ຈີນ-ຣັດ​ເຊຍ ສ້າງ­ຕັ້ງ​ວິ​ສາ​ຫະ​ກິດ​ຮ່ວມ​ທຸ­ລະ​ກິດເພື່ອ​ຜະ­ລິດ​ເຮືອ­ບິນ

223 24 ພ.ພ. 2017 ຂ່າວຕ່າງປະເທດ
ຈີນ-ຣັດ​ເຊຍ ສ້າງ­ຕັ້ງ​ວິ​ສາ​ຫະ​ກິດ​ຮ່ວມ​ທຸ­ລະ​ກິດເພື່ອ​ຜະ­ລິດ​ເຮືອ­ບິນ

ວັນ​ທີ 22 ພຶດ­ສະ­ພາ​ນີ້ ຈີນ ແລະ ຣັດ​ເຊຍ ໄດ້​ເລີ່ມ​ເຄື່ອນ​ໄຫວໂຄງ­ການ​ທີ່​ເຕັມ​ໄປ​ດ້ວຍ​ຄວາມຫວັງ​ໃນ​ການ​ຮ່ວມ​ກັນ​ພັດ­ທະ­ນາເຮືອ­ບິນ​ປະ­ເພດ​ໜຶ່ງ​ທີ່​ບິນ​ໄດ້​ໄລຍະ​ໄກ ເພື່ອ​ແກ້ງ​ແຍ່ງ​ກັບ​ສອງກຸ່ມ​ບໍ­ລິ­ສັດ​ຜູ້​ຜະ­ລິດ​ເຮືອ­ບິນ​ລາຍໃຫຍ່ ຄື ໂບ​ອິງ (Boeing) ແລະ ແອ​ຣບັສ (Airbus) ການ​ເຄື່ອນໄຫວ​ດັ່ງ­ກ່າວມີ​ຂຶ້ນ​ພຽງ 2 ອາທິດ ຫຼັງ​ຈາກ​ທີ່​ຈີນ ດຳ­ເນີນ​ການບິນ​ທົດລອງ​ສຳ­ເລັດ​ຜົນກັບ​ເຮືອບິນ​ໂດຍ­ສານ​ຂະ­ໜາດ​ໃຫຍ່​ເປັນເທື່ອ​ທຳ​ອິດ ຊຶ່ງ​ແມ່ນ​ປະ­ເທດ​ນີ້ຜະ­ລິດ​ຂຶ້ນ​ມາ​ເອງ.

ກຸ່ມ​ບໍ­ລິ­ສັດ​ຜະ­ລິດ​ເຮືອ­ບິນ​ການຄ້າ​ຈີນ (COMAC) ແລະ ກຸ່ມ​ບໍລິ​ສັດ​ຜະ­ລິດ​ເຮືອ­ບິນ​ເອ­ກະ​ພາບ (UAC) ຂອງ​ຣັດ​ເຊຍ ແຈ້ງ​ໃຫ້​ຮູ້ວ່າ ພວກ​ຕົນ​ໄດ້​ສ້າງ­ຕັ້ງ​ວິ​ສາ​ຫະກິດ​ຮ່ວມ​ທຸ­ລະ​ກິດ​ຂຶ້ນ​ມາ​​ທີ່​ນະຄອນ​ຊຽງ​ໄຮ (ຈີນ).

ຖະ­ແຫຼງ­ການ​ຂອງ COMAC ໃຫ້​ຮູ້​ວ່າເຮືອ­ບິນ​ທີ່​ ຈີນ ແລະ ຣັດ​ເຊຍ ​ຮ່ວມ​ມື​ກັນ​ຜະ­ລິດ​ນັ້ນ ສາ­ມາດ​ບັນ­ທຸກ​ຜູ້­ໂດຍ­ສານໄດ້ 280 ຄົນ ແລະ ມີ​ຂະ­ໜາດ​ບິນ​ໄກ 12.000 ກມ ເຮັດ​ໃຫ້​ເຮືອ­ບິນ​ນັ້ນ ສາ­ມາດ​ແກ້ງ​ແຍ່ງ​ໂດຍ​ກົງ​ກັບເຮືອ​ໂບ​ອິງ 787 ຂອງ​ໂບ​ອິງ ແລະ A350 ຂອງ ແອ​ຣບັສ COMAC ໃຫ້​ຮູ້​ອີ​ກວ່າ ເຮືອ­ບິນປະ­ເພດ​ໃໝ່​ອາດ​ຈະ​ມີ​ຖ້ຽວ​ບິນ​ທຳອິດ​ໄດ້​ຫຼັງຈາກ​ນີ້​ອີກ 7 ປີ ແລະ ຈະ​ເລີ່ມ​ສົ່ງ​ມອບ​ໃຫ້​ລູກ​ຄ້າ​ໄດ້ພາຍ​ໃນ 3 ປີ​ຖັດ​ໄປ.

ແຜນ­ການ​ການ​ຮ່ວມ​ມືເພື່ອຜະ­ລິດ​ເຮືອ­ບິນ​ປະ­ເພດ​ລຳ​ຕົວກວ້າງ​ຖືກ​ນຳ​ອອກ​ມາ​ເປີດ­ເຜີຍເປັນ​ເທື່ອ​ທຳ​ອິດ ​ເມື່ອ​ເດືອນ​ມິ­ຖຸ­ນາ ປີ 2016 ເມື່ອ​ປະ­ທາ­ນາ­ທິ­ບໍ­ດີ​ຣັດເຊຍ ວາ​ລາ​ດີ​ເມຍ ປູ​ຕິນ ພົບ​ປະກັບ​ປະ­ທານ​ປະ­ເທດ​ຈີນ ສີ​ ຈິ້ນ​ຜິງ ​ທີ່​ນະ­ຄອນ­ຫຼວງ​ປັກ​ກິງ.

ຂ່າວທີ່ກ່ຽວຂ້ອງ