ມອບ-ຮັບອັດຖິທະຫານຫວຽດນາມ ໃນປາງສົງຄາມ ກັບຄືນສູ່ປະເທດ

176 18 ພ.ພ. 2017 ຂ່າວໜ້າ​ໜຶ່ງ
ມອບ-ຮັບອັດຖິທະຫານຫວຽດນາມ ໃນປາງສົງຄາມ ກັບຄືນສູ່ປະເທດ

ໂດຍ​ປະຕິບັດ​ຕາມ​ແຜນ 2016-2017 ການ​ຂຸດ​ຄົ້ນ​ອັດຖິ​ທະຫານ​ອາສາ​ສະໝັກ ແລະ ຊ່ຽວຊານ​ຫວຽດນາມ ທີ່​ເສຍສະຫຼະຊີວິດ​ຢູ່​ລາວ​ໃນ​ປາງ​ສົງຄາມ ດ້ວຍ​ຄວາມ​ເອົາໃຈໃສ່​ໃນ​ການຊອກ​ຄົ້ນ ຂຸດ​ຄົ້ນ​ຂອງ​ໜ່ວຍ​ງານ ຂຸດ​ຄົ້ນ​ອັດຖິ ແຂວງ​ຮ່າ​ຕິ່ງ ແລະ ນະຄອນຫຼວງ​ວຽງ​ຈັນ ໃນ 3 ເມືອງຄື: ເມືອງ​ໄຊ​ທານີ ນາ​ຊາຍທອງ ແລະ ເມືອງ​ສັງ​ທອງ ສາມາດ​ຂຸດ​ຄົ້ນ​ໄດ້​ຈຳນວນ 1 ອັດຖິ.

ໃນ​ລະຫວ່າງ​ວັນ​ທີ 16-17 ພຶດສະພາ 2017 ທີ່​ກອງ​ບັນຊາການ​ທະຫານນະຄອນຫຼວງ ຄະນະ​ພັກ​ອຳນາດ​ການ​ປົກຄອງ​ນະຄອນ​ຫຼວງ​ວຽງ​ຈັນ ຮ່ວມ​ກັບ​ຄະນະ​ພັກ​ອຳນາດ​ການ​ປົກຄອງ ແຂວງ​ຮ່າ​ຕິ່ງ ​ສສ ຫວຽດນາມ ໄດ້​ມີ​ພິທີ​ວາງ​ພວງມາລາ ແລະ ມອບ-ຮັບອັດຖິຂອງ​ອາສາ​ສະໝັກ-ຊ່ຽວຊານ​ຫວຽດນາມ ທີ່ເສຍສະຫຼະ​ຊີວິດ ເພື່ອ​ອຸທິດ​ຕົນໃຫ້​ແກ່​ພາລະກິດ​ຕໍ່ສູ້​ກູ້​ຊາດ​ຂອງປະຊາຊົນ​ລາວໃນ​ປາງ​ສົງຄາມ ຢູ່​ນະຄອນຫຼວງ​ວຽງ​ຈັນ ກັບ​ຄືນຖິ່ນ​ຖານ​ພູມລຳເນົາ​ປະເທດຫວຽດນາມ​ຢ່າງ​ສົມ​ກຽດ ໃຫ້ກຽດ​ເຂົ້າ​ຮ່ວມ​ຂອງ​ທ່ານ ອາ​ນຸພາບ ຕຸ​ນາ​ລົມ ກຳມະການ​ສູນກາງ​ພັກ ຮອງ​ເລຂາ​ຄະນະ​ພັກ ປະທານ​ສະພາ​ປະຊາຊົນນະຄອນ​ຫຼວງ​ວຽງ​ຈັນ ທ່ານ ດັງ ກວັກ​ວິງ ຄະນະ​ປະຈຳ​ພັກ ຮອງປະທານ​ຄະນະ​ກຳມະການ​ປົກຄອງ​ແຂວງ​ຮ່າ​ຕິ່ງ ທ່ານ ​ພັອ ສີພອນ ຈັນ​ສົມ​ວົງ ຄະນະ​ປະຈຳພັກ ນວ ຫົວໜ້າ​ການເມືອງ​ກອງບັນຊາ​ການ​ທະຫານ ນວ ພ້ອມດ້ວຍ​ຄະນະ​ພັກ ອຳນາດ​ການ​ປົກຄອງ ພະນັກງານ-ລັດຖະກອນ ທະຫານ-ຕຳຫຼວດ ນັກຮຽນ ນັກສຶກ​ສາ ແລະ ປະຊາຊົນ​ບັນດາເຜົ່າ.

ລາວ-ຫວຽດນາມ ແມ່ນ​ເພື່ອນມິດ​ສະໜິດ​ແໜ້ນ​ຮ່ວມ​ເປັນ​ຮ່ວມຕາຍ ​ຮ່ວມ​ສູ້​ຮົບ​ໃນ​ຂຸມ​ຄອງ​ດຽວກັນ ແລະ ຮ່ວມ​ຕີ​ສັດຕູ​ໂຕ​ດຽວກັນ ບົນ​ພື້ນຖານ​ຄວາມ​ສາມັກຄີແບບ​ພິເສດ ໃນ​ຂະ​ບວນ​ການ​ຕໍ່ສູ້ໄດ້​ມີ​ຊາວ​ໜຸ່ມ​ຕະລຸມບອນ ໂຮ​ຈີ່ມິງ ຫຼາຍ​ແສນ​ຄົນ​ສະໝັກ​ໃຈອອກ​ສູ່​ແນວ​ໜ້າ​ຂ້າມ​ສາຍພູ​ຫຼວງ ເຂົ້າ​ສູ່​ແນວ​ຮົບ​ພາກ​ຕາເວັນຕົກ ຮ່ວມ​ກັບ​ກອງທັບ​ປະຊາຊົນ​ລາວ ຄຽງ​ບ່າ​ຄຽງ​ໄຫລ່ລຸກຂຶ້ນ​ຕໍ່ສູ້​ຢ່າງ ພິລະ​ອາດ​ຫານ​ຢູ່​ສະໜາມຮົບອັນ​ດຸເດືອດ​ຂ້ຽວຂາດ​ນັ້ນ ມີ​ຫຼາຍສະຫາຍ​ທີ່​ໄດ້​ເສຍ​ຊີວິດ ໃນ​ໄວໜຸ່ມແໜ້ນ ຍອມ​ເສຍ​ເລືອດ​ເນື້ອເພື່ອ​ແລກ​ມາ​ກັບ​ຄວາມ​ເປັນເອກະລາດ​ແຫ່ງ​ຊາດ ຄວາມ​ສະຫງົບ ແລະ ຄວາມ​ສົມບູນ​ພູນ​ສຸກຂອງ​ປະຊາຊົນ​ລາວ​ບັນດາເຜົ່າ.

ຂ່າວທີ່ກ່ຽວຂ້ອງ