ຈັບເປົ້າໝາຍຄ້າຂາຍຢາເສບຕິດຄາລົດ 2 ພັນເມັດ

211 17 ພ.ພ. 2017 ຂ່າວໜ້າ​ໜຶ່ງ

ໃນ​ທ້າຍ​ເດືອນ​ເມສາ 2017 ເຈົ້າ​ໜ້າທີ່​ສະກັດ​ກັ້ນ ແລະ ຕ້ານ​ຢາເສບ​ຕິດ ​ປກສ ແຂວງ​ຫຼວງ​ນ້ຳ​ທາ ໄດ້​ສະກັດ​ຈັບ​ເປົ້າ​ໝາຍ​ຄ້າຂາຍ​ຢາເສບ​ຕິດ​ຄາ​ລົດ​ໂດຍສານ ຈຳນວນ 10 ຖົງ ເທົ່າ​ກັບ 2.000 ເມັດ ໂທລະ​ສັບ 1 ໜ່ວຍ ເງິນ​ຢວນ 90 ຢວນ ເງິນ​ບາດ 220 ບາດ.

ເຈົ້າ​ໜ້າທີ່ ​ປກສ ແຂວງ​ຫຼວງ​ນ້ຳ​ທາ ໃຫ້​ຮູ້​ວ່າ: ໃນ​ວັນ​ທີ 24 ເມສາ 2017 ໄດ້​ຮັບ​ລາຍ​ງານ​ວ່າ ມີ​ເປົ້າ​ໝາຍ​ຄ້າຂາຍ​ຢາ​ເສບ​ຕິດ​ມາ​ທາງ​ລົດ​ໂດຍສານ ​ຈາກ​ແຂວງ​ອຸດົມ​ໄຊຫາ​ແຂວງ​ຫຼວງ​ນ້ຳ​ທາ ຈາກ​ນັ້ນ​ຈຶ່ງ​ໄດ້ແຕ່ງຕັ້ງ​ພະນັກງານ​ວິຊາ​ສະເພາະ​ລົງ​ປະຈຳ​ຢູ່​ຈຸດ​ບ້ານ​ບວມ​ພຽງ ແລະ ບ້ານ​ນາຫວ່ານ ເມືອງ​ຫຼວງ​ນ້ຳ​ທາ ແຂວງ​ຫຼວງ​ນ້ຳ​ທາ ພໍ​ຮອດ​ເວລາປະມານ 12:00 ໂມງ ໄດ້​ເຫັນ​ລົດ​ໂດຍສານ​ເປົ້າ​ໝາຍ​ແລ່ນ​ມາ​ຕາມເສັ້ນທາງ ຈຶ່ງ​ຂໍອະນຸຍາດ​ກວດກາ ແລະ ພົບ​ເຫັນຢາ​ເສບ​ຕິດ​ຢູ່​ໃນ​ແກັດ​ເຈ້ຍເທິງ​ຫຼັງຄາ​ລົດ ຈາກ​ນັ້ນ ຈຶ່ງ​ໄດ້ຕິດຕາມ​ລົດ​ໂດຍສານ​ຄັນ​ດັ່ງກ່າວ​ໄປ​ຮອດ​ສະຖານີ​ລົດ​ໂດຍສານ​ຕ່າງ​ແຂວງ ຈຶ່ງ​ພົບ​ເຫັນ​ເປົ້າໝາຍ​ມາ​ເອົາ​ແກັດ​ເຈ້ຍ​ທີ່​ມີ​ຢາເສບ​ຕິດ ແລະ ໄດ້​ເຂົ້າ​ຈັບ​ຕົວ​ເປົ້າໝາຍ​ຊື່​ທ້າວ ລາວ​ຮື ຫຼື ເງິນ ອາຍຸ 23 ປີ​ຢູ່​ບ້ານ​ຫາດ​ຍາວ ເມືອງ ແລະ ແຂວງ​ຫຼວງ​ນ້ຳ​ທາ.

ຈາກ​ການ​ສອບ​ສວນ ທ້າວ ລາວຮື ຮັບ​ສາລະພາບ​ວ່າ: ຢາ​ເສບ​ຕິດຈຳນວນ 10 ຖົງ ເທົ່າ​ກັບ 2.000 ເມັດ ແມ່ນ​ຂອງ​ຜູ້ກ່ຽວ​ແທ້ ໂດຍສັ່ງ​ຊື້​ມາ​ແຕ່​ແຂວງ​ອຸດົມ​ໄຊ ເພື່ອຈະ​ຂາຍ​ສົ່ງ​ຢູ່​ເມືອງ​ສິງ ແຕ່​ຖືກເຈົ້າ​ໜ້າທີ່​ຈັບ​ຕົວ​ກ່ອນ ປັດຈຸບັນ ຄະດີ​ດັ່ງກ່າວຍັງ​ຢູ່​ໃນ​ຂັ້ນ​ຕອນຂອງ​ການ​ສອບ​ສວນ​ຂະຫຍາຍຜົນ​ຫາ​ຜູ້​ຮ່ວມ​ຂະ​ບວນ​ການ ເພື່ອສະຫຼຸບ​ສຳນວນ​ຄະດີ ສົ່ງ​ໃຫ້​ໄອຍະ​ການ​ດຳເນີນ​ຕາມ​ຂັ້ນ​ຕອນຂອງ​ກົດໝາຍ​ຕໍ່​ໄປ.

ຂ່າວທີ່ກ່ຽວຂ້ອງ