ກຽມ​ທົດ​ສອບ​ນັກ­ກີ­ລາ​ຍິງ​ປືນ ເພື່ອ​ເຂົ້າ​ຮ່ວມ​ຊີ­ເກມ

498 24 ພ.ພ. 2017 ວົງຈອນກີລາ
ກຽມ​ທົດ​ສອບ​ນັກ­ກີ­ລາ​ຍິງ​ປືນ ເພື່ອ​ເຂົ້າ​ຮ່ວມ​ຊີ­ເກມ

ທ່ານ ລຳ​ພຽງ ພົມ​ມະ​ກອງ ຮອງ​ປະ­ທານ​ສະ­ຫະ­ພັນ​ກີ­ລາ​ຍິງ​ປືນ​ແຫ່ງ​ຊາດ​ລາວ ໃຫ້​ສຳ­ພາດ​ຕໍ່​ສື່​ມວນ​ຊົນ ເມື່ອ​ບໍ່​ດົນ​ມາ​ນີ້​ວ່າ: ພາຍ­ຫຼັງ​ທີ່​ໄດ້​ມີ​ການ​ຈັດ­ການ​ແຂ່ງ­ຂັນ​ທົດ​ສອບ​ນັກ­ກີ­ລາ​ຍິງ​ປືນ​ລະ­ດັບ​ປະ­ເທດ ເມື່ອ​ບໍ່​ດົນ​ມາ​ນີ້ ເພື່ອ​ເປັນ​ການ​ຄັດເລືອກ​ນັກ­ກີ­ລາ​ດີ­ເດັ່ນ ​ກຽມ​ສົ່ງ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 19-31 ສິງ­ຫາ 2017 ໄດ້​ມີ​ນັກ­ກີ­ລາ​ຈາກ​ທົ່ວ​ປະ­ເທດ​ເຂົ້າ​ຮ່ວມ​ຢ່າງ​ຫຼວງ­ຫຼາຍ ແລະ ສາ­ມາດ​ຄັດເລືອກ​ໄດ້​ໃນ​ເບື້ອງ​ຕົ້ນ 15 ຄົນ ຈາກ​ກະ­ຊວງ​ປ້ອງ​ກັນ​ປະ­ເທດ ແລະ ນະ­ຄອນ­ຫຼວງ​ວຽງ​ຈັນ ພ້ອມ​ທັງ​ຮຽກ​ຕົວ​ເຂົ້າ​ສູນເຝິກ­ຊ້ອມ​ຢ່າງ​ເປັນ​ປົກ­ກະ­ຕິ ຈົນ​ມາ​ຮອດ​ປັດ­ຈຸ­ບັນ​ຈຶ່ງ​ຈັດ­ການ​ແຂ່ງ­ຂັນ​ຄັດ​ເລືອກ​ອີກ​ຄັ້ງ ເຊິ່ງ​ເປັນ​ຄັ້ງ​ສຸດ​ທ້າຍ ເພື່ອ​ໃຫ້​ໄດ້​ຕາມ​ເປົ້າ​ໝາຍ​ທີ່­ແທ້​ຈິງ ຈຳ­ນວນ 4 ຄົນ ຍິງ 2 ຄົນ ກ່ອນ​ສົ່ງ​ເຂົ້າ​ຮ່ວມ​ແຂ່ງ­ຂັນ​ງານ​ດັ່ງ­ກ່າວ ການ​ແຂ່ງ­ຂັນ​ຈະ​ຈັດ​ຂຶ້ນວັນ​ທີ 23-24 ພຶດ­ສະ­ພາ 2017 ທີ່​ສະ­ໜາມ​ຍິງ​ປືນ 5 ເມ­ສາ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ໂດຍ​ຜູ້​ທີ່​ສາ­ມາດ​ຍິງ​ສະ​ສົມ​ຄະ­ແນນ​ໄດ້​ດີ​ທີ່​ສຸດ​ໃນ​ຈຳ­ນວນ 4 ຄົນ ສະ­ຫະ­ພັນ​ຍິງ​ປືນ​ແຫ່ງ​ຊາດ​ລາວ ຈະ​ມີ​ລາງ​ພິ­ເສດ​ໃຫ້ ພ້ອມ​ທັງ​ເອົາ​ເຂົ້າສູນ​ທີ່​ສະ­ໜາມ​ກີ­ລາ​ຍິງ​ປືນ 5 ເມ­ສາ ແລະ ເນັ້ນ​ໜັກ​ໃຫ້​ຊ້ອມ​ໝົດ​ມື້​ເປັນ​ປະ­ຈຳ​ໃນ​ທຸກ​ວັນ​ຂອງ​ແຕ່​ລະ​ອາ­ທິດ.

ສຳ­ລັບ​ການ​ແຂ່ງ­ຂັນ​ທົດ​ສອບ​ຄວາມ​ສາ­ມາດ​ນັກ­ກີ­ລາ 15 ຄົນ ຄັ້ງ​ສຸດ​ທ້າຍ​ຄັ້ງ​ນີ້ ເພື່ອ​ຄົ້ນ​ຫາ​ນັກ­ກີ­ລາ​ດີ­ເດັ່ນ​ໃຫ້​ໄດ້​ຕາມເປົ້າ​ໝາຍ ເຊິ່ງ​ຈະ​ຈັດ​ແຂ່ງ­ຂັນ​ຍິງ​ປືນ​ເຖິງ 7 ລາຍ­ການ ປະ­ກອບ​ມີ ​ລາຍ­ການ​ປືນ​ສັ້ນ 25 ແມັດ​ຊາຍ 2 ຄົນ ປືນ​ສັ້ນ 25 ແມັດ​ຍິງ 2 ຄົນ ປືນ​ອັດ​ລົມ​ຍິງ 2 ຄົນ ປືນ​ອັດ​ລົມ​ຊາຍ 2 ຄົນ ປືນ​ຍາວ 3 ທ່າ​ຊາຍ 2 ຄົນ ປືນ​ຍາວ​ທ່າ​ນອນ​ຊາຍ 2 ຄົນ ແລະ ປືນ​ຍາວ​ທ່າ​ນອນ​ຍິງ 3 ຄົນ ທັງ​ໝົດ​ນີ້​ຄະ­ນະ​ກຳ­ມະ­ການ​ຂອງ​ສະ­ຫະ­ພັນ​ຍິງ​ປືນ​ແຫ່ງ​ຊາດ ຈະ​ເປັນ​ຜູ້​ປະ​ເມີນ​ຄະ­ແນນ​ ກຳ­ນົດ​ນັກ­ກີ­ລາ​ທີ່​ມີ​ຄະ­ແນນ​ສູງ​ທີ່​ສຸດ ຈຳ­ນວນ 4 ຄົນ ຈະ​ໄດ້​ເປັນ​ຜູ້­ຕາງ­ໜ້າ​ນັກ­ກີ­ລາ​ຍິງ​ປືນ​ ສປປ ​ລາວ ເຂົ້າ​ຮ່ວມ​ຍາດ​ເອົາ​ຫຼຽນ​ຄຳ​ໃນ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ​.

ຂ່າວທີ່ກ່ຽວຂ້ອງ