ຕວກ​ກີ ເລີ່ມ​ການ​ພິ­ຈາ­ລະ­ນາ​ຄະ­ດີ​ແກນ​ນຳ​ທີ່​ກໍ່​ລັດ­ຖະ­ປະ­ຫານ

192 24 ພ.ພ. 2017 ຂ່າວຕ່າງປະເທດ
ຕວກ​ກີ ເລີ່ມ​ການ​ພິ­ຈາ­ລະ­ນາ​ຄະ­ດີ​ແກນ​ນຳ​ທີ່​ກໍ່​ລັດ­ຖະ­ປະ­ຫານ

ວັນ​ທີ 22 ພຶດ­ສະ­ພາ​ນີ້ ຕວກ​ກີ ໄດ້​ເປີດ​ການ​ພິ­ຈາ­ລະ­ນາ​ຄະ­ດີກັບຜູ້​ຕ້ອງ​ສົງ​ໃສ 220 ກວ່າ​ຄົນ ໃນນັ້ນ ມີ​ລະ­ດັບ​ນາຍ​ພົນລວມ​ຢູ່​ນຳ 26 ຄົນ ຊຶ່ງ​ຖືກ​ກ່າວ​ຫາ​ວ່າ​ເປັນແກນ​ນຳ​ໃນ​ການ​ກໍ່​ລັດ​ຖະ​ປະຫານ​ຕ້ານ​ກັບ​ປະ­ທາ­ນາ­ທິ­ບໍ­ດີ ຣີເຊບ ເທ​ຢິບ ເອ​ໂດ​ການ ເມື່ອ​ຄ່ຳຄືນ​ວັນ​ທີ 15 ກໍ­ລະ­ກົດ ປີ 2016.

ການ​ດຳ­ເນີນ​ຄະ­ດີ​ນັ້ນມີ​ຂຶ້ນ​ທີ່ຄຸກ​ແຫ່ງ​ໜຶ່ງ ​ທີ່​ເມືອງ​ຊິນ​ການ ເຂດ​ຊານ­ເມືອງ​ນະ­ຄອນ­ຫຼວງ​ອັງກາ​ຣາ ໂດຍ​ທີ່​ການ​ຮັກ­ສາຄວາມສະ­ຫງົບ ໄດ້​ຮັບ​ການ​ຄຸມ​ເຂັ້ມ​ຢູ່ໃນ​ບໍ­ລິ­ເວນ​ຄຸກ​ດັ່ງ­ກ່າວ.

ໃນ​ຈຳ­ນວນ​ຜູ້​ຕ້ອງ​ສົງ​ໃສ​ດັ່ງກ່າວ ມີ​ອະ­ດີດ​ຜູ້​ບັນ­ຊາ​ການ​ທະຫານ​ອາ­ກາດ​ຕວກ​ກີ ອາ​ຄິນ ອົສຕັກ ໃນ​ຂະ­ນະ​ດຽວ​ກັນ ນັກສອນສາ­ສະ­ໜາ ​ເຟ​ທູ​ລາ ກູ​ເລນ ຜູ້​ທີ່ພວມ​ດຳ­ລົງ​ຊີ­ວິດ​ພັດ​ຖິ່ນ​ຢູ່​ໃນ ສ ອາ​ເມ​ຣິ​ກາ ທີ່​ຖືກ​ທາງ​ການ​ຕວກກີ ກ່າວ​ຫາ​ວ່າ​ຢູ່ເບື້ອງ​ຫຼັງ​ການ​ກໍ່ລັດ­ຖະ­ປະ­ຫານ​ທີ່​ບໍ່​ປະ­ສົບຄວາມສຳ­ເລັດ​ນັ້ນ ​ກໍ່​ມີ​ຊື່​ຢູ່​ໃນ​ບັນ­ຊີ​ຜູ້​ຕ້ອງສົງ​ໃສ​ເຊັ່ນ​ກັນ.

ໜັງ­ສື­ພິມ Hurriyet ໃຫ້​ຮູ້​ວ່າ ບັນ­ດາ​ຜູ້​ຕ້ອງ​ສົງ​ໃສ​ດັ່ງ­ກ່າວ ຖືກກ່າວ​ຫາ​ໃນ​ຫຼາຍ​ຂໍ້​ຫາ​ດ້ວຍ​ກັນ ໃນ​ນັ້ນມີ​ການ “ນຳ​ໃຊ້​ຄວາມ​ຮຸນແຮງ​ເພື່ອ​ກົນ­ອຸ­ບາຍ​ໂຄ່ນ​ລົ້ມ” ສະພາ​ແຫ່ງ​ຊາດ ແລະ ລັດ­ຖະ­ບານຕວກ​ກີ “ເຂັ່ນ­ຂ້າ​ປະ­ຊາ­ຊົນ 250 ຄົນ” ແລະ ມີ “ກົນ­ອຸ­ບາຍ​ເຂັ່ນ­ຂ້າປະ­ຊາ­ຊົນ 2.735 ຄົນ”.

ຫ້ອງ​ວ່າ­ການ​ປະ­ທາ­ນາ­ທິ­ບໍ­ດີ ຕວກ​ກີ ໃຫ້​ຮູ້​ວ່າ ກົນ­ອຸ­ບາຍ​ກໍ່​ລັດຖະ​ປະ­ຫານ​ດັ່ງ­ກ່າວ ໄດ້​ເຮັດ​ໃຫ້ມີ​ຜູ້​ເສຍ​ຊີ­ວິດ 248 ຄົນ ໂດຍ​ທີ່ຍັງ​ບໍ່​ທັນ​ໄດ້​ນັບ​ຜູ້​ທີ່​ເຂົ້າ​ຮ່ວມ​ການກໍ່​ລັດ­ຖະ­ປະ­ຫານ​ອີກ 24 ຄົນ​ທີ່​ຖືກສັງ­ຫານ ​ໃນ​ຕອນ​ຄ່ຳ​ຂອງ​ວັນ​ທີ 15 ກໍ­ລະ­ກົດ 2016.

ກ່ອນ​ໜ້າ​ນັ້ນ ເມື່ອ​ເດືອນ​ກຸມພາ​ທີ່​ຜ່ານ​ມາ ຢູ່​ໃນ​ຄຸກ​ດັ່ງ­ກ່າວເຊັ່ນ​ກັນ ຕວກ​ກີ ກໍ່​ໄດ້​ເປີດ​ການດຳ­ເນີນ​ຄະ­ດີ​ກັບ​ຜູ້​ຕ້ອງ​ສົງໃສ 330 ຄົນ ທີ່​ຖືກ​ກ່າວ​ຫາ​ວ່າ ​ຂ້າຄົນ ຫຼື ມີ​ກົນ­ອຸ­ບາຍ​ຂ້າ​ຄົນ​ຢູ່​ໃນການ​ກໍ່​ລັດ­ຖະ­ປະ­ຫານ​ທີ່​ຫຼົ້ມ​ເຫຼວດັ່ງ­ກ່າວ.

ມາ​ຮອດ​ເວ­ລາ​ນີ້ ໄດ້​ມີ​ຜູ້​ຖືກ​ຈັບກຸມ​ແລ້ວ 47.000 ກວ່າ​ຄົນ ຍ້ອນ​ສົງ​ໃສ​ວ່າ​ມີ​ການ​ພົວ­ພັນ​ກັບເຄືອ​ຂ່າຍ​ຂອງ​ນັກ​ສອນ​ສາ​ສະໜາ ເຟ​ທູ​ລາ ກູ​ເລນ.

ຂ່າວທີ່ກ່ຽວຂ້ອງ