ນັກ­ກີ­ລາ​ປິ່ງ​ປ່ອງ ກຽມ​ຄວາມ​ພ້ອມ​ເຂົ້າ​ຮ່ວມ​ແຂ່ງ­ຂັນ​ຫຼາຍ​ລາຍ­ການ

330 12 ພ.ພ. 2017 ວົງຈອນກີລາ
ນັກ­ກີ­ລາ​ປິ່ງ​ປ່ອງ ກຽມ​ຄວາມ​ພ້ອມ​ເຂົ້າ​ຮ່ວມ​ແຂ່ງ­ຂັນ​ຫຼາຍ​ລາຍ­ການ

ທ່ານ​ນາງ ສົມ​ໃຈ ວົງ­ສາ ເລ­ຂາ­ທິ­ການ​ສະ­ຫະ­ພັນ​ປິ່ງ​ປ່ອງ​ແຫ່ງ​ຊາດ​ລາວ ໃຫ້​ສຳ­ພາດ ​ວັນ​ທີ 11 ພຶດ­ສະ­ພານີ້ ວ່າ: ປີ 2017 ສະ­ຫະ­ພັນ​ໄດ້​ມີ​ການ​ວາງ​ແຜນ​ເຄື່ອນ​ໄຫວ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ ​ທັງ​ພາຍ​ໃນ ແລະ ຕ່າງ­ປະ­ເທດ ພ້ອມ​ທັງ​ເກັບ​ຕົວ​ເຝິກ­ຊ້ອມ ​ວາງ​ແຜນ​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ໃຫ້​ບຸກ​ຄະ­ລາ​ກອນ ​ໃຫ້​ມີ​ຄຸ­ນະ­ພາບ ແລະ ໄດ້ມາດ­ຕະ­ຖານ ເພື່ອ​ກ້າວ​ສູ່​ລະ­ດັບ​ສາ­ກົນ ກໍ່​ຄື​ເປັນ​ການ​ສົ່ງ­ເສີມ​ເຍົາ­ວະ​ຊົນ ແລະ ຊາວ​ໜຸ່ມ​ນັກ­ກີ­ລາ​ປິ່ງ​ປ່ອງ​ ໄດ້​ມີ​ທ່າ​ກ້າວສູ່​ຜົນ­ສຳ­ເລັດ​ການ​ແຂ່ງ­ຂັນ​ຊີງ​ຂັນ​ລະ­ດັບ​ພາກ​ພື້ນ ແລະ ສາ­ກົນ​ ໃນ​ອະ­ນາ­ຄົດ.

ປັດ­ຈຸ­ບັນ ​ສະ­ຫະ­ພັນ​ໄດ້​ຂຶ້ນ​ແຜນ​ເຂົ້າ​ຮ່ວມ​ແຂ່ງ­ຂັນ 3 ລາຍ­ການ​ໃຫຍ່​ ເປັນ­ຕົ້ນ​ແມ່ນ​ລະ­ຫວ່າງ​ວັນ​ທີ 27 ພຶດ­ສະ­ພາ-7 ມິ­ຖຸ­ນາ ຈະ​ສົ່ງ​ທ້າວ ທະ­ວີ​ສັກ ທັດ​ສະ​ພອນ ແລະ ທ້າວ ສອນ​ປະ­ສິດ ມໍ​ສັງ​ສິດ ເຂົ້າ​ຮ່ວມ​ແຂ່ງ­ຂັນ​ປິ່ງ​ປ່ອງ​ຊີງ​ຂັນ​ໂລກ ທີ່ປະ­ເທດ​ຣັດ​ເຊຍ ຫຼັງ​ຈາກ​ນັ້ນ​ກໍ່​ຈະ​ກັບ​ມາ​ກະ­ກຽມ​ຄວາມ​ພ້ອມ​ຢູ່​ນະ­ຄອນ­ຫຼວງ​ວຽງ​ຈັນ ເພື່ອ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລານັກ­ຮຽນ​ອາ​ຊຽນ ຄັ້ງ​ທີ 9 ທີ່​ປະ­ເທດ​ສິງ​ກາ​ໂປ ລະ­ຫວ່າງ​ວັນ​ທີ 13-21 ກໍ­ລະ­ກົດ ແລະ ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ລະ­ຫວ່າງ​ວັນ​ທີ 19-31 ສິງ­ຫາ.

ນັກ­ກີ­ລາ​ຊຸດ​ກຽມ​ເຂົ້າ​ຮ່ວມ​ແຂ່ງ­ຂັນ 3 ລາຍ­ການນີ້ ມີ​ທັງ​ໝົດ 12 ຄົນ ໃນ​ນັ້ນ ​ຮຸ່ນ​ເຍົາ­ວະ​ຊົນ 6 ຄົນ ຈະ​ສົ່ງ​ຮ່ວມ​ງານ​ກີ­ລານັກ­ຮຽນ​ອາ​ຊຽນ ຄັ້ງ​ທີ 9 ແລະ ອີກ 4 ຄົນ ຮຸ່ນ​ເຍົາ­ວະ​ຊົນ-ຊາວ​ໜຸ່ມ ຈະ​ສົ່ງ​ເຂົ້າ​ຮ່ວມ​ຊີ­ເກມ ຄັ້ງ​ທີ 29 ສ່ວນ​ອີກ 2 ຄົນ ຈະ​ສົ່ງ​ເຂົ້າ​ຮ່ວມ​ຊີງ​ຂັນ​ໂລກ ທີ່​ຣັດ​ເຊຍ ເຊິ່ງ​ນັກ­ກີ­ລາ​ທັງ​ໝົດ​ໄດ້​ເກັບ​ຕົວ​ເຝິກ­ຊ້ອມ​ຢ່າງ​ເປັນ​ປົກ­ກະ­ຕິ​ທຸກ​ວັນ​ ທີ່​ສູນ​ກີ­ລາເຝິກ­ຊ້ອມ​ປິ່ງ​ປ່ອງ ສູນ​ການ​ຄ້າ ​ວຽງ​ຈັນ​ ເຊັນ​ເຕີ ແລະ ສະ­ໂມ­ສອນ​ປິ່ງ​ປ່ອງ ​ເອ​ັ​ສວີ ບ້ານ​ໂພນ​ທັນ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ