ກະຊວງໄປສະນີ ແຈ້ງເຕືອນໃຫ້ລະວັງໄພໄວຣັດຄອມພິວເຕີ

253 17 ພ.ພ. 2017 ຂ່າວໜ້າ​ໜຶ່ງ

ໃນ​ວັນ​ທີ 15 ພຶດສະພາ 2017 ກະຊວງ​ໄປສະນີ​ໂທລະ​ຄົມມະນາຄົມ ແລະ ການ​ສື່ສານ (​ປທສ) ໄດ້​ອອກ​ແຈ້ງ​ການ​ເຕືອນ​ໄພ​ເຖິງ​ບັນດາ​ກະຊວງ ອົງ​ການຈັດຕັ້ງ​ພາກ​ລັດ ແລະ ເອກະ​ຊົນ ລວມ​ທັງ​ບໍລິສັດ​ໂທລະ​ຄົມມະນາຄົມ ທະນາຄານ ແລະ ຜູ້​ຊົມໃຊ້​ອິນ​ເຕີ​ເນັດ​ໃນ​ທົ່ວ​ປະເທດ ວ່າ​ປັດຈຸບັນ​ໄດ້​ມີ​ການ​ພົບ​ເຫັນໄວ​ຣັດ​ຄອມ​ພິວ​ເຕີ Wannacry Rasomware ຫຼື Wanna Decryptor 2.0 ທີ່​ໄດ້​ແຜ່​ລະບາດ​ໃນ​ຫຼາຍ​ປະເທດ ຫາກ​ພົບ​ເຫັນ​ເຫດການ​ທີ່​ໜ້າ​ສົງໄສ ສາມາດ​ແຈ້ງ​ຫາ​ສູນ​ສະກັດ​ກັ້ນ ແລະ ແກ້​ໄຂ​ເຫດ​ສຸກ​ເສີນ​ທາງ​ລະບົບ​ຄອມ​ພິວ​ເຕີ​ຜ່ານ​ທາງ​ອີ​ເມວ report@laocert.gov.la ຫຼື ຜ່ານ​ທາງ​ໂທລະສັບ 030 5764222 ສ່ວນ​ການ​ອັບ​ເດດ​ລະບົບ​ປະຕິບັດ​ການ Windows ແລະ ຂໍ້​ມູນ​ເພີ່ມ​ເຕີມ​ສາມາດ​ເຂົ້າ​ເບິ່ງ​ທີ່ເວັບ​ໄຊ​ຂອງ​ສູນ​ສະກັດ​ກັ້ດ ແລະ ແກ້​ໄຂ​ເຫດ​ສຸກ​ເສີນ​ທາງ​ລະບົບ​ຄອມ​ພິວ​ເຕີ www.laocert.gov.la ທັງ​ນີ້​ກໍ່​ເປັນ​ການ​ປ້ອງ​ກັນ​ໃຫ້​ທັນ​ເວລາ.

ສຳລັບ ​ສປປ ລາວ ກໍ່​ໄດ້​ມີ​ການ​ຕິດຕາມ​ເຝົ້າ​ລະວັງ​ໄວ​ຣັດ​ດັ່ງກ່າວ ເຊິ່ງ​ໄວ​ຣັດ​ຊະນິດ​ນີ້ ຈະ​ໂຈມ​ຕີ​ໄປ​ທີ່​ຊ່ອງ​ຫວ່າງ SMBv1.0 (Server Message Block) ຂອງ​ລະບົບ​ປະຕິບັດ​ການ Windows ຖ້າ​ຫາກຜູ້​ຄຸ້ມ​ຄອງ​ລະບົບ​ຄອມ​ພິວ​ເຕີ ແລະ ຜູ້​ໃຊ້​ຄອມ​ພິວ​ເຕີ​ບໍ່​ໄດ້​ຕິດ​ຕັ້ງ ຫຼື ອັບ​ເດດ​ໂປຣ​ແກມ​ປ້ອງ​ກັນ​ໄວ​ຣັດ ຫຼື ບໍ່​ໄດ້​ອັບ​ເດດ​ລະບົບ​ປະຕິບັດ​ການ ​ນັບ​ທັງ​ແນະນຳ​ເຖິງ​ວິທີ​ການ​ປ້ອງ​ກັນ​ຈາກ​ໄພ​ຄຸກ​ຄາມ​ທາງ​ລະບົບ​ຄອມ​ພິວເຕີ Windows ຈະ​ເຮັດ​ໃຫ້​ລະບົບ​ຄອມ​ພິວ​ເຕີ​ຕິດ​ເມົາ​ແວ (Malware) ບັນດາ​ຂໍ້​ມູນ​ເອ​ເລັກ​ໂທຣ​ນິກ ແລະ ເອກະສານ​ໃນ​ຄອມ​ພິວ​ເຕີ ຈະ​ຖືກ​ເຂົ້າ​ລະຫັດ​ເພື່ອ​ຮຽກຮ້ອງ​ຄ່າ​ໄຖ່.

ດັ່ງນັ້ນ ເພື່ອ​ໃຫ້​ຮູ້​ທັນ​ສາມາດ​ປ້ອງ​ກັນ ແລະ ລະມັດລະວັງ​ຕໍ່​ໄພ​ດັ່ງກ່າວ ກະຊວງ ​ປທສ ໄດ້​ມີ​ຂໍ້​ແນະນຳ​ໃນ​ການ​ປ້ອງ​ກັນ​ເຊັ່ນ: ສຳລັບ Windows XP 7,8,10 ຫຼື ລະບົບ​ເຊີ​ເວີ​ທີ່​ໃຊ້ Windows Server 2003-2008-2012-2016 ໃຫ້​ອັບ​ເດດ​ລະບົບ​ປະຕິບັດ​ການ​ໂດຍ​ດ່ວນ ໃນ​ກໍລະນີ​ທີ່​ບໍ່​ສາມາດ​ອັບ​ເດດ​ລະບົບ​ນີ້​ໄດ້​ທັນ​ເວລາ ທ່ານ​ສາມາດ​ເຂົ້າ​ໄປ​ປິດ​ການ​ໃຊ້​ງານ SMB Server Message Block ສ່ວນ firewall ໃຫ້​ປິດ TCP/UDP SMB Port 135-139 ແລະ 445 ສຳລັບ​ຜູ້ນຳ​ໃຊ້​ລະບົບ​ຄອມ​ພິວ​ເຕີ​ທົ່ວ​ໄປ​ ໃຫ້​ຕິດ​ຕັ້ງ​ໂປຣ​ແກມ​ປ້ອງ​ກັນ​ໄວ​ຣັດ ແລະ ອັບ​ເດດ​ໃຫ້​ເປັນ​ປົກກະຕິ ທັງ​ອັບ​ເດດ​ລະບົບ​ປະຕິບັດ​ການ Windows ເພື່ອ​ປິດ​ຊ່ອງ​ຫວ່າງ SMB Server Message Block ໃຫ້​ສຳຮອງ​ເອກະສານ​ໄວ້​ໃນ​ທີ່​ປອດ​ໄພ ບໍ່​ເປີດ​ເອກະສານ​ທີ່​ຂັດ​ຕິດ​ມາ​ນຳ​ອີ​ເມວ ເຊິ່ງ​ບໍ່​ຮູ້ຈັກ​ແຫຼ່ງ​ທີ່​ມາ ຫຼື ລິ້ງ​ຕ່າງໆ ບໍ່​ດາວ​ໂຫຼດ​ໂປຣ​ແກມ ແລະ ຟາຍ​ຕ່າງໆ​ຈາກ​ເວັບ​ໄຊ​ທີ່​ບໍ່​ໜ້າ​ເຊື່ອ​ຖື.

ກະຊວງ ​ປທສ ໄດ້​ແນະນຳ​ເພີ່ມ​ເຕີມ​ໃນ​ກໍລະນີ​ຕິດ​ໄວ​ຣັດ Wannacry Rasomware ຫຼື Wanna Decryptor 2.0 ໃຫ້​ປິດ​ການ​ທຳ​ງານ​ຄອມ​ພິວ​ເຕີ​ຂອງ​ຕົນ ທັງ​ຢຸດ​ການ​ເຊື່ອມ​ຕໍ່​ເຄືອ​ຂ່າຍ​ຄອມ​ພິວ​ເຕີ​ພາຍ​ໃນ ແລະ ອິນ​ເຕີ​ເນັດ ພ້ອມ​ທັງ​ແຈ້ງ​ໃຫ້​ຜູ້​ຄຸ້ມ​ຄອງ​ລະບົບ​ຊາບ ແລະ ຊອກ​ຫາ​ວິທີ​ການ​ແກ້​ໄຂ.

ຂ່າວທີ່ກ່ຽວຂ້ອງ