ຫັນປ່ຽນການຈ້າງງານນອກລະບົບ ເຂົ້າສູ່ລະບົບທີ່ຖືກຕ້ອງ

465 21 ມ.ສ. 2017 ຂ່າວໜ້າ​ໜຶ່ງ
ຫັນປ່ຽນການຈ້າງງານນອກລະບົບ ເຂົ້າສູ່ລະບົບທີ່ຖືກຕ້ອງ

ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 28 ແລະ 29 ທີ່ ​ສປປ ລາວ ເປັນ​ເຈົ້າພາບ​ຄັ້ງ​ຜ່ານ​ມາ ໄດ້​ຮັບຮອງ​ເອົາ​ຖະແຫຼງການ ເຊິ່ງ​ໜຶ່ງ​ໃນ​ນັ້ນ​ແມ່ນ​ຖະແຫຼງ​ວຽງຈັນ ວ່າ​ດ້ວຍການ​ຫັນປ່ຽນ​ຈາກການ​ຈ້າງ​ງານ​ນອກ​ລະບົບ ໄປ​ສູ່ໃນ​ລະບົບ ເພື່ອ​ກ້າວ​ໄປ​ສູ່​ການ​ສົ່ງເສີມ​ວຽກ​ທີ່​ມີ​ຄຸນຄ່າ ແລະ ເປັນທຳ​ໃນ​ອາ​ຊຽນ ເປັນ​ຂີດ​ໝາຍສຳຄັນ ໃນ​ການ​ປະກອບສ່ວນການຈັດຕັ້ງ​ປະຕິບັດ​ວິໄສ​ທັດ​ອາຊຽນ 2016-2025 ແລະ ການຈັດ​ຕັ້ງ​ປະຕິບັດ​ເປົ້າ​ໝາຍ​ສະຫັດສະ​ວັດ ເພື່ອ​ການ​ພັດທະນາ​ແບບຍືນ​ຍົງ​ຫຼັງ 2015 ຂອງ​ອົງການສະຫະ​ປະຊາ​ຊາດ ກ່ຽວ​ກັບ​ການສົ່ງເສີມ​ການ​ເຕີບ​ໃຫຍ່​ດ້ານ​ເສດຖະ​ກິດ​ແບບ​ຍືນ​ຍົງ ການ​ຈ້າງງານ ຜະລິດ​ຕະ​ພາບ​ແຮງ​ງານແບບ​ເຕັມ​ສ່ວນ ການ​ເຮັດ​ໃຫ້ວຽກ​ມີ​ຄຸນຄ່າ ເປັນ​ທຳ​ສຳລັບ​ທຸກຄົນ ໃຫ້​ເປັນ​ຮູບ​ປະ​ທຳ​ຂຶ້ນ​ເທື່ອລະ​ກ້າວ ເພື່ອ​ແນໃສ່​ການ​ຮຽນ​ຮູ້ ແລະ ການ​ພັດທະນາ​ທັກ​ສະ.

ການ​ຫັນປ່ຽນ​ຈາກ​ການ​ຈ້າງງານ​ນອກ​ລະບົບ ໄປ​ສູ່​ການ​ຈ້າງງານ​ໃນ​ລະບົບ ເພື່ອ​ກ້າວ​ສູ່​ການສົ່ງເສີມ​ວຽກ​ທີ່​ມີ​ຄຸນຄ່າ ເປັນ​ທຳ ເປັນ​ສ່ວນ​ໜຶ່ງ​ທີ່​ສຳຄັນ ໃນ​ການສ້າງ​ໂອກາດ​ໃນ​ການ​ຈ້າງ​ງານນອກ​ລະບົບ​ໃຫ້​ຫຼາຍ​ຂຶ້ນ ເພື່ອເປັນ​ການ​ແກ້​ໄຂ​ຄວາມ​ແຕກຕ່າງ​ໃນ​ການ​ພັດທະນາ​ໃນ​ຕົວເມືອງ ແລະ ຊົນນະບົດ ທັງ​ເປັນການ​ສົ່ງເສີມ​ທ່າແຮງ​ຂອງ​ຜູ້​ປະກອບ​ການ ຫົວຄິດ​ປະດິດ​ສ້າງຂອງ​ສີມື​ແຮງ​ງານ ຄວາມ​ສາມາດ​ໃໝ່​ຂອງ​ຜູ້​ອອກແຮງ​ງານ ຫົວໜ່ວຍ​ເສດຖະກິດ​ນອກ​ລະບົບ ເພື່ອ​ສ້າງ​ຊ່ອງ​ທາງ​ໃນ​ການ​ພັດທະ​ນາ​ເສດຖະກິດໃຫ້​ມີ​ຫຼາຍ​ຮູບແບບ ສືບຕໍ່​ປະກອບສ່ວນ​ເຂົ້າ​ໃນການ​ແກ້​ໄຂ​ຄວາມທຸກ​ຍາກ ​ຂອງບັນດາ​ປະເທດ​ສະມາຊິກ​ອາ​ຊຽນ ໃຫ້​ຫຼຸດ​ລົງ​ເທື່ອ​ລະ​ກ້າວ.

ໃນ​ລະຫວ່າງ​ວັນ​ທີ 20-21 ເມສາ 2017 ທີ່​ນະຄອນຫຼວງວຽງ​ຈັນ ໄດ້​ຈັດ​ກອງ​ປະຊຸມ​ສະໄໝ​ພິເສດ​ເພື່ອ​ປຶກສາ​ຫາລື ປະກອບ​ຄຳ​ເຫັນ​ເຂົ້າ​ໃນ​ຮ່າງ​ແຜນ​ປະຕິ​ບັດ​ງານ​ຖະແຫຼງການ​ວຽງ​ຈັນ ວ່າ​ດ້ວຍ​ການ​ຫັນປ່ຽນ​ຈາກ​ການຈ້າງ​ງານ​ນອກ​ລະບົບ ໄປ​ສູ່​ໃນລະບົບ ເພື່ອ​ກ້າວ​ສູ່​ການ​ສົ່ງເສີມວຽກ​ທີ່​ມີ​ຄຸນຄ່າ ແລະ ເປັນ​ທຳໃນ​ອາ​ຊຽນ ໂດຍ​ເປັນ​ປະທານຂອງ​ທ່ານ ໂຈມ​ແຍງ ແພງ​ທອງສະ​ຫວັດ ຮອງ​ຫົວໜ້າ​ກົມ​ແຜນການ ແລະ ການ​ຮ່ວມ​ມື​ສາກົນ ກະຊວງ​ແຮງ​ງານ ແລະ ສະ​ຫວັດດີ​ການ-ສັງຄົມ ບັນດາ​ຜູ້ຕາງໜ້າຈາກ​ປະເທດ​ສະມາຊິກ​ອາ​ຊຽນ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ຂ່າວທີ່ກ່ຽວຂ້ອງ