ຂ່າວຫຼ້າສຸດ

ແຈ້ງເຕືອນ ຝົນຍັງສືບຕໍ່ຕົກ ລົມພັດແຮງບາງທ້ອງຖິ່ນ

143 18 ພ.ພ. 2017 ຂ່າວໜ້າ​ໜຶ່ງ

ອີງ​ຕາມ​ຂໍ້​ມູນ​ຈາກ​ກົມ​ອຸຕຸ​ນິຍົມ ແລະ ອຸ​ທົກ​ກະ​ສາດ ກະຊວງຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ​ໃຫ້​ຮູ້​ວ່າ: ຄາດ​ຄະເນ​ສະພາບ​ອາກາດ​ແຕ່​ວັນ​ທີ 16-21 ພຶດສະພາ 2017 ໃນ​ໄລຍະຕົ້ນ​ອາທິດ​ວັນ​ທີ 15-16 ພຶດ​ສະພາ 2017 ຄວາມ​ກົດ​ດັນ​ຂອງ​ອາກາດ​ສູງ ​ຍັງ​ມີ​ກຳລັງ​ອ່ອນ​ປົກ​ຄຸມຢູ່​ທົ່ວ​ທຸກ​ພາກ​ຂອງ​ປະເທດ​ລາວ ສົມທົບ​ກັບ​ກະແສ​ລົມ​ຕາເວັນອອກສຽງ​ໃຕ້​ພັດ​ປົກ​ຄຸມ ເຊິ່ງ​ຈະເຮັດ​ໃຫ້​ອຸນຫະພູມ​ອາກາດ​ເຢັນ​ຢູ່ແຕ່​ລະ​ພາກ ແລະ ໃນ​ຕອນ​ບ່າຍຫາ​ຕອນ​ຄ່ຳ​ຈະ​ມີ​ຝົນຕົກ​ຟ້າຮ້ອງ ຟ້າ​ເຫຼື້ອມ​ໃນ​ລະດັບ​ຄ່ອຍໆ​ຫາປານ​ກາງ ແລະ ມີ​ລົມ​ພັດ​ແຮງເປັນ​ບາງ​ໂອກາດ​ໃນ​ແຕ່​ລະ​ພາກ ໃນ​ວັນ​ທີ 17-19 ພຶດສະພາ 2017 ຈະ​ມີ​ຝົນຕົກຟ້າຮ້ອງ​ຟ້າ​ເຫຼື້ອມຫຼາຍ​ຂຶ້ນ ພ້ອມ​ທັງ​ມີ​ລົມ​ພັດ​ແຮງຢູ່​ບາງ​ທ້ອງຖິ່ນ​ໃນ​ແຕ່​ລະ​ພາກ.

ສຳລັບ​ຢູ່ 2 ພາກ​ຄື: ພາກເໜືອ​ດ້ານຕາເວັນ​ອອກ ແລະ ນະຄອນຫຼວງວຽງ​ຈັນ ໃນ​ລະຫວ່າງ​ວັນ​ທີ 16-18 ພຶດສະພາ 2017 ແລະ 3 ພາກຄື: ພາກ​ເໜືອ​ດ້ານ​ຕາເວັນຕົກ ພາກ​ກາງ ແລະ ພາກ​ໃຕ້ ​ເຊິ່ງທັງ 5 ພາກ ຕາມ​ໄລຍະ​ວັນ​ທີ່ກ່າວ​ມາ​ນີ້ ຄາດ​ຄະເນ​ວ່າ​ຈະ​ມີຝົນຕົກ​ຟ້າຮ້ອງ​ຟ້າ​ເຫຼື້ອມ​ໃນ​ລະດັບ​ຄ່ອຍ​ຫາ​ປານ​ກາງ​ຫຼາຍ​ຂຶ້ນ ແລະ ຕົກ​ໜັກ​ພ້ອມ​ທັງ​ມີ​ລົມ​ພັດແຮງ​ຢູ່​ບາງ​ບໍລິເວນ​ ດັ່ງນັ້ນ​ຈຶ່ງແຈ້ງ​ເຕືອນ​ມາ​ຍັງ​ອຳນາດ​ການປົກຄອງ​ທຸກ​ພາກສ່ວນ ແລະ ປະຊາ​ຊົນ​ຈົ່ງ​ມີ​ສະຕິ​ຕໍ່​ສະພາບ​ຝົນຕົກ​ຟ້າຮ້ອງ​ຟ້າ​ເຫຼື້ອມ​ຟ້າຜ່າ ແລະ ລົມ​ພັດ​ແຮງ​ທີ່​ອາດ​ຈະ​ເກີດຂຶ້ນ​ໃນ​ໄລຍະ​ນີ້​ດ້ວຍ.

ຂ່າວທີ່ກ່ຽວຂ້ອງ