບໍລິສັດ ຊິ​ໂນ​ໄຮໂດຣ ແຫ່ງ ​ສປ ຈີນ ຖື​ຫຸ້ນ 85% ກັບ​ລັດ​ວິ​ສາ​ຫະ​ກິດໄຟຟ້າ​ລາວ ຖື​ຫຸ້ນ 15% ໃນ​ຮູບ​ແບບ​ກໍ່ສ້າງດຳເນີນ​ງານ ແລະ ມອບ​ໂອນ​ຄືນໃຫ້​ລັດຖະບານ (BOT) ໃນ​ໄລຍະສຳ​ປະທານ 29 ປີນັບ​ຈາກ​ມື້ຂາຍ​ໄຟຟ້າ​ເປັນ​ທາງ​ການ ໃນ​ນັ້ນ ເຂື່ອນ​ໄຟຟ້າ​ນ້ຳ​ອູ 6 ແມ່ນ​ມີ​ກຳລັງ​ຕິດ​ຕັ້ງ 180 ເມັກ​ກາ​ວັດ ສາມາດ​ຜະລິດ​ພະລັງງານ​ໄຟຟ້າ​ໄດ້ 739 ກິ​ກະ​ວັດ​ໂມງ​ຕໍ່​ປີ ເຊິ່ງ​ສຳເລັດ​ການ​ກໍ່ສ້າງ ແລະ ຂາຍ​ໄຟຟ້າ​ມາ​ແຕ່​ທ້າຍ​ປີ 2016 ມູນ​ຄ່າການ​ກໍ່ສ້າງ 380 ກວ່າ​ລ້ານ​ໂດລາ​ສະຫະລັດ ສ່ວນ​ເຂື່ອນ​ໄຟຟ້ານ້ຳ​ອູ 7 ມີ​ກຳລັງ​ຕິດ​ຕັ້ງ 210 ເມັກ​ກາ​ວັດ ປັດຈຸບັນ​ພວມ​ດຳເນີນ​ການ​ກໍ່ສ້າງ​ໄດ້​ປະມານ 10 ກວ່າ​ສ່ວນ​ຮ້ອຍ ໃນ​ທ້າຍ​ປີ 2017 ຈະ​ໄດ້​ມີ​ການ​ອ່ວຍ​ນ້ຳ​ເພື່ອ​ດຳເນີນ​ການ​ກໍ່ສ້າງ​ໂຕ​ເຂື່ອນ ແລະ ຄາດ​ວ່າ​ຈະ​ສຳເລັດ ແລະ ຂາຍໄຟຟ້າໄດ້​ໃນ​ປີ 2020 ນີ້ ບັນດາເຂື່ອນ​ນ້ຳ​ອູ​ເຫຼົ່າ​ນີ້ ລັດຖະບານລາວ ໄດ້​ໃຫ້​ຄວາມ​ສຳຄັນ​ເພື່ອຕອບ​ສະໜອງ​ໄຟຟ້າ​ ໃຫ້​ແກ່​ບັນດາ​ແຂວງ​ພາກ​ເໜືອ​ຂອງ​ລາວ ອັນ​ເປັນ​ການ​ປະກອບສ່ວນ ແລະ ຍົກ​ລະດັບ​ຊີວິດ​ການ​ເປັນ​ຢູ່​ຂອງພໍ່​ແມ່​ປະຊາຊົນ ​ໃຫ້​ດີ​ຂຶ້ນ​ເທື່ອ​ລະກ້າວ.

ຂ່າວທີ່ກ່ຽວຂ້ອງ