ກໍ່­ສ້າງ​ທໍ່​ສົ່ງ​ນ້ຳ­ມັນ ມູນ​ຄ່າ​ກວ່າ 3,5 ຕື້​ໂດ​ລາ ຢູ່​ໃນ​ເຂດ​ອາ​ຟຣິ​ກາ​ຕາ­ເວັນ​ອອກ

176 24 ພ.ພ. 2017 ຂ່າວຕ່າງປະເທດ
ກໍ່­ສ້າງ​ທໍ່​ສົ່ງ​ນ້ຳ­ມັນ ມູນ​ຄ່າ​ກວ່າ 3,5 ຕື້​ໂດ​ລາ ຢູ່​ໃນ​ເຂດ​ອາ​ຟຣິ​ກາ​ຕາ­ເວັນ​ອອກ

ປະ­ທາ­ນາ­ທິ­ບໍ­ດີ​ຕັງ​ຊາ​ນີ ຈອນ ມາ​ກູ​ຟູ​ລີ ແລະ ປະ­ທາ­ນາ­ທິ­ບໍ­ດີອູກັນ​ດາ ໂຢ​ເວ​ຣີ ມູ​ເຊ​ເວ​ນີ ໄດ້​ລົງນາມ​ຮ່ວມ​ກັນ​ໃນ​ຂໍ້ຕົກ­ລົງ​ສະ­ບັບໜຶ່ງ ເມື່ອ​ວັນ​ທີ 21 ພຶດ­ສະ­ພາ​ທີ່ຜ່ານ​ມາ ວ່າ​ດ້ວຍ​ການເລີ່ມ​ລົງ­ມືກໍ່­ສ້າງ​ທໍ່​ສົ່ງ​ນ້ຳ­ມັນ​ດິບ​ຈາກ​ໂຮ​ອີມາ ໄປຍັງ​ທ່າ​ກຳ­ປັ່ນ​ຕັງ​ກາ.

ແຈ້ງ​ການ​ຈາກ​ຫ້ອງ​ວ່າ­ການປະ­ທາ­ນາ­ທິ­ບໍ­ດີ​ຕັງ​ຊາ​ນີ ໃຫ້​ຮູ້​ວ່າ ຜູ້­ນຳ​ທັງ​ສອງ​ໄດ້​ລົງ​ນາມ​ຂໍ້​ຕົກ­ລົງກ່ຽວ​ກັບ​ການ​ຜັນ​ຂະ­ຫຍາຍ​ການກໍ່­ສ້າງ​ໂຄງ­ການ​ທໍ່​ສົ່ງ​ນ້ຳ­ມັນ​ອາຟຣິກ​ກາ​ຕາ­ເວັນ​ອອກ (EACOP) ຈາກ ໂຮ​ອີ​ມາ (ອູ​ກັນ​ດາ) ໄປ​ຍັງທ່າ​ກຳ­ປັ່ນຕັງ​ກາ (ຕັງ​ຊາ​ນີ) ໂດຍ​ທີ່​ບັນ­ຫາ​ຕ່າງໆ​ທີ່​ພົວ­ພັນ​ເຖິງໂຄງ­ການ​ດັ່ງ­ກ່າວ ໄດ້​ຮັບ​ການແກ້​ໄຂ​ເປັນ​ທີ່​ຮຽບ​ຮ້ອຍ​ແລ້ວ.

ສອງ​ປະ­ເທດ​ດັ່ງ­ກ່າວ​ໄດ້​ດຳເນີນ​ການ​ເຈລະ­ຈາ​ເພື່ອ​ຜັນ​ຂະຫຍາຍ​ໂຄງ­ການ EACOP ຫຼັງຈາກ​ທີ່​ເມື່ອ​ເດືອນ​ເມ­ສາ​ທີ່ຜ່ານມາ ບັນ­ດາ​ປະ­ເທດ​ໃນ​ເຂດ​ອາຟຣິກ​ກາ​ຕາ­ເວັນ​ອອກ ໄດ້​ນຳ​ເອົາຂໍ້​ຕົກ­ລົງ​ກ່ຽວ​ກັບ​ການ​ກໍ່­ສ້າງ​ທໍ່ສົ່ງ​ນ້ຳ­ມັນ​ຜ່ານ​ຕັງຊາ​ນີ ແທນ​ທີ່ໃຫ້​ແກ່​ການ​ຜ່ານ​ເຄນ​ຢາ ຕາມແຜນ­ການ​ທີ່​ວາງ​ອອກ​ມາ​ກ່ອນໜ້າ​ນັ້ນ ໃນ​ຂະ­ນະ​ດຽວ​ກັນ ປະທາ​ນາ​ທິ​ບໍ­ດີຂອງ​ຕັງ​ຊາ​ນີ ແລະ ອູ​ກັນ​ດາ ກໍ່​ໄດ້​ສະ­ເໜີ​ແນະ​ໃຫ້​ລັດຖະ​ມົນ­ຕີ​ພະ­ລັງ­ງານ​ຂອງ​ສອງ​ປະເທດ​ນີ້ ລົງ​ນາມ​ຂໍ້​ຕົກ­ລົງ​ລະຫວ່າງ​ລັດ­ຖະ­ບານ (IGA) ພາຍໃນ​ວັນ​ທີ 27 ພຶດ­ສະ­ພາ​ນີ້ ໂດຍຈະ​ມີ​ຂຶ້ນ​ທີ່​ປະ­ເທດອູ​ກັນ​ດາ.

ທໍ່​ສົ່ງ​ນ້ຳ­ມັນ​ສາຍ​ດັ່ງ­ກ່າວມີຄວາມ​ຍາວ 1.443 ກມ ມີ​ຍອດມູນ​ຄ່າ​ການ​ກໍ່­ສ້າງ 3,55 ຕື້​ໂດ​ລາ​ສະ­ຫະ­ລັດ ສາ­ມາດ​ສົ່ງ​ນ້ຳ­ມັນ ໄດ້ 200.000 ລິດ/ວັນ ແລະ ສາມາດ​ສ້າງ​ວຽກ​ເຮັດ​ງານ​ທຳ​ຂຶ້ນມາ​ໄດ້ 6.000 ຫາ 10.000 ຕຳແໜ່ງ​ງານ.

ຂ່າວທີ່ກ່ຽວຂ້ອງ