ເຈົ້າຄອງ ຕິດຕາມໂຄງການປະຕິສັງຂອນພະທາດຫຼວງ ໄລຍະ III ແລະ IV

216 18 ພ.ພ. 2017 ຂ່າວໜ້າ​ໜຶ່ງ
ເຈົ້າຄອງ ຕິດຕາມໂຄງການປະຕິສັງຂອນພະທາດຫຼວງ ໄລຍະ III ແລະ IV

ຄະນະ​ຮັບຜິດຊອບ​ລະດັບຊາດ​ ປະຕິສັງຂອນ​ພິ​ພິ​ທະ​ພັນ​ພະທາດຫຼວງ​ວຽງ​ຈັນ ຄັ້ງ​ທີ IV ນຳໂດຍ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ທັງ​ເປັນ​ປະທານ​ຄະນະ​ກຳ​ມະການ​ປະຕິສັງຂອນ​ພິ​ພິ​ທະ​ພັນ​ພະທາດຫຼວງ​ວຽງ​ຈັນ ລົງ​ຕິດຕາມກວດກາ​ຄວາມ​ຄືບ​ໜ້າ ແລະ ຊີ້ນຳ​ການ​ປະຕິສັງຂອນ​ພະທາດຫຼວງ​ວຽງ​ຈັນ ຄັ້ງ​ທີ IV ວັນ​ທີ 17 ພຶດສະພາ 2017 ທີ່​ເດີ່ນ​ພະທາດຫຼວງ​ວຽງ​ຈັນ ຖືກ​ຕ້ອນຮັບ​ໂດຍທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະ​ທຳ ແລະ ທ່ອງ​ທ່ຽວ ນະຄອນ​ຫຼວງ​ວຽງ​ຈັນ ບໍລິສັດ​ທີ່​ໃຫ້ການ​ຮັບ​ເໝົາ ພະນັກງານ​ວິຊາ​ການ​ກ່ຽວຂ້ອງ.

ເພື່ອ​ຕິດຕາມ​ກວດກາ​ຄືນ ຄວາມ​ສຳເລັດ​ຂອງ​ການ​ປະຕິ​ສັງຂອນ​ພະ​ທາດຫຼວງ ຄັ້ງ​ທີ IV ໄລຍະ​ທີ I ແລະ ໄລຍະ​ທີ II ພ້ອມ​ທັງຕິດຕາມ​ຄວາມ​ຄືບ​ໜ້າ​ຂອງ​ການປະຕິສັງຂອນ ໄລຍະ​ທີ III ແລະ IV ເປັນຕົ້ນ ວຽກ​ສ້ອມແປງ​ຫໍ​ໄຫວ້ ແລະ ຊຸ້ມ​ປະຕູ​ໃຫຍ່​ເບື້ອງ​ທິດ​ຕາເວັນ​ຕົກ ​ທີ່​ກຳລັງ​ດຳເນີນ​ການສ້ອມແປງ ຈາກ​ນັ້ນ ຄະນະ​ກຳມະ​ການ​ລະດັບ​ຊາດ ​ໄດ້​ກວດກາບັນດາ​ລະບົບ​ຮ່ອງ​ລະບາຍ​ນ້ຳ​ທີ່ຢູ່​ດ້ານ​ໃນ ແລະ ດ້ານ​ນອກ​ຂອງກົມ​ມະ​ລຽນ​ພະ​ທາດຫຼວງ ເຊິ່ງເນັ້ນ​ໃຫ້​ປັບປຸງ ແລະ ອະນາໄມຮ່ອງ​ລະບາຍ​ນ້ຳ​ໃຫ້​ມີ​ຄວາມ​ສະອາດ ບໍ່​ໃຫ້​ນ້ຳ​ຖ້ວມ​ຂັງ ພ້ອມ​ທັງໄຫຼ​ສະດວກ​ສະບາຍ ນອກ​ນັ້ນ ແນະນຳ​ໃຫ້​ປັບປຸງ​ເດີ່ນ​ພະທາດຫຼວງ​ທາງ​ທິດເໜືອ ເພື່ອ​ໃຫ້​ຄົນຍ່າງ​ໄປ​ມາ​ສະດວກ​ສະບາຍ ແລະ ແນະນຳ​ໃຫ້​ປູກ​ຫຍ້າ​ໃສ່ເດີ່ນ​ກົມ​ມະ​ລຽນ​ບາງ​ຈຸດ ເພື່ອ​ໃຫ້ເປັນ​ພື້ນ​ຫຍ້າ​ສີຂຽວ ແລະ ອື່ນໆ.

ທ່ານ ບຸນ​ມີ ສອນ​ມີ​ໄຊ ປະທານ​ບໍລິສັດ ມີ​ພູນ​ຊັບ​ກໍ່ສ້າງ ຈຳກັດ ກ່າວ​ວ່າ: ການ​ດຳເນີນ​ໂຄງການ​ປະຕິສັງຂອນ​ພະ​ທາດຫຼວງ ຄັ້ງ​ທີ IV ໄລຍະ​ທີ III ແລະ IV ປະກອບ​ມີ ວຽກ​ມຸງ​ຫຼັງຄາ ທາສີ​ຝາກົມ​ມະ​ລຽນ ສ້ອມແປງ​ຫໍ​ໄຫວ້ ແລະ ຊຸ້ມ​ປະຕູ​ໃຫຍ່​ທິດ​ຕາເວັນຕົກ ວຽກ​ຮ່ອງ​ລະບາຍ​ນ້ຳວຽກ ໄຟຟ້າ ວຽກ​ສະໜາມ​ຫຍ້າ ວຽກຈັດ​ວາງສະແດງ​ວັດຖຸ​ພັນ ແລະ ລະບົບ​ປ້ອງ​ກັນການ​ຕິດ​ຕັ້ງ​ກ້ອງວົງ​ຈອນ​ປິດ​ດ້ານ​ໃນ ແລະ ດ້ານນອກ​ກົມ​ມະ​ລຽນ ຜ່ານ​ການ​ລົງມື​ປະຕິບັດ​ຕົວ​ຈິງ ​ມາ​ຮອດ​ປັດ​ຈຸບັນ​ສຳເລັດ 95% ເຊິ່ງ​ວຽກ​ທີ່​ກຳລັງ​ດຳເນີນ​ການ​ປະຕິສັງຂອນ​ປະກອບ​ມີ ສ້ອມແປງປ່ຽນ​ຖ່າຍ​ໄມ້ທີ່​ໂດກ​ຂອງ​ຫໍ​ໄຫວ້ ແລະ ຊຸ້ມ​ປະຕູໃຫຍ່​ເບື້ອງ​ທິດຕາເວັນຕົກ ທາສີ​ຝາ-ຂັດ​ພື້ນ​ກົມ​ມະ​ລຽນ​ໃຫ້​ມີຄວາມ​ສະອາດ ແລະ ວຽກ​ເກັບເລັມ​ໃຫ້​ລະອຽດ​ຄາດ​ວ່າ​ທ້າຍເດືອນຕຸລາ 2017 ຈະ​ໃຫ້​ສຳເລັດ ສຳລັບ​ການ​ລົງ​ຕິດຕາມກວດກາ​ຂອງ​ທ່ານ​ເຈົ້າ​ຄອງ ພ້ອມດ້ວຍ​ຄະນະ​ຄັ້ງ​ນີ້ ທ່ານ​ໄດ້​ໃຫ້​ທິດຊີ້​ນຳ​ໂດຍ​ເນັ້ນ​ໃສ່​ໜ້າ​ວຽກ​ປູກຫຍ້າ​ໃສ່​ເດີ່ນ​ກົມ​ມະ​ລຽນ​ພະທາດຫຼວງ​ ໃຫ້​ເປັນ​ພື້ນ​ສີຂຽວ ອະ​ນາໄມ ພ້ອມ​ທັງ​ສ້ອມແປງ​ຮ່ອງ​ລະບາຍ​ນ້ຳ​ໃຫ້​ນ້ຳ​ໄຫຼ​ສະດວກ​ສະບາຍ​ທັນ​ກັບ​ລະດູຝົນ​ນີ້.

ຂ່າວທີ່ກ່ຽວຂ້ອງ