ສູ້ຊົນຜະລິດກະສິກຳສະອາດໃຫ້ໄດ້ 500 ກວ່າໂຕນ

168 19 ພ.ພ. 2017 ຂ່າວໜ້າ​ໜຶ່ງ
ສູ້ຊົນຜະລິດກະສິກຳສະອາດໃຫ້ໄດ້ 500 ກວ່າໂຕນ

ທ່ານ ເດດ​ສັກດາ ມະນີ​ຄຳ ຮອງ​ຫົວໜ້າ​ພະ​ແນກ​ກະສິກຳ ແລະ ປ່າໄມ້ ແຂວງ​ຄຳ​ມ່ວນ ໄດ້ໃຫ້​ສຳພາດ​ກ່ຽວ​ກັບ​ການ​ພັດ​ທະນາ​ກະສິກຳຂອງ​ແຂວງ​ຄຳ​ມ່ວນ ໂອກາດ​ເຂົ້າ​ຮ່ວມ​ກອງ​ປະຊຸມ​ກະສິ​ກຳ​ສະອາດ ປະຈຳ​ປີ 2016 ທີ່ກະຊວງ​ກະສິກຳ ແລະ ປ່າໄມ້ ເມື່ອ​ບໍ່​ດົນ​ວ່າ: ແຂວງ​ຄຳ​ມ່ວນ ເປັນ​ແຂວງ​ໜຶ່ງ​ທີ່​ຖືກ​ມອບ​ໝາຍຈາກ​ລັດຖະບານ ​ໃນ​ການ​ຄ້ຳ​ປະກັນ​ສະບຽງ​ອາຫານ ໂດຍ​ສະເພາະ ປະເພດ​ເຂົ້າ ເຊິ່ງ​ພາຍຫຼັງທີ່​ມີ​ນະໂຍບາຍ​ດັ່ງກ່າວ ແຂວງໄດ້​ລົງມື​ຈັດ​ຕັ້ງ​ປະຕິບັດ​ໂດຍ​ເຈົ້າແຂວງ​ຄຳ​ມ່ວນ​ເປັນ​ເຈົ້າ​ການ​ຊີ້ນຳ ເຊິ່ງ​ປີຜ່ານມາ​ໄດ້​ວາງ​ແຜນປູກ​ເຂົ້າ​ລະດູຝົນ 90 ພັນ​ເຮັກຕາ ນາແຊງ 10 ພັນ​ເຮັກຕາ ຄ້ຳ​ປະກັນ​ສະບຽງ​ອາຫານ 70 ພັນ​ເຮັກຕາ ແລະ ເປັນ​ສິນຄ້າ 20 ເຮັກຕາ ພ້ອມ​ນັ້ນ ໄດ້​ມີ​ແຜນ​ປູກ​ພືດທັງ​ໝົດ 14 ພັນ​ເຮັກຕາ ໃນ​ນີ້ ລະດູ​ແລ້ງ 10 ພັນ​ເຮັກຕາ ລະດູຝົນ 4 ພັນ​ເຮັກຕາ ແລະ ຊົນ​ລະ​ປະທານ 1.100 ເຮັກຕາ ຜ່ານ​ການຈັດ​ຕັ້ງ​ປະຕິບັດ​ໃນ​ລະດູແລ້ງ​ ບໍ່​ສາມາດ​ບັນລຸ​ໃນ​ນາແຊງ ເນື່ອງ​ມາຈາກ​ລະບົບ​ການ​ພັດທະນາ​ຊົນລະ​ປະທານ​ບໍ່​ຕໍ່​ເນື່ອງ ຄອງເໝືອງບໍ່​ໄດ້​ມາດຕະຖານ ແລະ ອື່ນໆ ປັດຈຸບັນ ​ສາມາດ​ຜະລິດ​ໄດ້ 82% ຂອງ​ເນື້ອທີ່​ແຜນການ ຕໍ່​ກັບ​ສະພາບ​ການ​ນັ້ນ ​ໄດ້​ມີ​ການ​ປູກ​ພືດທົດ​ແທນ​ໃນ​ເນື້ອທີ່​ຊົນລະປະທານ ສາມາດ​ປູກ​ໄດ້​ເກືອບ 900 ເຮັກຕາ ນອກຈາກ​ນີ້ ພາຍຫຼັງ​ທີ່​ເກັບກ່ຽວ​ພືດ​ລະດູແລ້ງ​ສຳເລັດ​ແລ້ວ ພະ​ແນກ​ກະສິກຳ ແລະ ປ່າໄມ້ ແຂວງ​ຄຳ​ມ່ວນ ຈະ​ສູ້​ຊົນ ແລະ ຊຸກຍູ້​ສົ່ງເສີມ​ການ​ປູກ​ພືດ​ລະດູຝົນ​ໃຫ້​ໄດ້ 85 ພັນ​ເຮັກຕາ ໂດຍຈະ​ອອກ​ແຈ້ງ​ການ​ໃຫ້​ຫ້ອງການກະສິກຳ ແລະ ປ່າໄມ້​ເມືອງ​ ຂຸ້ນຂ້ຽວ​ເກັບ​ກູ້​ຜົນ​ຜະລິດ​ພືດ​ລະດູແລ້ງ​ໃຫ້​ທັນ​ຕາມ​ເວລາ​ທີ່​ກຳນົດໄວ້ ເພື່ອ​ຮັບປະກັນ​ບໍ່​ໃຫ້​ມີ​ການຕົກເຮ່ຍ​ເສຍ​ຫາຍ ພ້ອມ​ທັງ​ແຈ້ງການ​ໃຫ້​ຊາວນາ​ກະກຽມ​ແນວພັນ​ເຂົ້າ ແລະ ຈັດ​ໜ່ວຍ​ວິຊາການ​ລົງ​ໄປ​ແຕ່​ລະ​ເມືອງ​ແນະນຳ ໃຫ້​ປູກ​ເຂົ້າ​ທີ່​ຕະຫຼາດ​ຕ້ອງການໃນ​ອະນາຄົດ.

ສ່ວນ​ການ​ຜະລິດ​ກະສິກຳ​ສະອາດ​ໃຫ້​ເປັນ​ສິນຄ້າ ​ກໍ່​ໄດ້​ມີ​ການສົມທົບ​ກັບ​ກົມ​ຕ່າງໆ​ຂອງ​ກະຊວງ​ກະສິກຳ ແລະ ປ່າໄມ້ ໂດຍສະເພາະແມ່ນ​ກົມ​ປູກຝັງ ແລະ ຄູ່​ຮ່ວມ​ພັດທະນາ​ໂຄງການ​ຕ່າງໆ ໂດຍ​ລິ​ເລີ່ມ​ສ້າງ​ກຸ່ມ​ຜະລິດ​ໃນ 2 ກຸ່ມ​ບ້ານ ໄດ້​ເນັ້ນ​ໃສ່​ບ້ານ​ສາມສ້າງ​ຂອງ​ເມືອງ​ໜອງ​ບົກ ແລະ ສ້າງ​ຕະຫຼາດ​ທ້ອງຖິ່ນ​ຢູ່​ບ້ານ​ກ້ວຍ​ຈັບ ເຊິ່ງ​ສາມາດ​ຊຸກຍູ້​ສົ່ງເສີມປະຊາຊົນ ຈຳນວນ 100 ກວ່າຄອບຄົວ ຜະລິດ​ກະສິກຳ​ສະອາດ ໃນ​ເນື້ອທີ່ 100 ເຮັກຕາ ຜົນ​ຜະລິດ​ໄດ້ 350 ໂຕນ ພ້ອມ​ນັ້ນ ໄດ້ສົ່ງເສີມ​ຜູ້​ປະກອບ​ການ​ໂຮງສີ​ເຂົ້າ ສ້າງສັນ​ຍາ​ກັບ​ກຸ່ມ​ຜະລິດ​ຊາວນາ​ທີ່​ໄດ້​ສ້າງຕັ້ງ​ຂຶ້ນ ແລະ ສ້າງຄວາມ​ເຂັ້ມແຂງ​ທາງ​ດ້ານ​ການຜະລິດ​ກະສິກຳ​ສະອາດ ປັດຈຸບັນ ແຂວງ​ຄຳ​ມ່ວນ​ສາມາດ​ເປັນ​ຮູບແບບ​ໃນ​ການ​ສົ່ງເສີມ​ຜະລິດ​ກະສິກຳ​ແບບ​ສະອາດ ແລະ ທິດ​ທາງຕໍ່ໜ້າ​ຈະ​ຂະຫຍາຍ​ເນື້ອທີ່​ການຜະລິດ​ໃຫ້​ໄດ້ 160 ເຮັກຕາ ເພື່ອ​ສູ້ຊົນ​ຜະລິດ​ໃຫ້​ໄດ້ 500 ກວ່າ​ໂຕນ ເຊິ່ງ​ກຳລັງ​ຮ່ວມ​ມື​ກັບ​ກົມ​ປູກຝັງເປັນ​ເຈົ້າ​ການ​ຊ່ວຍ​ຊາວນາ ເປັນຕົ້ນ ຂະ​ບວນ​ການ​ຄຸ້ມ​ຄອງ ຂະບວນ​ການ​ກວດ​ສອບ ແລະ ອື່ນໆ ເພື່ອ​ເຮັດ​ໃຫ້​ເຂົາເຈົ້າ​ສາມາດ​ຜະລິດ​ໄປ​ຕາມ​ມາດຖານ​ກະສິກຳ​ສະອາດ ແລະ ສະໜອງ​ໃຫ້​ພຽງພໍກັບ​ຄວາມ​ຕ້ອງການ​ຂອງ​ຕະຫຼາດ ກໍ່​ຄືຜູ້​ບໍລິໂພກ.

ຂ່າວທີ່ກ່ຽວຂ້ອງ