ໄພ​ທຳ​ມະ​ຊາດ ແລະ ອຸ­ບັດ​ຕິ​ເຫດ​ໃນ​ອິນ​ເດຍ ເຮັດ​ໃຫ້​ມີ​ຜູ້​ເສຍ​ຊີ­ວິດ​ຫຼາຍ​ສິບ​ຄົນ

50 13 ມິ.ນ. 2017 ຂ່າວຕ່າງປະເທດ
ໄພ​ທຳ​ມະ​ຊາດ ແລະ ອຸ­ບັດ​ຕິ​ເຫດ​ໃນ​ອິນ​ເດຍ ເຮັດ​ໃຫ້​ມີ​ຜູ້​ເສຍ​ຊີ­ວິດ​ຫຼາຍ​ສິບ​ຄົນ

ສຳ­ນັກ​ຂ່າວ­ສານ IANS ຂອງ​ອິນ​ເດຍ ລາຍ​ງານ​ເມື່ອ​ວັນ​ເສົາ​ທີ່​ຜ່ານ​ມາ​ວ່າ ຝົນ­ຕົກ​ໜັກ​ແກ່­ຍາວ​ຫຼາຍ​ຊົ່ວ­ໂມງ ຕະ­ຫຼອດ​ຄືນ​ວັນ​ທີ 9 ມິ­ຖຸ­ນາ ຢູ່​ໃນ​ເຂດແຄມ​ຝັ່ງ​ທະ­ເລ​ອາ​ຣັບ ທີ່​ຂຶ້ນ​ກັບລັດມາ​ຮາ​ຣາ​ສ​ຕຣາ ໄດ້​ເປັນເຫດ​ໃຫ້​ມີ​ຜູ້​ເສຍ​ຊີ­ວິດ​ຢ່າງໜ້ອຍ 16 ຄົນ ແລະ ບາດ­ເຈັບ 8 ຄົນ ໃນ​ນັ້ນ​ມີ​ເດັກ­ນ້ອຍ​ລວມ​ຢູ່ນຳ.

ຂ່າວ​ແຈ້ງ­ວ່າ ຜູ້​ເສຍ​ຊີ­ວິດສ່ວນ​ຫຼາຍ​ແມ່ນ​ເປັນ​ຍ້ອນ​ຟ້າຜ່າ ຫຼື ໄຟ­ຟ້າ​ຊ໋ອດ​ຍ້ອນ​ສາຍໄຟ​ຂາດ ແລະ ເສົາ​ໄຟ­ຟ້າ​ຫັກໂຄ່ນ. ນອກ­ຈາກ​ນັ້ນ­ແລ້ວ ຍັງ​ມີເດັກ­ນ້ອຍ​ຖືກ​ກະ­ແສ­ນ້ຳ​ພັດ​ໄຫຼໄປ 4 ຄົນ.

ນອກ­ຈາກ​ລັດມາ​ຮາ​ຣາ​ສຕຣາ​ແລ້ວ ກໍ​ຍັງ​ມີ​ຫຼາຍ​ລັດ​ທີ່­ຢູ່ລຽບ​ຕາມ​ແຄມ​ຝັ່ງ​ທະ­ເລ​ທິດ­ຕາ­ເວັນ­ຕົກ​ອິນ​ເດຍ ເຊັ່ນ ລັດກວາ ແລະ ລັດກາ​ນາ​ຕາ​ກາ ທີ່ແທກ​ປະ­ລິ­ມານ​ນ້ຳ​ຝົນ​ໄດ້​ກວ່າ 150 ມມ ຍິ່ງ​ໄປ​ກວາ​ນັ້ນ ​ຍັງ​ແທກໄດ້ 320 ມມ ພາຍ​ໃນ 24 ຊົ່ວ­ໂມງ.

ໃນ​ຂະ­ນະ​ດຽວ​ກັນ ເຈົ້າ​ໜ້າທີ່​​ຕຳ­ຫຼວດ​ອິນ​ເດຍ ແຈ້ງ​ໃຫ້ຮູ້­ເມື່ອ​ວັນ​ທີ 11 ມິ­ຖຸ­ນາ​ວ່າ ມີ​ຜູ້ເສຍ​ຊີ­ວິດ​ຢ່າງ​ໜ້ອຍ 9 ຄົນ ແລະ ບາດ­ເຈັບ 12 ຄົນ ເມື່ອ​ລົດ​ບັດບັນ­ທຸກ​ຜູ້­ໂດຍ­ສານ​ຄັນ​ໜຶ່ງ ຊຶ່ງ​ບັນ­ທຸກ​ຜູ້­ໂດຍ­ສານ 50 ຄົນ ເກີດ​ອຸ­ບັດ​ຕິ​ເຫດ​ຂວ້ຳ​ຢູ່​ໃນ​ລັດມາ​ຮາ​ຣາ​ສ​ຕຣາ ​ວັນ​ດຽວກັນນີ້ມີ​ຜູ້​ເສຍ​ຊີ­ວິດ​ຢ່າງ​ໜ້ອຍ 10 ຄົນ ​ຈາກ​ອຸ­ບັດ​ຕິ​ເຫດ​ລົດ​ຄັນໜຶ່ງ​ຕົກ­ລົງ​ຈາກ​ຄູ​ກັນ​ນ້ຳ​ຢູ່​ໃນເມືອງມາ​ທູ​ຣາ ລັດ​ອຸດ​ຕາປຣາເດ​ສ (ພາກ​ເໜືອ​ອິນ​ເດຍ).

ອິນ​ເດຍ ມີ​ປະ­ລິ­ມານ​ຜູ້ເສຍ​ຊີ­ວິດ​ຈາກ​ອຸ­ບັດ­ເຫດ​ການຄົມ­ມະ­ນາ­ຄົມ​ສູງ​ສຸດ​ໃນ​ໂລກ ໂດຍ​ສະ­ເລ່ຍ​ມີ​ຜູ້​ເສຍ​ຊີ­ວິດ 400 ກວ່າ​ຄົນ/ວັນ ຊຶ່ງ​ສາ­ເຫດຕົ້ນ­ຕໍແມ່ນ​ເປັນ​ຍ້ອນ​ພາ­ຫະ­ນະບັນ­ທຸກ​ຜູ້­ໂດຍ­ສານ​ເກີນ​ກຳ­ນົດ ພື້ນ­ຖານ​ໂຄງ​ລ່າງ​ຕົກ​ລະ­ດັບ ແລະ ຄົນ​ຂັບ​ລົດ​ບໍ່​ລະ​ມັດ​ລະວັງ.

ຂ່າວທີ່ກ່ຽວຂ້ອງ