ຂ່າວຫຼ້າສຸດ

ສະພາຮັບຮອງຫຼາຍບັນຫາສຳຄັນ ເພື່ອການພັດທະນາປະເທດທີ່ສອດຄ່ອງ

168 19 ພ.ພ. 2017 ຂ່າວໜ້າ​ໜຶ່ງ
ສະພາຮັບຮອງຫຼາຍບັນຫາສຳຄັນ ເພື່ອການພັດທະນາປະເທດທີ່ສອດຄ່ອງ

ກອງ​ປະຊຸມ​ສະໄໝ​ສາມັນເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VIII ອັດ​ລົງ​ດ້ວຍ​ຜົນສຳເລັດຢ່າງ​ຈົບງາມ ຈາກ​ການ​ກ່າວ​ສູນທອນ​ພົດ​ຂອງ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດລາວ ໃນ​ວັນ​ທີ 18 ພຶດສະພາ 2017 ພາຍຫຼັງ​ດຳເນີນ​ແຕ່​ວັນ​ທີ 25 ເມສາ ເປັນຕົ້ນ​ມາ ໃຫ້​ກຽດເຂົ້າ​ຮ່ວມ​ພິ​ທິ​ປິດ​ກອງ​ປະຊຸມ​ທີ່​ມີຄວາມ​ສຳຄັນຄັ້ງ​ນີ້ ມີ​ທ່ານ ບຸນຍັງ ວໍລະ​ຈິດ ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກປະຊາຊົນ​ປະຕິວັດ​ລາວ ປະທານປະເທດ ທ່ານ ທອງ​ລຸນ ສີ​ສຸ​ລິດ ກຳມະການ​ກົມ​ການເມືອງ​ສູນກາງ​ພັກ ນາຍົກລັດຖະມົນຕີ ພ້ອມ​ດ້ວຍ​ບັນດາ​ກຳມະການກົມ​ການເມືອງ ອະດີດ​ການ​ນຳຂັ້ນ​ສູງ ຜູ້​ຊົງ​ຄຸນ​ວຸດ​ທິ ສະມາຊິກສະພາ​ປະຈຳ​ເຂດ​ເລືອກ​ຕັ້ງ​ຕ່າງໆ ແລະ ແຂກ​ຖືກ​ເຊີນ.

ທ່ານ​ປະທານ​ສະພາ​ແຫ່ງ​ຊາດ ກ່າວ​ບາງ​ຕອນ​ສຳ​ຄັນວ່າ: ກອງປະຊຸມ​ສະໄໝ​ສາມັນເທື່ອ​ທີ 3 ຂອງ​ສະພາແຫ່ງ​ຊາດ ຊຸດ​ທີ VIII ໄດ້​ຮັບ​ຟັງ​ການ​ລາຍ​ງານພິ​ຈາລະ​ນາ ແລະ ຮັບຮອງ​ເອົາ 5 ບັນຫາ​ໃຫຍ່​ຄື: ວຽກ​ງານ​ຂອງ​ລັດຖະ​ບານ ໄດ້​ຮັບ​ຟັງ​ການ​ລາຍ​ງານກ່ຽວ​ກັບ​ການຈັດຕັ້ງ​ປະຕິບັດ​ວຽກງານ​ຈຸດ​ສຸມ ໄລຍະ 6 ເດືອນ​ຜ່ານມາ ແລະ ແຜນການ​ທິດ​ທາງ 6 ເດືອນ​ຕໍ່ໜ້າ ຮັບ​ຟັງ​ການ​ລາຍງານ​ການຈັດຕັ້ງ​ປະຕິບັດ​ແຜນພັດທະນາ​ເສດຖະກິດ-ສັງຄົມ ປີ 2016 ແລະ ແຜນ​ວຽກ​ຈຸດ​ສຸມ 2017 ຮັບ​ຟັງລາຍ​ງານ​ຜົນ​ການຈັດ​ຕັ້ງ​ປະຕິບັດ​ແຜນ​ງົບປະມານແຫ່ງ​ລັດ 3 ເດືອນຂ້າມ​ຜ່ານ ທ້າຍ​ປີ 2016 ສະພາບ​ການ​ຈັດຕັ້ງ​ປະຕິບັດ​ແຜນ​ງົບປະມານແຫ່ງ​ລັດ ງວດ 1 ແລະ ຄາດ​ຄະເນ​ທິດ​ທາງ​ແຜນການ 9 ເດືອນ ປີ 2017 ພິຈາລະນາ ແລະ ຮັບຮອງ​ເອົາ​ບົດ​ລາຍ​ງານກ່ຽວ​ກັບການ​ຄຸ້ມ​ຄອງ​ສິນຄ້າ ແລະ ມາດຕະການ​ແກ້​ໄຂ​ຈຳນວນ​ໜຶ່ງ ເພື່ອຫຼຸດຜ່ອນ​ຜົນ​ກະທົບ​ຕໍ່​ການ​ຜະລິດ ແລະ ການ​ດຳລົງ​ຊີວິດ​ຂອງ​ປະຊາ​ຊົນ ວຽກ​ງານ​ອົງການ​ໄອ​ຍະການ​ປະຊາຊົນ​ສູງ​ສຸດ ແລະ ສານ​ປະຊາຊົນ​ສູງ​ສຸດ ໄດ້​ພິ​ຈາລະ​ນາ ແລະ ຮັບຮອງ​ເອົາ​ບົດລາຍ​ງານ​ຂອງ​ອົງການ​ໄອ​ຍະການ​ປະຊາຊົນ ກ່ຽວ​ກັບ​ການ​ປະຕິ​ບັດ​ສິດ​ສັ່ງ​ຟອງ​ຄະດີ​ອາຍາ​ຂຶ້ນສານ ແລະ ການ​ເຂົ້າ​ຮ່ວມ​ດຳເນີນ​ຄະດີ​ແພ່ງ​ຢູ່​ທີ່​ປະຊຸມ​ສານໃນ​ໄລຍະ​ຜ່ານ​ມາ ແລະ ບັນດາທິດ​ທາງ​ໃນ​ການ​ປັບປຸງ​ຍົກ​ສູງຄຸນະພາບ ກ່ຽວ​ກັບ​ວຽກ​ງານ​ໄອຍະ​ການ​ຕໍ່ໜ້າ ພິຈາລະນາ ແລະ ຮັບຮອງ​ເອົາ​ບົດ​ລາຍ​ງານ​ຂອງສານ​ປະຊາຊົນ ກ່ຽວ​ກັບ​ການ​ດຳເນີນ​ຄະດີ​ຢູ່​ສານ​ຂັ້ນ​ຕົ້ນ ແລະ ສານ​ຂັ້ນ​ອຸທອນໃນ​ໄລຍະ​ຜ່ານມາ ພ້ອມ​ກັບ​ທິດ​ທາງ​ໃນ​ການຍົກ​ສູງ​ຄຸນະພາບ​ຂອງ​ວຽກ​ງານສານ​ໃນ​ອະນາຄົດ ວຽກ​ງານ​ອົງການ​ກວດ​ສອບ​ແຫ່ງ​ລັດ ໄດ້​ພິຈາລະ​ນາ ແລະ ຮັບຮອງ​ເອົາ​ບົດລາຍ​ງານ​ການເຄື່ອນໄຫວ​ໄລຍະ 5 ປີ ແລະ ແຜນການ 5 ປີຕໍ່ໜ້າຂອງ​ອົງການ​ກວດ​ສອບ​ແຫ່ງ​ລັດ ພ້ອມ​ກັບ​ພິຈາລະນາ ແລະ ຮັບຮອງ​ເອົາ​ການ​ເລືອກ​ຕັ້ງ​ປະທານອົງການ​ກວດ​ສອບ​ແຫ່ງ​ລັດ ຕາມ​ການ​ສະເໜີ​ຂອງ​ປະທານ​ປະເທດ ວຽກ​ງານ​ສະພາ​ແຫ່ງ​ຊາດ ໄດ້​ຮັບ​ຟັງ​ການ​ລາຍ​ງານກ່ຽວກັບ​ການເຄື່ອນໄຫວ​ຂອງ​ຄະນະປະຈຳ​ສະພາ​ແຫ່ງ​ຊາດ ແຕ່​ກອງປະຊຸມ​ສະໄໝ​ສາມັນເທື່ອ​ທີ 2 ຫາ​ກອງ​ປະຊຸມ​ສະໄໝ​ສາມັນເທື່ອ​ທີ 3 ແລະ ທິດ​ທາງ​ແຜນການ​ແຕ່​ກອງ​ປະຊຸມ​ສະໄໝ​ສາມັນເທື່ອ​ທີ 3 ຫາ​ເທື່ອ​ທີ 4 ຂອງສະພາ​ແຫ່ງ​ຊາດ ຊຸດ​ທີ VIII ພິ​ຈາລະ​ນາ ແລະ ຮັບຮອງ​ເອົາ​ການແຕ່ງຕັ້ງ ຮອງ​ປະທານ​ຄະນະ​ກຳມາ​ທິ​ການ​ກົດໝາຍ​ຂອງ​ສະພາແຫ່ງ​ຊາດ ແທນ​ຕຳແໜ່ງ​ທີ່​ວາງລົງຕາມ​ການ​ສະເໜີ​ຂອງ​ຄະນະປະຈຳ​ສະພາ​ແຫ່ງ​ຊາດ ແລະ ວຽກ​ງານ​ພິຈາລະນາ ແລະ ຮັບຮອງ​ເອົາ​ການ​ສ້າງ​ປັບປຸງ ແລະ ທາບ​ທາມ​ກົດໝາຍ ຈຳນວນ 14 ສະບັບ ປະກອບ​ມີກົດໝາຍ​ສ້າງໃໝ່ 5 ສະບັບ​ຄື: ກົດໝາຍ​ວ່າດ້ວຍ​ການ​ປົກ​ປ້ອງ​ຂໍ້​ມູນ​ເອ​ເລັກໂຕຣ​ນິກ ກົດໝາຍ​ວ່າ​ດ້ວຍ​ສົນທິ​ສັນຍາ ແລະ ສັນຍາ​ສາກົນ ກົດໝາຍ​ວ່າ​ດ້ວຍຄື້ນ​ຄວາມ​ຖີ່​ວິທະ​ຍຸ​ສື່ສານ ກົດໝາຍ​ວ່າ​ດ້ວຍສິລະ​ປະ​ການສະແດງ ແລະ ປະມວນ​ກົດໝາຍ​ອາຍາກົດໝາຍ ປັບປຸງ​ໃໝ່ມີ 8 ສະບັບ​ຄື: ກົດໝາຍວ່າ​ດ້ວຍ​ອົງການ​ໄອ​ຍະການ​ປະຊາຊົນ ກົດໝາຍ​ວ່າ​ດ້ວຍສານ​ປະຊາຊົນ ກົດໝາຍ​ວ່າດ້ວຍ​ສະຖິຕິ ກົດໝາຍ​ວ່າ​ດ້ວຍນ້ຳ ແລະ ຊັບພະຍາກອນ​ນ້ຳ ກົດໝາຍວ່າ​ດ້ວຍ​ໄຟຟ້າ ກົດໝາຍວ່າ​ດ້ວຍ​ກຳລັງ​ປ້ອງ​ກັນ​ຄວາມ​ສະຫງົບ​ປະຊາຊົນ ກົດໝາຍ​ວ່າ​ດ້ວຍຄະນະ​ຊາວ​ໜຸ່ມປະຊາຊົນປະຕິວັດ​ລາວ ແລະ ກົດໝາຍ​ວ່າ​ດ້ວຍການ​ເລືອກ​ຕັ້ງສະມາຊິກສະພາແຫ່ງ​ຊາດ ແລະ ສະພາ​ປະຊາຊົນ​ຂັ້ນ​ແຂວງ ແລະ ກົດໝາຍທາບ​ທາມມີ 1 ສະບັບ​ຄື: ປະມວນ​ກົດໝາຍ​ແພ່ງ.

ຄຽງ​ຄູ່​ກັບ​ການ​ພິຈາລະນາ ແລະ ຮັບຮອງ​ເອົາ​ບັນຫາ​ສຳຄັນຂ້າງ​ເທິງ​ນັ້ນ ໃນ​ໄລຍະ​ການ​ດຳເນີນ​ກອງ​ປະຊຸມຕະຫຼອດ 17 ວັນ ສະພາ​ແຫ່ງ​ຊາດ​ໄດ້​ເປີດໂທລະສັບ​ສາຍ​ດ່ວນ ເພື່ອ​ໃຫ້​ອົງການຈັດ​ຕັ້ງ​ທຸກ​ພາກສ່ວນ ຕະຫຼອດຮອດ​ປະຊາຊົນ​ບັນດາເຜົ່າ ໄດ້ສົ່ງ​ຄວາມ​ຄິດ​ເຫັນ​ເຂົ້າ​ມາ ເຊິ່ງມີ​ການສະແດງ​ຄວາມ​ຄິດ​ເຫັນຜ່ານ​ໂທລະສັບ​ສາຍ​ດ່ວນທັງ​ໝົດ 1.177 ສາຍ ໂດຍ​ພົວພັນ​ເຖິງການ​ຄຸ້ມ​ຄອງ​ບໍລິຫານ​ລັດ ການຄຸ້ມ​ຄອງ​ເສດຖະກິດ-ສັງຄົມ ໃນນັ້ນ ບັນຫາ​ພົ້ນ​ເດັ່ນ​ຜ່ານ​ໂທລະສັບ​ສາຍ​ດ່ວນ​ແມ່ນບັນຫາ​ທີ່​ພົວພັນ​ເຖິງ​ທີ່​ດິນ ເສັ້ນທາງຄົມ​ມະນາ​ຄົມທີ່​ແກ່ຍາວ ແລະ ບັນຫາການ​ຂາຍເຄື່ອງ​ຊະຊາຍ ບໍ່​ເປັນລະບຽບ ​ກີດຂວາງ​ການ​ສັນຈອນຕາມ​ເສັ້ນທາງ ເປັນຕົ້ນ ໂດຍ​ຕໍ່ກັບ​ບັນຫາ​ທີ່​ສົ່ງ​ມາ​ດັ່ງກ່າວ ສະພາ​ແຫ່ງ​ຊາດ​ ໄດ້​ສັງ​ລວມ​ໃຫ້ກຳມາ​ທິ​ການ​ທີ່​ກ່ຽວຂ້ອງຂອງສະພາ​ແຫ່ງ​ຊາດ ສືບຕໍ່​ປະສານສົມທົບ​ກັບ​ພາກສ່ວນ​ກ່ຽວຂ້ອງ ເພື່ອ​ພ້ອມ​ກັນ​ແກ້​ໄຂ​ໃຫ້​ຖືກຕ້ອງສອດຄ່ອງ​ຕາມ​ກົດໝາຍ ແລະ ລະບຽບ​ການ​ຕໍ່​ໄປ.

ຂ່າວທີ່ກ່ຽວຂ້ອງ