ແລກປ່ຽນບົດຮຽນການຄຸ້ມຄອງເສດຖະກິດມະຫາພາກ

233 18 ພ.ພ. 2017 ຂ່າວໜ້າ​ໜຶ່ງ
ແລກປ່ຽນບົດຮຽນການຄຸ້ມຄອງເສດຖະກິດມະຫາພາກ

2017 ເປັນ​ປີ​ທີ​ສອງ ໃນ​ການຈັດ​ຕັ້ງ​ປະຕິບັດ​ແຜນ​ພັດທະນາເສດຖະກິດ-ສັງຄົມ​ແຫ່ງ​ຊາດ ຄັ້ງທີ VIII ລັດຖະບານ​ຄາດ​ວ່າ​ປີ​ນີ້ເປັນ​ປີ​ໜຶ່ງ​ທີ່​ຈະ​ສືບຕໍ່​ຄວາມ​ທ້າທາຍ ເນື່ອງ​ຈາກ​ສະພາບ​ແວດລ້ອມ​ຂອງ​ພາຍ​ໃນ​ພາກ​ພື້ນ ແລະ ສາກົນ ມີ​ທັງ​ສິ່ງ​ເອື້ອ​ອຳນວຍຄວາມ​ສະດວກ ແລະ ສິ່ງ​ທ້າທາຍ ເຊິ່ງ​ຈະ​ສົ່ງ​ຜົນ​ກະທົບ​ເຖິງການ​ພັດທະນາ​ເສດຖະກິດ-ສັງຄົມຂອງ ສປປ ລາວ.

ເພື່ອ​ຮັບປະກັນ​ໃຫ້​ຄາດໝາຍມະຫາ​ພາກ ​ບັນລຸ​ຕາມ​ແຜນ​ລັດຖະ​ບານ​ໄດ້​ມີ​ມາດ​ຕະການ ແລະ ບັນດາ​ໜ້າ​ວຽກ​ຈຸດ​ສຸມ​ທີ່​ສຳຄັນ ສະເໜີ​ຕໍ່​ກອງ​ປະຊຸມ​ສະໄໝ​ສາມັນ​ຂອງ​ສະພາ​ແຫ່ງ​ຊາດ ​ທີ່​ພວມດຳເນີນ​ຢູ່​ ເປັນຕົ້ນ ການ​ຄຸ້ມ​ຄອງເສດຖະກິດ​ມະຫາ​ພາກ​ໃຫ້​ມີ​ສະຖຽນ​ລະ​ພາບ ແລະ ໝັ້ນ​ທ່ຽງ ການ​ປັບປຸງ​ການ​ຄຸ້ມ​ຄອງ​ລະບົບການ​ເງິນ-ງົບປະມານ​ການ​ຄຸ້ມຄອງ​ເງິນຕາ​ໃຫ້​ມີ​ສະຖຽນ​ລະພາບ ປະຕິບັດ​ນະໂຍບາຍ​ດອກເບ້ຍ​ທີ່​ສົມ​ເຫດ​ສົມ​ຜົນ​ຕາມ​ກົນໄກ​ຕະຫຼາດ ກຳນົດ​ອັດຕາ​ດອກເບ້ຍ​ເງິນ​ຝາກ-ເງິນ​ກູ້​ຂອງ​ທະ​ນາຄານ​ທຸລະ​ກິດ​ໃຫ້​ເໝາະ​ສົມ ປັບປຸງ​ສະພາບ​ແວດ​ລ້ອມ ​ໃນ​ການກຳນົດ​ທຸລະ​ກິດ ໂດຍ​ແກ້​ໄຂ​ຂັ້ນຕອນ ແລະ ຂອດ​ຕ່າງໆ​ທີ່​ບໍ່​ສະດວກ​ກົດ​ໜ່ວງ ​ດ້ວຍ​ການ​ປະຕິບັດ​ກົດໝາຍ​ສົ່ງເສີມ​ການ​ລົງທຶນ (ສະບັບ​ປັບປຸງ​ປີ 2016) ກວດກາຄືນ​ດຳລັດວ່າ​ດ້ວຍ​ການ​ຄຸ້ມ​ຄອງ ລາຄາ​ສິນຄ້າ ແລະ ບໍລິການ ແລະ ຄົ້ນຄວ້າ​ອອກ​ລະບຽບ​ການເພີ່ມ​ຕື່ມ ຊຸກຍູ້​ສົ່ງເສີມ​ການ​ຜະລິດ ແລະ ການ​ບໍລິການ ໂດຍການ​ສົ່ງເສີມ​ການ​ລົງທຶນ​ໃສ່​ຂະແໜງ​ການ​ຜະລິດ ແລະ ການ​ບໍລິ​ການ​ທີ່​ເປັນ​ທ່າແຮງ ຊຸກຍູ້​ການຈັດ​ຕັ້ງ​ປະຕິບັດ​ໂຄງການ​ໃຫຍ່ ລະດັບ​ຊາດ​ທີ່​ລັດຖະບານ​ໄດ້​ຕົກລົງ ແລະ ບັນຈຸ​ໃນ​ແຜນ​ແລ້ວ.

ວັນ​ທີ 17 ພຶດສະພາ 2017 ຢູ່​ທີ່​ໂຮງແຮມ​ລາວ​ພລາ​ຊາ ລັດຖະ​ບານ ​ສປປ ລາວ ໄດ້​ຈັດ​ກອງປະຊຸມ​ສຳ​ມະ​ນາ​ກ່ຽວ​ກັບ​ສະພາບ​ເສດຖະກິດ​ຂອງ​ພາກ​ພື້ນ ແລະ ບົດຮຽນ​ຂອງ​ປະເທດ​ໄທ ໃນ​ການ​ຄຸ້ມ​ຄອງ​ເສດຖະກິດ​ມະຫາ​ພາກ ການ​ລະດົມ​ແຫຼ່ງ​ທຶນ ເພື່ອ​ການ​ພັດທະນາ ແລະ ການກະ​ຕຸ້ນ​ເສດຖະກິດ​ໃນ​ໄລຍະ​ເສດຖະ​ກິດ​ຂະຫຍາຍຕົວ ເພື່ອ​ຮັບ​ຟັງບົດຮຽນ ແລະ ປະສົບ​ການ​ຕົວ​ຈິງ ໃນ​ການ​ຄຸ້ມ​ຄອງ​ເສດຖະກິດ​ມະຫາ​ພາກ ໂດຍ​ສະເພາະ ໃນ​ໄລຍະພາກ​ພື້ນ​ໄດ້​ປະ​ເຊີນ​ກັບ​ວິ​ກິດ​ການການ​ເງິນ ການ​ຄຸ້ມ​ຄອງ​ການເງິນ-ງົບປະມານ ການ​ຄຸ້ມ​ຄອງເງິນຕາ​ໃຫ້​ມີ​ສະຖຽນ​ລະ​ພາບ ການ​ສົ່ງເສີມ​ສິນຄ້າ ແລະ ການລົງທຶນ ການ​ປັບປຸງ​ລັດ​ວິ​ສາ​ຫະກິດ ແລະ ບົດຮຽນ​ອື່ນໆຈາກທ່ານ ​ດຣ. ວິລະ​ພົງ ຣາ​ມາ​ກຸນ ອະດີດ​ຮອງ​ນາຍົກລັດຖະມົນຕີແຫ່ງ​ຣາ​ຊະ​ອານາຈັກ​ໄທ ອະດີດ​ທີ່​ປຶກສາ​ສະມາຄົມໄທ-ລາວ ເພື່ອ​ມິດຕະພາບ ໂດຍ​ເປັນ​ປະທານ​ກອງ​ປະຊຸມ​ຂອງ​ທ່ານ ສົມດີ ດວງ​ດີ ຮອງ​ນາຍົກ​ລັດ​ຖະ​ມົນຕີ ລັດຖະມົນຕີ​ກະຊວງ​ການ​ເງິນ ມີ​ບັນດາ​ຄະນະ​ໜ່ວຍ​ງານ​ເສດ​ຖະກິດ​ຂອງ​ລັດຖະບານ ແລະ ແຂກທີ່​ຖືກ​ເຊີນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ