ຍິງ-ຊາຍ ມີ​ຄວາມ​ກ້ຳ​ເກິ່ງ​ກັນ​ໃນ​ຄະ­ນະ​ລັດ­ຖະ­ບານ​ຊຸດ​ໃໝ່​ຂອງ​ຝຣັ່ງ

201 22 ພ.ພ. 2017 ຂ່າວຕ່າງປະເທດ
ຍິງ-ຊາຍ ມີ​ຄວາມ​ກ້ຳ​ເກິ່ງ​ກັນ​ໃນ​ຄະ­ນະ​ລັດ­ຖະ­ບານ​ຊຸດ​ໃໝ່​ຂອງ​ຝຣັ່ງ

ປະ­ທາ­ນາ­ທິ­ບໍ­ດີ​ຝຣັ່ງ ເອມ​ມາ ນູ​ແອ​ລ ມາກ​ຣົງ ໄດ້​ສຳ­ເລັດ​ການແຕ່ງ­ຕັ້ງ​ລັດ­ຖະ­ມົນ­ຕີ 22 ຕຳແໜ່ງ ເຂົ້າ​ໃນ​ຄະ­ນະ​ລັດ­ຖະ­ບານໄປ​ແລ້ວ​ເມື່ອ​ວັນ​ທີ 18 ພຶດ­ສະ­ພາ ທີ່​ຜ່ານ​ມາ ໃນ​ຈຳ­ນວນ​ລັດ​ຖະ​ມົນຕີ 22 ທ່ານ​ນັ້ນ ມີ 11 ທ່ານເປັນເພດ​ຍິງ ອັນ​ມີຄົນ​ເຊື້ອ­ສາຍ​ຕ່າງປະ­ເທດ 2 ຄົນ ໂດຍ​ໃນ​ນັ້ນ​ມີ 1 ຄົນ ຫາ­ກໍ່​ຖື​ສັນ­ຊາດ​ຝຣັ່ງ ເມື່ອ​ປີ 2016.

ລັດ­ຖະ­ມົນ­ຕີ​ເຫຼົ່າ­ນັ້ນມາ​ຈາກທັງ​ສາມ​ຝ່າຍ ຄື​ຝ່າຍ​ຊ້າຍ ຝ່າຍຂວາ ແລະ ຝ່າຍ​ສາຍ​ກາງ ຫາກບໍ່​ແມ່ນ​ມາ​ຈາກ​ພັກ​ຂອງທ່ານ ມາກ​ຣົງ ເປັນ​ການ​ສະ­ເພາະ ໃນດ້ານ​ອາ­ຍຸ ລັດ­ຖະ­ມົນ­ຕີ​ໃໝ່​ເຫຼົ່ານັ້ນ​ປະ­ກອບ​ດ້ວຍ​ບັນ­ດາ​ເຈົ້າ​ໜ້າທີ່ ທີ່​ມີ​ປະ­ສົບການ ແລະ ມີ​ຫຼາຍຄົນ​ພວມ​ມາ​ແຮງໃນ​ໄວ​ຍັງ​ໜຸ່ມແໜ້ນ​ ຍິ່ງ​ໄປ​ກວ່າ​ປະ­ທາ­ນາ­ທິ­ບໍ­ດີ ມາກ​ຣົງ ທີ່​ມີ​ອາ­ຍຸ 39 ປີ.

ໃນ​ນັ້ນ ນອກ­ຈາກ​ຕຳ­ແໜ່ງ​ທີ່ໄດ້​ແຕ່ງ­ຕັ້ງ​ໄປ​ແລ້ວ ​ຄື​: ທ່ານ ເອດວດ ຟີ​ລິບ (Edouard Philippe)  ດຳ­ລົງ​ຕຳ­ແໜ່ງ​ນາຍົກ​ລັດ­ຖະ­ມົນ­ຕີ ກໍ່​ຍັງ​ມີ​ຕຳ­ແໜ່ງສຳ­ຄັນ​ອື່ນໆ ເຊັ່ນ:​ ທ່ານ ຈວນ ອີເວ​ສ ເລີ ດຣຽນ (Jean-Yves Le Drian) ດຳ­ລົງ​ຕຳ­ແໜ່ງ​ລັດຖະ​ມົນ­ຕີ​ການ​ຕ່າງ­ປະ­ເທດ ທັງເປັນ​ລັດ­ຖະ­ມົນ­ຕີ​ກ່ຽວ​ກັບ​ເອີ​ຣົບ ທ່ານ ເກ​ຣາດ ໂກລ​ລອມ (Gerard Collomb) ເປັນ​ລັດ​ຖະມົນ­ຕີ​ພາຍ​ໃນ ນາງ ຊີ​ລວ​ີ ກູ​ລາດ (Sylvie Goulard) ເປັນ​ລັດ​ຖະມົນ­ຕີ​ປ້ອງ​ກັນ​ປະ­ເທດ ແລະ ອື່ນໆ.

ດັ່ງ­ນັ້ນ ບັນ­ຊີ​ລາຍ​ຊື່​ໃນ​ຄະ­ນະລັດ­ຖະ­ບານ​ຊຸດ​ໃໝ່​ຂອງ​ຝຣັ່ງ ປະກອບ​ມີ​ ລັດ­ຖະ­ມົນ­ຕີ​ເພດ​ຊາຍ 9 ທ່ານ ເພດ​ຍິງ 9 ທ່ານ ລັດ​ຖະ​ມົນຕີ​ແຫ່ງ​ລັດ​ ເພດ​ຊາຍ 2 ທ່ານ ແລະ ເພດ​ຍິງ 2 ທ່ານ ນັບ​ວ່າເປັນ​ການ​ຮັບ­ປະ­ກັນ​ຫຼັກ­ການຄວາມ​ກ້ຳ​ເກິ່ງ​ທາງເພດ​ ຕາມ​ທີ່ທ່ານ ມາກ​ຣົງ ໄດ້​ໃຫ້​ສັນ­ຍາ​ເອົາໄວ້.

ຂ່າວທີ່ກ່ຽວຂ້ອງ