ມຊ ຈັດຕະຫຼາດສະໝັກງານ ສະໜອງແຮງງານໃຫ້ເໝາະກັບໜ້າວຽກ

157 19 ພ.ພ. 2017 ຂ່າວໜ້າ​ໜຶ່ງ
ມຊ ຈັດຕະຫຼາດສະໝັກງານ ສະໜອງແຮງງານໃຫ້ເໝາະກັບໜ້າວຽກ

ມະຫາວິທະຍາໄລ​ແຫ່ງ​ຊາດ (​ມຊ) ໄດ້​ຈັດ​ງານ​ຕະຫຼາດ​ສະໝັກ​ງານ ເພື່ອ​ເປັນ​ການ​ປະ​ເມີນເຖິງ​ຜົນສຳເລັດ ​ໃນ​ການ​ກໍ່ສ້າງຊັບພະຍາກອນ​ມະນຸດ ໂດຍ​ສະເພາະແມ່ນ​ການ​ສະໜອງ​ແຮງງານ​ທີ່​ມີ​ຄວາມ​ຮູ້​ຄວາມ​ສາມາດ ໃຫ້​ແທດເໝາະ​ກັບ​ໜ້າ​ວຽກ ຫຼື ຕະຫຼາດ​ແຮງ​ງານ​ໃນ​ປັດຈຸບັນ​ໃຫ້ນັບ​ມື້​ເພີ່ມ​ຂຶ້ນ ເຊິ່ງ​ກິດຈະກຳ​ດັ່ງກ່າວ​ ໄດ້​ຈັດ​ຂຶ້ນ​ໃນ​ວັນ​ທີ 17 ພຶດສະພາ 2017 ທີ່​ສະໂມສອນ ​ມຊ ໂດຍ​ມີ​ທ່ານ ສົມ​ສີ ຍໍ​ພັນ​ໄຊ ວ່າການ​ອະທິການ​ບໍດີ​ມະຫາ​ວິ​ທະຍາ​ໄລ​ແຫ່ງ​ຊາດ ບັນດາ​ຄະນະບໍດີ ຕາງໜ້າ​ຈາກ​ສະ​ຖາ​ບັນ​ການສຶກ​ສາ​ອ້ອມ​ຂ້າງ ​ມຊ ພ້ອມ​ດ້ວຍພະນັກງານ-ຄູ​ອາຈານ ແລະ ນັກສຶກ​ສາ​ເຂົ້າ​ຮ່ວມ.

ໃນ​ພີ​ທີ ທ່ານ ສົມ​ສີ ຍໍ​ພັນ​ໄຊ ໄດ້​ຂຶ້ນ​ກ່າວ​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ພາກສ່ວນ​ທີ່​ກ່ຽວຂ້ອງ ກັບ​ຂະ​ບວນ​ການ​ຮຽນ-ການ​ສອນພາຍ​ໃນ ​ມຊ ທີ່​ໄດ້​ອອກແຮງ​ຢ່າງຕັ້ງໜ້າ​ ເຂົ້າ​ໃນ​ວຽກ​ງານ​ບຸກ​ທະລຸ​ດ້ານ​ການ​ກໍ່ສ້າງ ແລະ ພັດ​ທະນາ​ຊັບພະຍາກອນ​ມະນຸດ​ໃຫ້​ແກ່ສັງຄົມ ກໍ່​ຄືປະເທດ​ຊາດ ຕາມແນວທາງ​ນະໂຍບາຍ​ຂອງ​ພັກ ແລະ ລັດຖະບານ​ຢ່າງ​ມີ​ຜົນ​ສຳເລັດ​ເປັນ​ກ້າວໆ​ມາ ​ເຊິ່ງ ​ມຊ ໄດ້ສຸມ​ໃສ່​ການ​ພັດທະນາ​ຫຼັກສູດການ​ຮຽນ-ການ​ສອນ ເພື່ອ​ເນັ້ນໃສ່​ຄວາມ​ຮຽກຮ້ອງ​ຕ້ອງການຂອງ​ໜ້າທີ່​ວຽກ​ງານ​ຂອງ​ສັງຄົມ ປັດຈຸບັນ ໃນ​ຂະແໜງການ​ຕ່າງໆ ເປັນຕົ້ນ​ແມ່ນ​ດ້ານ​ເສດຖະກິດ ທີ່​ມີ​ຄວາມ​ຕ້ອງການ​ດ້ານ​ບຸ​ຄະລາ​ກອນ​ຈຳນວນ​ຫຼາຍ ເພື່ອ​ປະກອບ​ສ່ວນ​ເຂົ້າ​ໃນ​ການ​ພັດທະນາວຽກ​ງານ​ດັ່ງກ່າວ​ໃຫ້​ບັນລຸ​ເປົ້າໝາຍ.

ສຳລັບ​ງານ​ຄັ້ງ​ນີ້ ​ຈະ​ດຳເນີນໄປ​ເປັນ​ເວລາ 2 ວັນ (17-18 ພຶດສະພາ​ນີ້) ໂດຍ​ມີ​ບໍລິສັດ ຫ້າງຮ້ານ ຫຼາຍ​ກວ່າ 22 ບູດ​ເຂົ້າ ຮ່ວມ​ວາງສະແດງ ແລະ ໃຫ້ການສະໜັບສະໜູນ ເປັນຕົ້ນ ທະ​ນາຄານ​ການ​ຄ້າ​ຕ່າງປະເທດ​ລາວມະຫາຊົນ ທະນາຄານ Sacombank ລັດ​ວິ​ສາ​ຫະ​ກິດລາວ​ໂທລະ​ຄົມ ບໍລິສັດ​ເບຍ​ລາວ ໂຮງງານ​ເພັດ​ປະກາຍ​ຕັດຫຍິບ ແລະ ອື່ນໆ.

ຂ່າວທີ່ກ່ຽວຂ້ອງ