ຍີ່­ປຸ່ນ ລົງ­ທຶນ​ກໍ່­ສ້າງ​ຟາມ​ໄຟ­ຟ້າ​ແຮງ​ລົມ ໃນ​ອາ​ເມ​ຣິ​ກາ​ລາ​ຕິນ

114 22 ພ.ພ. 2017 ຂ່າວຕ່າງປະເທດ
ຍີ່­ປຸ່ນ ລົງ­ທຶນ​ກໍ່­ສ້າງ​ຟາມ​ໄຟ­ຟ້າ​ແຮງ​ລົມ ໃນ​ອາ​ເມ​ຣິ​ກາ​ລາ​ຕິນ

ອຳ­ນາດ​ການ​ປົກ­ຄອງ​ລັດ ວາຊາ​ກາ (ພາກ​ຕາ­ເວັນ​ອອກ​ສຽງໃຕ້​ປະ­ເທດ​ເມັກ​ຊິກ) ແຈ້ງ​ໃຫ້​ຮູ້ວ່າ ກຸ່ມ​ບໍ­ລິ­ສັດ ມິດ​ຊູ​ບິ​ຊິ (Mitsubishi) ຂອງ​ຍີ່­ປຸ່ນ ໄດ້​ໃຫ້ສັນ­ຍາ​ທີ່​ຈະ​ລົງ­ທຶນ 1,2 ຕື້​ໂດ​ລາສະ­ຫະ­ລັດ ໃຫ້​ແກ່​ໂຄງ­ການ “ໄຟຟ້າ​ແຮງ​ລົມ​ທິດ­ໃຕ້” ຊຶ່ງ​ເປັນ​ການກໍ່­ສ້າງ​ຂຶ້ນ​ຢູ່​ໃນ​ບັນ­ດາ​ນະ­ຄອນ​ຄື  ຈູ​ຊີ​ຕັນ ເດີ ຊາ​ຣາ​ໂກ​ຊາ ແອ​ລ ເອ​ສ​ປີ​ນາ​ລ ແລະ ​ອິ​ສ​ໂມ ເດີ ເຕຮວານ​ເຕ​ເປັກ.

ທ່ານ ອາ​ເລ​ຈານ​ໂດຣ ມູ​ຣາດ ຜູ້​ວ່າ­ການ​ລັດ ວາ​ຊາ​ກາ ເວົ້າ​ວ່າ ຈາກ​ການ​ໃຊ້​ຕວກ​ບິນ​ລົມ 132 ໜ່ວຍ ທີ່​ນຳ​ໃຊ້​ເຕັກ​ໂນ​ໂລ​ຊີ​ກ້າວໜ້າ­ທີ່​ສຸດ ແລະ ມີ​ກຳ­ລັງ​ການ​ຜະລິດ​ໃນ​ການ​ອອກ​ແບບ​ບັນ­ລຸ 396 MW (Megawatt) ນັ້ນ ໂຄງການ “ໄຟ­ຟ້າ​ແຮງ​ລົມ​ທິດ­ໃຕ້” ນັບ​ວ່າ​ເປັນ​ຟາມ​ໄຟ­ຟ້າ​ແຮງ​ລົມ​ທີ່​ມີ​ການ​ລົງ­ທຶນ ແລະ ມີ​ຂະ­ໜາດໃຫຍ່​ສຸດ ຢູ່​ໃນ​ພາກ​ພື້ນ​ອາ​ເມ​ຣິກາລາ​ຕິນ.

ລັດ­ຖະ­ບານ​ເມັກ​ຊິກ ພວມວາງ​ແຜນ​ກໍ່­ສ້າງ​ຟາມ​ໄຟ­ຟ້າ​ທີ່​ສະອາດ 52 ແຫ່ງ ກ່ອນ​ປີ 2019 ດ້ວຍ​ການ​ໃຊ້​ຈ່າຍ​ໃນ​ການລົງ­ທຶນ 6,6 ຕື້​ໂດ​ລາ​ສະ­ຫະ­ລັດ ປັດ­ຈຸ­ບັນນີ້ ໄດ້​ມີ 34 ບໍ­ລິ­ສັດ ຈົດ​ທະ­ບຽນລົງ­ທຶນ​ແລ້ວ ເພື່ອ​ເປີດ​ກວ້າງ​ບັນດາ​ພື້ນ­ຖານໂຄງ​ລ່າງ​ໃນ​ການ​ນຳໃຊ້​ໄຟ­ຟ້າ​ແຮງ​ລົມ ແລະ ໄຟ­ຟ້າແສງ​ຕາ­ເວັນ​ຢູ່​ໃນ​ປະ­ເທດ​ນີ້ ​ພາຍໃນ 3 ປີ​ຕໍ່­ໜ້າ.

ເມັກ​ຊິກ ໄດ້​ຮັບ​ການ​ຕີ​ລາ­ຄາວ່າ ​ເປັນ​ປະ­ເທດ​ເດີນ​ໜ້າໃນ​ພາກພື້ນ​ອາ​ເມ​ຣິ​ກາລາ​ຕິນ ໃນ​ຂົງເຂດ​ການ​ຂຸດ​ຄົ້ນ​ແຫຼ່ງ​ພະ­ລັງ­ງານໜູນ​ວຽນ ພະ­ລັງ­ງານ​ແຮງ​ລົມ ເປັນ​ແຫຼ່ງ​ພະ­ລັງ­ງານ​ໜຶ່ງ​ທີ່​ສະອາດ ໂດຍ​ທີ່​ກຳ­ລັງ​ການ​ຜະ­ລິດໃນ​ການ​ຕິດ​ຕັ້ງ​ເພີ່ມຂຶ້ນ​ແຮງ​ສຸດໃນ​ເມັກ​ຊິກ ໃນ​ນັ້ນ ສະ­ເພາະ​ແຕ່ປີ 2015 ກໍ່​ໄດ້​ບັນ­ລຸ​ລະ­ດັບ​ຄວາມເຕີບ​ໂຕ​ເກີນ 100% ພາຍ​ໃນ 15 ປີ​ຕໍ່­ໜ້າ ເມັກ​ຊິກ ຈະ​ຕິດ​ຕັ້ງ​ລະບົບ​ໄຟ­ຟ້າ​ແຮງ​ລົມ​ເພີ່ມ​ເຕີມ ດ້ວຍ​ກຳ­ລັງ​ການ​ຜະ­ລິດ​ຫຼາຍກວ່າ 12.000 MW.

ນັບ​ແຕ່​ປີ 2014 ເປັນ­ຕົ້ນ​ມາ ເມັກ​ຊິກ​ໄດ້​ກໍ່­ສ້າງ​ໂຮງ­ງານ​ໄຟ­ຟ້າແຮງ​ລົມ​ຈຳ­ນວນ​ໜຶ່ງ ດ້ວຍ​ກຳລັງ​ການ​ຜະ­ລິດ 2.100 MW ແລະ ຫວັງ​ວ່າ​ໃນ​ປີ 2017 ຈະ​ມີພື້ນ­ຖານ​ອີກ​ຈຳ­ນວນ​ໜຶ່ງ​ເຂົ້າ​ສູ່ການ­ເຄື່ອນ­ໄຫວ​ດ້ວຍ​ກຳ­ລັງ​ການຜະ­ລິດ 1.100 MW ໂດຍ​ທີ່​ຍັງບໍ່​ໄດ້​ນັບ​ເຖິງ​ໂຄງ­ການ​ໄຟ­ຟ້າ​ແສງຕາ­ເວັນ​ຈຳ­ນວນ​ໜຶ່ງ ທີ່​ພວມ​ຢູ່​ລະຫວ່າງ​ໃກ້​ຈະ​ສຳ­ເລັດ ແລະ ກະກຽມເຊື່ອມ​ເຂົ້າ​ກັບ​ເຄືອ​ຂ່າຍ​ໄຟຟ້າ​ແຫ່ງ​ຊາດ.

ຂ່າວທີ່ກ່ຽວຂ້ອງ