ກະທຳຜິດຫຼາຍສະຖານ ສານຕັດສິນລົງໂທດ 14 ປີ

211 19 ພ.ພ. 2017 ຂ່າວໜ້າ​ໜຶ່ງ

ໃນ​ວັນ​ທີ 10 ພຶດສະພາ 2017 ທ້າວ ອາ​ນຸ​ກອນ ຫຼື ເປັດ ອາຍຸ 39 ປີ ຢູ່​ບ້ານ​ໜອງ​ດ້ວງ​ທົ່ງ ເມືອງ​ສີໂຄດ​ຕະບອງ ນະຄອນຫຼວງ​ວຽງຈັນ ຖືກ​ຄະນະ​ສານ​ອາຍາສານປະຊາຊົນ​ຂັ້ນ​ຕົ້ນ​ນະຄອນຫຼວງວຽງ​ຈັນ ຕັດ​ອິດສະຫຼະພາບ 14 ປີ ແລະ ປັບ​ໃໝ 17 ລ້ານ​ກີບ ໃນສະຖານ​ຄ້າຂາຍ​ຢາ​ເສບ​ຕິດຄ້າ ຂາຍ​ອາວຸດ​ເສິກ ແລະ ປຸ້ນ​ຊັບຂອງ​ພົນລະເມືອງ.

ໃນ​ຫ້ອງ​ປະຊຸມ​ສານ ຄະນະສານ​ໄດ້​ຊັກ​ຖາມ​ຂໍ້​ມູນ​ໃນ​ສຳນວນ​ຄະດີ​ຢ່າງ​ຄົບ​ຖ້ວນ ເຊິ່ງ​ຈຳເລີຍ​ໃຫ້ການ​ສາລະພາບວ່າ: ໄດ້​ເລີ່ມ​ເຄື່ອນ​ໄຫວ​ຄ້າຂາຍຢາ​ເສບ​ຕິດ ແລະ ເສບ​ຢາ​ບ້າ​ມາ ແຕ່​ປີ 2010 ເຊິ່ງ​ຢາ​ບ້າ​ທີ່​ມາ​ຂາຍ​ນັ້ນ ​ແມ່ນ​ໄດ້​ມາ​ຈາກ​ທ້າວ ກາ​ລິວ ອາຍຸ​ປະມານ 46 ປີ ແລະ ທ້າວ ຕຸ້ຍ ອາຍຸ​ປະມານ 45 ປີ ເປັນ​ຄົນ​ແຂວງ​ອຸດົມ​ໄຊ ໂດຍ​ການ​ປຸ້ນ​ເອົາດ້ວຍ​ວິທີ​ສັ່ງ​ຊື້​ຢາ​ບ້າ​ແລ້ວ​ນັດ​ຈຸດຊື້​ຂາຍ​ກັນ ເມື່ອ​ມາ​ຮອດ​ກໍ່​ເອົາ​ມີດ ຫຼື ປືນຈີ້​ເອົາ​ຢາ​ບ້າ​ໄດ້ຄັ້ງ​ລະ 1 ຖົງຫາ 1 ມັດ ຈາກ​ນັ້ນ​ກໍ່​ນຳໄປຂາຍ​ໃຫ້​ກັບ​ໄວ​ລຸ້ນ​ທີ່​ມົ້ວ​ສຸມ​ຢາເສບ​ຕິດ ​ຢູ່​ຕາມ​ເຮືອນ​ພັກ​ຕ່າງໆໃນ​ນະຄອນຫຼວງ​ວຽງ​ຈັນ ສ່ວນປືນ​ທີ່​ນຳ​ໃຊ້​ເຂົ້າ​ໃນ​ການ​ປຸ້ນ ແມ່ນ​ໄດ້​ຊື້​ນຳ​ທ້າວ ດ່ອງ ອາຍຸ​ປະມານ 35 ປີ ສັນຊາດ​ໄທ ໃນ​ລາຄາ 10.000 ບາດ.

ຈຳເລີຍ​ຍັງ​ຮັບ​ສາ​ພາບ​ຕື່ມວ່າ: ຜ່ານ​ມາ​ເຄີຍ​ຊື້​ຢາ​ບ້ານຳທ້າວ ສົມ​ສັກ ຫຼື ເນີດ ຄົນ​ບ້ານດຽວ​ກັນ ແລະ ທ້າວ ອອດ ອາຍຸ ປະມານ 44 ປີ ຢູ່​ບ້ານ​ໜອງ​ບົວທອງ​ເໜືອ ເມືອງ​ສີ​ໂຄດ​ຕະບອງ ຄັ້ງ​ລະ 1-2 ຖົງ ມາ​ຮອດ​ວັນ​ທີ 11 ກໍລະກົດ 2016 ຈຳເລີຍ​ໄດ້​ໄປ​ຊື້ຢາ​ບ້າ​ນຳ​ທ້າວ ຊຽງ ອາຍຸ​ປະມານ 30 ປີ ຢູ່​ບ້ານ​ສະພານ​ທອງ ຈຳນວນ 100 ເມັດ ແລະ ຢາ​ໄອສ໌ ຈາກ​ນັ້ນ ຈຳເລີຍ​ໄດ້​ນຳ​ເອົາ​ຢາບ້າ ຈຳນວນ 49 ເມັດ ມາ​ເສບເອງ ມາ​ຮອດ​ວັນ​ທີ 14 ກໍລະກົດ 2016 ຖືກ​ເຈົ້າ​ໜ້າທີ່ ​ປກສ ຈັບໄປ​ດຳເນີນ​ຄະດີ​ຕາມ​ກົດໝາຍ.

ຂ່າວທີ່ກ່ຽວຂ້ອງ