ຂ່າວຫຼ້າສຸດ

ສະຖານີຄົ້ນຄວ້າແນວພັນສັດປີກ ມີ 4 ສາຍພັນໃຫ້ເລືອກ

131 18 ພ.ພ. 2017 ຂ່າວໜ້າ​ໜຶ່ງ
ສະຖານີຄົ້ນຄວ້າແນວພັນສັດປີກ ມີ 4 ສາຍພັນໃຫ້ເລືອກ

ສະຖານີ​ຄົ້ນຄວ້າ​ແນວ​ພັນ​ສັດປີກ ​ຕັ້ງ​ຢູ່​ບ້ານ​ຈັນ​ສະຫວ່າງ ເມືອງສີ​ໂຄດ​ຕະບອງ ນະຄອນຫຼວງວຽງ​ຈັນ ທ່ານ ແກ້ວ​ສັນຕິ​ສຸກ ໄຊ​ຄຳ​ວົງ ຫົວໜ້າ​ສະຖານີ​ຄົ້ນຄວ້າ​ແນວ​ພັນ​ສັດ​ປີກ​ກ່າວ​ວ່າ: ສຳລັບ​ສະຖານີ​ດັ່ງກ່າວ​ນີ້ ສ່ວນຫຼາຍ​ແມ່ນ​ຜະລິດ​ສັດ​ປີກ​ສະເພາະ ເຊິ່ງ​ມີ​ເນື້ອທີ່ທັງ​ໝົດ 4 ເຮັກຕາ ແລະ ມີ​ສາຍ​ພັນ​ສັດ​ປີກ​ຫຼັກ​ມີ 4 ສາຍ​ພັນ​ປະກອບ​ດ້ວຍ​ເປັດ​ເທບ ໄກ່​ລາຍ​ໜອງ​ແຕ່ງ (ນຳ​ເຂົ້າ​ມາ​ແຕ່​ປະເທດ​ເອ​ຢິບ) ໄກ່​ຕ໋ອກ ໄກ່ລາດ (ແມ່ນ​ນຳ​ມາເພື່ອ​ມາ​ປັບປຸງ​ພັນ​ກັບ​ໄກ່​ລາຍ ເພື່ອ​ໃຫ້​ອອກ​ມາ​ເປັນ​ລູກຊອດ) ສຳລັບ​ພໍ່​ແມ່​ພັນ​ເປັດ​ເທບ​ມີ 400 ໂຕ ພໍ່​ພັນ 100 ໂຕ ມື້ໜຶ່ງ​ສາມາດ​ຜະລິດ​ເປັດ​ນ້ອຍ​ໄດ້​ບໍ່​ຕ່ຳ​ກວ່າ 100 ໂຕ ພໍ່​ແມ່​ພັນ​ໄກ່​ລາຍ ມີ​ທັງໝົດ 350 ໂຕ ໃນ​ນັ້ນ​ແມ່​ພັນ​ມີ​ຢູ່ 280 ໂຕ ສາມາດ​ຜະລິດ​ໄຂ່​ມື້ໜຶ່ງ​ໄດ້​ຢູ່​ບໍ່​ຕ່ຳ​ກວ່າ 200 ໜ່ວຍ ແລະ ນຳໄປຟັກ​ມື້ໜຶ່ງ​ໄດ້​ໄກ່​ນ້ອຍ 150 ໂຕ ພໍ່ແມ່​ພັນ​ໄກ່​ຕ໋ອກ ມີ​ທັງ​ໝົດ 600 ໂຕ ໃນ​ນັ້ນ​ພໍ່​ແມ່​ພັນ 100 ໂຕ ສາມາດ​ຜະລິດ​ໄຂ່​ໄດ້​ມື້ໜຶ່ງ 350 ໜ່ວຍ​ຕໍ່​ມື້ ແລະ ຜະລິດ​ໄກ່​ນ້ອຍໄດ້ 350 ໂຕ​ຕໍ່​ມື້ ລູກ​ໄກ່​ຕ໋ອກເກີດ​ມາ​ໄດ້​ອາທິດ​ໜຶ່ງ​ກໍ່​ສາມາດຈຳໜ່າຍ.

ການຈຳໜ່າຍໄກ່​ຕ໋ອກ​ອອກມາ 7-10 ວັນ ຈຳໜ່າຍ​ໂຕ​ໜຶ່ງລາຄາ 10 ພັນ​ກີບ ກາຍ​ນັ້ນ​ໄປແລ້ວ​ໂຕ​ໜຶ່ງລາຄາ 11-13 ພັນກີບ ໄກ່​ລາຍ​ເມື່ອ​ຟັກ​ອອກ​ມາໄດ້​ທິດ​ໜຶ່ງ​ໂຕ​ໜຶ່ງ ລາຄາ 9 ພັນ​ກີບ ອາທິດ​ທີ​ສອງ 11 ພັນ​ກີບ ອາທິດ​ທີ​ສາມ ລາຄາ 13 ພັນ​ກີບ ສຳລັບ​ເປັດ​ເທບ​ຟັກ​ອອກ​ມາ​ໄດ້ທິດ​ໜຶ່ງ​ຫາ​ສອງ​ທິດ​ລາຄາ 1 ໂຕ 12 ພັນ​ກີບ ການຈຳໜ່າຍ​ແມ່ນຈຳໜ່າຍ​ທົ່ວ​ໄປ ມີ​ລູກ​ຄ້າ​ຢູ່​ນະຄອນ​ຫຼວງ​ຈຳນວນ​ໜຶ່ງ ລູກ​ຄ້າສ່ວນ​ຫຼາຍ​ປັດຈຸບັນ​ແມ່ນ​ຢູ່ທາງ​ພາກ​ເໜືອ ເປັນຕົ້ນ​ແມ່ນແຂວງ​ຊຽງ​ຂວາງ ແຂວງ​ໄຊ​ຍະບູ​ລີ ການ​ຈັດ​ສົ່ງ​ແມ່ນ​ບໍລິການ​ຢູ່ໜ້າ​ຟາມ​ນີ້​ເລີຍ ສຳລັບ​ລູກ​ຄ້າ​ຢູ່ນະຄອນຫຼວງ​ວຽງ​ຈັນ ສັ່ງ​ຊື້​ຫຼາຍ ທາງ​ສະຖານີ​ສາມາດ​ບໍລິການຈັດ​ສົ່ງ​ໃຫ້​ໄດ້.

ສຳລັບ​ຂັ້ນ​ຕອນ​ການ​ບົວ​ລະບັດ​ຮັກສາ ​ການ​ລ້ຽງ​ຫຼັງ​ຈາກ​ມັນໄຂ່​ອອກ​ມາ​ແລ້ວ​ ເກັບ​ໄຂ່​ໄປ​ໃສ່​ຕູ້ຟັກ ຫຼັງ​ຈາກ​ແຕກ​ອອກ​ຈາກ​ຕູ້ຟັກ​ແລ້ວ ເອົາ​ມາ​ໄວ້​ຄອກ​ອະນຸບານ ອະນຸບານ​ໄດ້​ໜຶ່ງ​ທິດ​ກະ​ວ່າລອດ​ຕາຍ​ແລ້ວ ຈຶ່ງ​ຈຳໜ່າຍ​ໃຫ້ລູກ​ຄ້າ ການ​ໃຫ້​ອາຫານ​ໄກ່​ລາຍໄກ່​ຕ໋ອກ 110-120 ກະ​ລາມ​ຕໍ່​ມື້ ເປັດ​ຢູ່​ໃນ​ລະດັບ 150-160 ກະລາມ​ຕໍ່​ມື້ ສະຖານີ​ນີ້ ມີ​ພໍ່​ແມ່​ພັນທັງ​ໝົດ 1.500 ພໍ່​ແມ່​ພັນ ໃຊ້ຫົວອາຫານ ປະມານ 20 ເປົາ ເປົາ​ໜຶ່ງ 30 ກິ​ໂລ ລົງທຶນ​ມື້ໜຶ່ງ 1 ລ້ານ ຫາ 1 ລ້ານ​ແປດ​ແສນ​ກີບ (ສຳລັບ​ອາຫານ) ບໍ່​ໄລ່​ການ​ສິ້ນເປືອງ​ອື່ນໆ ສຳລັບ​ທຶນ​ທີ່​ສະໜອງໃຫ້​ແມ່ນ​ທຶນ​ຂອງ​ລັດ 150 ລ້ານ ແລະ ທຶນ​ການ​ຊ່ວຍເຫຼືອ​ຈຳນວນໜຶ່ງ.

ຂ່າວທີ່ກ່ຽວຂ້ອງ