ຍີ່ປຸ່ນ ຊ່ວຍເຫຼືອອຸປະກອນການແພດ

244 18 ພ.ພ. 2017 ຂ່າວໜ້າ​ໜຶ່ງ
ຍີ່ປຸ່ນ ຊ່ວຍເຫຼືອອຸປະກອນການແພດ

ລັດຖະບານ​ຍີ່ປຸ່ນ ສືບຕໍ່​ຊ່ວຍເຫຼືອ​ລ້າ​ອຸປະກອນ​ການ​ແພດ ພາຍ​ໃຕ້​ຂອບ​ການ​ຮ່ວມ​ມື Japan-ASEAN Integration Fund (JAIF) ໃຫ້ 2 ໂຮງໝໍ​ຄື: ໂຮງໝໍ​ແມ່ ແລະ ເດັກ ແລະ ໂຮງໝໍ​ມິດຕະພາບ ພິທີ​ມອບ-ຮັບ​ອຸປະກອນ​ການ​ແພດ​ໄດ້​ຈັດ​ຂຶ້ນ ວັນທີ 16 ພຶດສະພາ 2017 ທີ່​ໂຮງໝໍແມ່ ແລະ ເດັກ ຕາງໜ້າ​ມອບຂອງ​ທ່ານ ທາ​ເຄ​ຊິ ຮິ​ກິ​ຮາ​ລະ ເອກ​ອັກຄະລາຊະທູດ​ຍີ່ປຸ່ນ ປະຈຳ​ລາວ ຕາງໜ້າ​ຮັບ​ໂດຍ​ທ່ານ ບຸນ​ກອງ ສີ​ຫາ​ວົງ ລັດຖະມົນຕີກະຊວງ​ສາທາລະນະ​ສຸກ ມີ​ຄະນະ​ອຳນວຍ​ການ​ທັງ​ສອງ​ໂຮງໝໍ ແລະ ພະນັກງານ​ວິຊາ​ການ​ເຂົ້າຮ່ວມ.

ສຳລັບ​ອຸປະກອນ​ການ​ແພດທີ່​ລັດຖະບານ​ຍີ່ປຸ່ນ​ນຳ​ມາ​ມອບໃນ​ຄັ້ງ​ນີ້ ແມ່ນ​ເຄື່ອງ​ອຸນ​ຕາ​ຊາວ (Ultrasound) ຈຳນວນ 2 ເຄື່ອງ ມອບ​ໃຫ້​ໂຮງໝໍ​ແມ່ ແລະ ເດັກ 1 ເຄື່ອງ ແລະ ໂຮງໝໍ​ມິດຕະພາບ 1 ເຄື່ອງ ລວມ​ມູນ​ຄ່າ 221.800 ໂດ​ລາ​ສະຫະລັດ ເທົ່າ​ກັບ 1,8 ຕື້ກວ່າ​ກີບ ເຊິ່ງ​ອຸປະກອນ​ການແພດ​ນີ້ ​ຈະ​ຖືກ​ນຳ​ໃຊ້​ໃນ​ພະ​ແນກລັງສີ ເພື່ອ​ເປັນ​ການ​ຍົກ​ລະດັບ​ໃນການ​ບໍລິການ ສາທາລະນະ​ສຸກ ໃຫ້​ແກ່​ຄົນ​ເຈັບ ທັງ​ເປັນ​ການຍົກ​ລະດັບ​ຄວາມ​ຮູ້​ຄວາມ​ສາມາດ​ໃຫ້​ແກ່​ພະນັກງານ​ແພດ​ໝໍ ໃນ​ການ​ນຳ​ໃຊ້​ເຄື່ອງມື​ທັນ​ສະໄໝ ​ເຂົ້າ​ໃນ​ການ​ປິ່ນປົວ​ເພື່ອໃຫ້​ມີ​ປະ​ສິດທິ​ຜົນ​ສູງ.

ຂ່າວທີ່ກ່ຽວຂ້ອງ