ສະພາ ຮັບຮອງຮ່າງປະມວນກົດໝາຍອາຍາ

195 18 ພ.ພ. 2017 ຂ່າວໜ້າ​ໜຶ່ງ
ສະພາ ຮັບຮອງຮ່າງປະມວນກົດໝາຍອາຍາ

ກອງ​ປະຊຸມ​ສະໄຫມ​ສາມັນເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 17 ພຶດສະພາ 2017 ນີ້ ພາຍ​ໃຕ້​ການ​ເປັນ​ປະທານ​ຂອງທ່ານ ສົມ​ພັນ ແພງຄຳ​ມີ ຮອງ​ປະທານ​ສະພາ​ແຫ່ງຊາດ ເຊິ່ງ​ສຽງ​ສ່ວນ​ໃຫຍ່​ແມ່ນໄດ້​ພິຈາລະນາ​ຮັບຮອງ​ເອົາ ​ຮ່າງປະມວນ​ກົດໝາຍ​ອາຍາ ​ເພື່ອ​ໃຫ້ແທດເໝາະ​ກັບ​ສະພາບ​ການ​ຂະຫຍາຍ​ຕົວ​ທາງ​ດ້ານ​ເສດຖະກິດ-ສັງຄົມ ໃນ​ປັດຈຸບັນ.

ທ່ານ ເກດ ກຽດ​ຕິ​ສັກ ຮອງລັດຖະມົນຕີ​ກະຊວງ​ຍຸຕິ​ທຳ ອະນຸ​ກຳມະການ​ຮ່າງ​ປະມວນ​ກົດໝາຍ​ອາຍາ​ ໄດ້​ຂຶ້ນ​ຊີ້​ແຈງ​ກ່ຽວກັບ​ຂໍ້​ຊັກ​ຖາມ​ຂອງ​ສະມາຊິກ​ສະພາ​ແຫ່ງ​ຊາດ (​ສສຊ) ໃຫ້​ຮູ້​ວ່າ: ສຳລັບ​ຜູ້​ກະທຳ​ຜິດ​ຕາມ​ກົດໝາຍ​ແພ່ງ ​ແມ່ນ​ດຳເນີນ​ຄະດີ​ຕໍ່​ຜູ້​ກະທຳ​ຜິດ​ທີ່​ມີ​ອາຍຸ​ແຕ່ 18 ປີ​ຂຶ້ນ​ໄປ ໃນກົດໝາຍ​ອາຍາ​ແລ້ວ​ແມ່ນ​ໃຫ້​ດຳເນີນ​ຄະດີ​ຕໍ່​ຜູ້​ກະທຳ​ຜິດ ​ທີ່​ມີ​ອາຍຸແຕ່ 15 ປີ​ຂຶ້ນ​ໄປ ໝາຍ​ຄວາມວ່າ​ສຳລັບ​ເດັກທີ່​ມີ​ອາຍຸ​ຕ່ຳ​ກວ່າ 15 ປີ​ລົງ​ມາ ຫາກ​ກະທຳ​ຜິດ ແມ່ນ​ຈະ​ບໍ່​ມີ​ຄວາມ​ຮັບຜິດຊອບທາງ​ອາຍາ​ ເຖິງ​ວ່າການ​ກະທຳຜິດ​ນັ້ນ​ຈະ​ຮ້າຍ​ແຮງ​ກໍ່​ຕາມ ມາດຕາ 128 ການ​ຟອກ​ເງິນ ແມ່ນໄດ້​ມາ​ຈາກ​ກົດໝາຍ​ການ​ຕ້ານສະກັດ​ກັ້ນ​ການ​ຟອກ​ເງິນ ແລະ ການ​ສະໜອງ​ທຶນ​ໃຫ້​ແກ່​ການ​ກໍ່ການ​ຮ້າຍ ສຳລັບ​ນິ​ຍາມ​ກົດໝາຍວ່າ​ດ້ວຍ​ການ​ຟອກ​ເງິນ ແມ່ນ​ຖື​ວ່າ​ສອດຄ່ອງ​ກັບ​ພາກ​ພື້ນອາຊີ​ປາ​ຊີ​ຟີກ ນອກຈາກ​ນີ້​ຜູ້​ຊຸກເຊື່ອງ​ເງິນ​ທີ່​ຟອກ​ແລ້ວ​ເອົາ​ເຂົ້າບັນຊີ​ ຖື​ວ່າບຸກຄົນ​ທີ່​ໃຫ້ການ​ຊ່ວຍເຫຼືອ​ນີ້ ​ກໍ່​ຖື​ວ່າ​ເປັນ​ຜູ້​ກະທຳ​ຜິດ​ໄປນຳ ມາດຕາ 296 ການ​ຄິດໄລ່ດອກ​ເບ້ຍ​ສູງ ສຳລັບ​ມາດຕາ​ນີ້ ທາງ​ອະນຸ​ກຳມະການ​ຮ່າງ​ປະມວນ​ກົດໝາຍ​ອາຍາ​ໄດ້​ປຶກສາຫາລື​ກັບ​ທະນາຄານແຫ່ງ ​ສປປ ລາວ ໃນ​ທີ່​ສຸດ​ກໍ່​ໄດ້​ພິຈາລະນາກຳນົດ​ໃສ່​ໃນ​ຮ່າງ​ກົດໝາຍ​ສະບັບ​ດັ່ງກ່າວ​ນີ້ ມາດຕາ 307-308 ວ່າ​ດ້ວຍ​ທີ່​ດິນ ​ບໍ່​ແມ່ນ​ລະບຽບ​ການ​ຄຸ້ມ​ຄອງ​ທີ່​ດິນ​ ມັນແມ່ນ​ກົດໝາຍ​ວ່າ​ດ້ວຍ​ທີ່​ດິນ ສຳລັບ​ບັນຫາ​ດັ່ງກ່າວ​ນີ້​ ອະນຸ​ກຳມະ​ການ​ພວກ​ເຮົາ​ຈະ​ໄດ້​ພິ​ຈາລະນາ ແລະ ປັບປຸງ​ຄືນ.

ຮ່າງ​ປະມວນ​ກົດໝາຍ​ອາຍາ​ສະບັບ​ປັດຈຸບັນ ​ທີ່​ໄດ້​ມີ​ການຮັບຮອງ​ມີ​ທັງ​ໝົດ 416 ມາດຕາ ຫຼຸດ​ລົງ​ຈາກ 420 ມາດຕາ ໃນ​ເວລາ​ນຳ​ເຂົ້າ​ທາບ​ທາມ​ໃນ​ກອງ​ປະຊຸມ​ເທື່ອ​ທີ 2 ເນື່ອງ​ຈາ​ກວ່າ ໄດ້ຕັດ 4 ມາດຕາ​ອອກຄື: 1 ມາດຕາ 212 ກ່ຽວ​ກັບ​ການ​ຫາຍສາບ​ສູນ​ດ້ວຍ​ການ​ບັງຄັບ 2 ມາດຕາ​ທີ່​ກຳນົດ​ການ​ກະທຳ​ຜິດຕໍ່​ປະເທດ​ເພື່ອນ​ມິດ ​ຍ້ອນ​ວ່າ​ໄດ້ຄົ້ນຄວ້າ​ແລ້ວ ເຫັນ​ວ່າ ​ສປປ ລາວ ໄດ້​ມີ​ສົນທິສັນຍາ​ກ່ຽວ​ກັບການ​ຮ່ວມ​ມື​ທາງ​ດ້ານ​ຍຸຕິ​ທຳ​ກັບ ​ສສ ຫວຽດນາມ​ແລ້ວ ເຊິ່ງ​ສາມາດ​ນຳ​ໃຊ້​ສົນທິສັນຍາ​ດັ່ງກ່າວແທນ​ໄດ້ ແລະ ປະເທດ​ເພື່ອນ​ມິດ ​ສສ ຫວຽດນາມ ເອງ​ກໍ່​ໄດ້​ກຳນົດການ​ກະທຳ​ຜິດ​ນີ້ ໃນ​ປະມວນ​ກົດໝາຍ​ອາຍາ​ເຊັ່ນ​ກັນ ສະນັ້ນ ຈິ່ງໄດ້​ຕັດ​ການ​ກະທຳ​ຜິດ​ນີ້​ອອກ 3 ການ​ກະທຳ​ຜິດ​ເປັນ​ອາ​ຈິນ (ມາດຕາ 19 ໃນ​ເມື່ອ​ກ່ອນ) ໄດ້​ຍ້າຍໄປ​ອະທິບາຍ​ຄຳ​ສັບຢູ່​ມາດຕາ 3 ສ່ວນ 4 ການ​ວາງ​ໂທດ​ໃສ່​ການກະທຳ​ຜິດ​ເປັນ​ອາ​ຈິນ (ມາດຕາ 67 ໃນ​ເມື່ອ​ກ່ອນ) ໄດ້​ຕັດ​ອອກ ເນື່ອງ​ຈາ​ກວ່າ​ມາດຕາ​ດັ່ງກ່າວ ໄດ້​ກຳນົດ​ວາງ​ໂທດ​ຄື​ກັນ​ກັບ​ຫຼັກການ​ຂອງ​ການ​ວາງ​ໂທດ​ໃສ່​ການກະທຳ​ຜິດ ​ໃນ​ກໍລະນີ​ທົ່ວ​ໄປ​ເທົ່ານັ້ນ.

ຂ່າວທີ່ກ່ຽວຂ້ອງ