ຍີ່ປຸ່ນໃຫ້ທຶນຊ່ວຍເຫຼຼືອ ສ້າງໂຮງຮຽນທີ່ແຂວງອຸດົມໄຊ

499 20 ມ.ສ. 2017 ຂ່າວໜ້າ​ໜຶ່ງ
ຍີ່ປຸ່ນໃຫ້ທຶນຊ່ວຍເຫຼຼືອ ສ້າງໂຮງຮຽນທີ່ແຂວງອຸດົມໄຊ

ລັດຖະບານ​ຍີ່ປຸ່ນ​ສືບຕໍ່​ໃຫ້​ທຶນຊ່ວຍເຫຼືອ​ລ້າ ມູນ​ຄ່າ 86.900 ໂດ​ລາ​ສະຫະລັດ ຫຼື ປະມານ 700 ລ້ານ​ກວ່າ​ກີບ ສ້າງ​ໂຮງຮຽນ​ມັດທະຍົມ​ປາງ​ທອງ ເມືອງນາ​ໝໍ້ ແຂວງອຸດົມ​ໄຊ ພາຍ​ໃຕ້ໂຄງການ​ເສີມ​ສ້າງ​ຄວາມ​ໝັ້ນຄົງ​ຂອງ​ມະນຸດ ຂັ້ນ​ຮາກ​ຖານ (GGPs) ພິທີມອບ-ຮັບໂຄງການ​ໄດ້​ຈັດ​ຂຶ້ນ​ວັນ​ທີ 11 ເມສາ 2017 ທີ່​ແຂວງ​ອຸດົມ​ໄຊ ມີ​ທ່ານ ໃຈ​ເພັດ ຄຳ​ມະ​ລີ ເຈົ້າເມືອງ​ນາ​ໝໍ້ ທ່ານ ທາເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະທູດ​ຍີ່ປຸ່ນ ປະຈຳ​ລາວ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ໂຄງການ​ກໍ່ສ້າງ​ໄດ້​ຈັດ​ຕັ້ງປະຕິບັດ​ເດືອນ​ມີນາ 2016 ດ້ວຍການ​ຍົກ​ລະດັບ​ຈາກ​ໂຮງຮຽນ​ມັດທະ​ຍົມ​ຕອນ​ຕົ້ນ ເປັນ​ໂຮງຮຽນມັດທະຍົມ​ສົມບູນ ເພື່ອ​ຮອງ​ຮັບຈຳນວນ​ນັກຮຽນ​ທີ່​ເພີ່ມ​ຂຶ້ນ​ໃນ​ຕໍ່ໜ້າ ເນື່ອງ​ຈາກ​ປັດຈຸບັນ​ຫ້ອງຮຽນ​ມີ​ຄວາມ​ແອ​ອັດ ດັ່ງນັ້ນ​ໂຄງການ​ນີ້ ຈຶ່ງ​ມີ​ເປົ້າ​ໝາຍ​ທີ່​ຈະ​ຍົກລະດັບ​ສະພາບ​ແວດ​ລ້ອມ​ທາງການ​ສຶກ​ສາ ໂດຍ​ການ​ສ້າງ​ອາຄານ​ຮຽນ​ຫຼັງ​ໃໝ່​ຕື່ມ​ອີກ ຈຳນວນ 1 ຫຼັງ​ທີ່​ມີ​ຫ້ອງ​ຮຽນ 5 ຫ້ອງ ແລະ ຫ້ອງ​ນ້ຳ 2 ຫ້ອງ ຜົນ​ທີ່​ໄດ້​ຮັບຄືສະເລ່ຍ​ຈຳນວນ​ນັກຮຽນ​ຕໍ່​ຫ້ອງຈະ​ຫຼຸດ​ລົງ.

ປະເທດ​ຍີ່ປຸ່ນ ໄດ້​ໃຫ້ການ​ສະໜັບ​ສະ​ໜູນ​ຕໍ່​ຄວາມ​ພະຍາຍາມຂອງ​ລັດຖະບານ​ລາວ ໃນ​ການພັດທະນາ​ການ​ສຶກ​ສາ​ຂັ້ນ​ພື້ນຖານເປັນ​ເວລາ​ຫຼາຍ​ປີ ​ໂດຍ​ຜ່ານໂຄງການ GGP ນີ້ຍີ່ປຸ່ນ​ໄດ້​ໃຫ້ທຶນ​ຊ່ວຍເຫຼືອ​ໂຄງການ​ຂະແໜງສຶກ​ສາ​ທັງ​ໝົດ 282 ໂຄງການ ນັບ​ຕັ້ງແຕ່​ປີ 1989 ໃນ​ນັ້ນ ປະກອບ​ມີ​ໂຮງຮຽນ​ປະຖົມ ຈຳນວນ 171 ແຫ່ງ ແລະ ໂຮງຮຽນ​ມັດ​ທະຍົມ​ຕອນ​ຕົ້ນ ແລະ ຕອນ​ປາຍ ຈຳນວນ 61 ແຫ່ງ.

ຂ່າວທີ່ກ່ຽວຂ້ອງ